1 Samuel 21

Azerbajani Bible (South) Used in Both Iran and Azerbaijan 2008

1داوود نوب شهرئنه، کاهئن اَخئمِلِکئن يانينا گلدي. اَخئمِلِک قورخودان اَسه‌‌رک داوودون پئشوازينا چيخيب ددي: "نئيه تک گلئبسن؟ نئيه يانيندا هچ کئم يوخدور؟"

2داوود کاهئن اَخئمِلِکه ددي: "پادشاه منه ائش بويوروب و منه ديئب کي، سني نه اوچون گؤندردئيئمي و سنه امر اتدئيئم ائشي هچ کئم بئلمه‌سئن. اونا گؤره ده آداملاري موعيّن بئر يره گؤندرمئشم.

3ائندي يانيندا يِمَيه نه وار؟ منه بش کؤمبه چؤرک يا دا نه وارسا، ور."

4کاهئن داوودا ددي: "عادي چؤرک يوخدور، آنجاق اگر آداملار آروادلارلا ياخينليق اتمه‌يئبلر، موقدّس چؤرک وار."

5داوود کاهئنه جاواب ورئب ددي: "عادته گؤره منئم آداملاريم عادي سفره چيخاندا بِله، بدنلرئني طاهئر ساخلاييرلار و آروادلارلا ياخينليق اتمئرلر. بس نه قدر چوخ بوگونکي سفره، کي، هامي طاهئر اولمالي‌ديرلار."

6کاهئن اونا موقدّس چؤرک وردی، چونکي رب اوچون تقدئس اولموش چؤرکلردن باشقا، چؤرک يوخ ائدي. او چؤرکلر ربّئن قاباغيندان گؤتورولموشدو کي، گؤتورولدويو گون يرئنه ائستي چؤرکلر قويولسون.

7او گون شاعولون اعيانلاريندان بئر نفر اورادا ائدي. او، ربّئن قاباغيندا اولان دئني مراسئمه گؤره يوبانميشدي. بو، شاعولون باش چوباني اِدوملو دواِق ائدي.

8داوود اَخئمِلِکه ددي: "آيا بورادا يانينيزدا بئر نئزه يا دا بئر قيلينج وار؟ چونکي پادشاه منه تَعجئلي ائش بويوردوغو اوچون، نه قيلينجيمي گؤتوره‌ بئلدئم، نه ده سئلاحلاريمي."

9کاهئن ددي: "ائلاه دره‌سئنده اؤلدوردويون فئلئسطلي گولياتين قيلينجي بِزه بوکولو اورادا، اِفودون آرخاسيندادير. اگر اونو ائسته‌يئرسن، گؤتور، چونکي بورادا اوندان باشقا يوخدور." داوود ددي: "اونون کئمي هچ قيلينج يوخدور، اونو منه ور."

10او گون داوود شاعولدان قاچدي و گَت پادشاهي آکئشئن يانينا گتدي.

11لاکئن آکئشئن اعيانلاري اونا ددئلر: "مگر بو اؤز اؤلکه‌سئنئن پادشاهي داوود ديئل؟ مگر آروادلار اويناياندا، بونو ترنّوم ادئب اوخوموردولار؛ «شاعول قيردي مئنلري، داوود اون مئنلري؟»"

12داوود بو سؤزلري اوره‌يئنه ساليب گَت پادشاهي آکئشدن چوخ قورخدو.

13اؤزونو دَلئلئيه ووردو و يانلاريندا دَلي کئمي رفتار ادئب، دروازا قاپيسينين تايلاريني جيرماقلادي و آغزينين سويونو ساقّالينا آخيتدي.

14آکئش اعيانلارينا ددي: "باخ گؤرورسونوز کي، بو آدام دَلي‌دئر. نه اوچون اونو منئم يانيما گتئرئبسئنئز؟

15مگر منئم دَلی‌لرئم اَسکئکدئر کي، قاباغيمدا دَلي‌لئک اتمک اوچون بونو دا گتئردئنئز؟ مگر بله آدام گرک منئم اِوئمه گلسئن؟

← Chapter 20 Chapter 22 →