1 Samuel 23

Azerbajani Bible (South) Used in Both Iran and Azerbaijan 2008

1داوودا خبر ورئب ددئلر: "باخ، فئلئسطلی‌لر قِعئلايا هوجوم چکئب خرمنلري تالان ادئرلر."

2داوود مصلحت اوچون ربّئن حوضورونا گلئب ددي: "آيا گدئب فئلئسطلی‌لرله ووروشوم؟" رب داوودا ددي: "گت فئلئسطلی‌لره هوجوم ات و قِعئلاني قورتار."

3لاکئن داوودون آداملاري اونا ددئلر: "باخ بورادا، يهودادا بئز قورخو ائچئنده‌‌يئک. بس نه قدر چوخ قِعئلايا، فئلئسطلي قوشونلارينين ضئدّئنه چيخاندا اولاجاغيق؟"

4داوود تزه‌دن مصلحت اوچون ربّئن حوضورونا گلدي و رب اونا جاواب ورئب ددي: "قالخ قِعئلايا اِن، چونکي فئلئسطلی‌لري سنه تسلئم اده‌جيم."

5داوودلا آداملاري قِعئلايا گدئب فئلئسطلی‌لره هوجوم اتدئلر. داوود اونلارين مال-حيوانلاريني آپاردي و فئلئسطلی‌لري بؤيوک بئر شکئلده قيردي و قِعئلا اهالئسئني قورتاردي.

6اَخئمِلِکئن اوغلو اِبياتار قِعئلايا، داوودون يانينا قاچاندا بئر اِفوددا اَلئنده آپارميشدي.

7داوودون قِعئلايا گلمه‌سي شاعولا چاتديريلدي. شاعول ددي: "تاري اونو منئم اووجومون ائچئنه قويوب، چونکي چفته‌لي دروازالاري اولان بئر شهره گئرمَکله او اؤزونو چيخيلماز بئر وضعئيّته ساليب."

8شاعول بوتون خالقي موحارئبه‌يه چاغيردي کي، قِعئلايا اِنسئنلر و داوودلا آداملاريني موحاصئره‌يه آلسينلار.

9داوود بئلئردي کي، شاعول اونون ضئدّئنه پئس بئر فئتنه قورور. اونون اوچون ده کاهئن اِبياتارا ددي: "اِفودو بورايا گتئر."

10سونرا سؤزونه داوام وردی: "ای ائسرايئلئن تاريسي رب، بو قولون اشئدئب کي، شاعول منه گؤره شهري محو اتمک اوچون ائسته‌يئر قِعئلايا گلسئن.

11آيا قِعئلا ساکئنلري منی اونا تسلئم اده‌جکلر؟ آيا شاعول بو قولونون اشئتدئيي کئمي گله‌جک؟ ای ائسرايئلئن تاريسي رب، يالواريرام، بونو قولونا آگاه ات."

12او واخت داوود سوروشدو: "آيا قِعئلالي‌لار منی و آداملاريمي شاعولا تسلئم اده‌جکلر؟" رب ددي: "تسلئم اده‌جکلر."

13داوود و آداملاري، تخمئنن آلتي يوز نفر، قالخيب قِعئلادان چيخديلار و گده بئله‌جيي هر يره گتدئلر. داوودون قِعئلادان قاچديغيني شاعولا خبر ورنده، او تعقئبدن اَل چکدي.

14داوود چؤللوکده قالالاردا قاليب، زئف صحراسينداکي داغليق بؤلگه‌سئنده ياشادي. شاعول هر گون داوودو آختاريردي، لاکئن تاري اونو شاعولا تسلئم اتمه‌دي.

15داوود زئف صحراسينداکي خورِشده اولاندا گؤردو کي، شاعول اونون جا‌نيني آلماق اوچون يولا چيخيب.

16شاعولون اوغلو يوناتان قالخيب مِشه‌لئيه، داوودون يانينا گلدي و اونو تاري آدي ائله اورَکلَندئردي.

17اونا ددي: "قورخما، آتام شاعولون اَلئنه دوشمَيه‌جکسن، ائسرايئلئن پادشاهي سن اولاجاقسان، من سندن سونرا ائکئنجي اولاجاغام. بونو حتّا آتام شاعول دا بئلئر."

18سونرا ائکئسي ده ربّئن حوضوروندا عهد باغلاديلار؛ داوود خورِشده قالدي، يوناتان دا اِوئنه قاييتدي.

19زئفلی‌لر گئبعايا، شاعولون يانينا گلئب ددئلر: "مگر داوود بئزئم يانيميزدا، يِشئمونون جنوبونداکي تپه‌سئنده، خورِشده‌کي قالالاردا گئزلنمه‌يئب؟

20ائندي ای پادشاه، ائندي اورايا اِنه‌سن، اوره‌يئنده‌کي آرزونا چاتارسان. بئزئم پاييميز بودور کي، اونو پادشاها تسلئم اِدَک."

21شاعول ددي: "منه اورک يانديرديغينيز اوچون رب سئزه برکت ورسئن.

22گدئن، داها ياخشي آراشديرين و اؤيره‌نئن کي، هارا آياق باسيب، کئملر اونو اورادا گؤروب. چونکي ديئرلر کي، او چوخ حئيله‌گَردئر.

23گئزلَندئيي يرلرئن هاميسيني تاپيب اؤيره‌نئن، دوغرو خبرله يانيما گلئن و من ده سئزئنله اورايا گده‌جيم. اگر او بؤلگه‌ده اولسا، اونو يهودا طايفالارينين هاميسي آراسيندا آختاراجاغام."

24زئفلی‌لر قالخيب شاعولدان قاباق زئفه قاييتديلار. داوودلا آداملاري يِشئمونون جنوبوندا، عَراباداکي ماعون صحراسيندا ائدئلر.

25شاعوللا آداملاري اونو آختارماق اوچون همئن يره گتدئلر. بو، داوودا خبر ورئلدي و او دا قاياليغا اِنئب ماعون صحراسيندا قالدي. شاعول بونو اشئدنده ماعون صحراسيندا داوودو تعقئب اتدي.

26شاعول داغين بئر طرفئندن گتدي، داوودلا آداملاري دا داغين او بئري طرفئندن. داوود تَله‌سئردي کي، شاعولون قاباغيندان قاچسين، چونکي شاعوللا آداملاري داوودلا آداملاريني توتماق اوچون اوراني موحاصئره‌يه آليرديلار.

27بو واخت شاعولون يانينا بئر قاصئد گلئب ددي: "تِز اول، گری قاييت، چونکي فئلئسطلی‌لر اؤلکه‌يه هوجوم ادئبلر."

28بلجه شاعول داوودو تعقئب اتمکدن اَل چکئب فئلئسطلی‌لرئن ضئدّئنه دؤيوشه گتدي. اونا گؤره ده او يره "قاچماق قاياسي" آدي ورئلدي.

29داوود اورادان چيخيب عِين‌گِدي قالالاريندا قالدي.

← Chapter 22 Chapter 24 →