1 Samuel 15

Azerbajani Bible (South) Used in Both Iran and Azerbaijan 2008

1سمويئل شاعولا ددي: "رب منی گؤندردي کي، سني اؤز خالقي ائسرايئل اوستونده پادشاه اولماق اوچون مسح ادئم. ائندي ربّئن سؤزونو اشئت.

2قوشونلار ربّی بله ديئر: «عَمالِقلی‌لري جزالانديراجاغام. ياديمدادير کي، نجه ائسرايئللی‌لر مئصئردن چيخان زامان، يولدا اونلارين ضئدّئنه دوردولار.

3ائندي گت، عَمالِقلی‌لري قير، هر شيلرئني کامئل دارماداغين ات و اونلارا حِيفئن گلمه‌سئن. کئشئدن آرواداجاق، اوشاقدان کؤرپه‌يه‌جک، اؤکوزدن قويوناجاق، دَوه‌دن اِششيه‌جک هاميسيني قير.»"

4شاعول خالقي چاغيردي و اونلاري طِلائمده سايدي: ائکي يوز مئن پئيادا عسگرله برابر يهودادان اون مئن نفر وار ائدي.

5شاعول عَمالِقلی‌لرئن شهرئنه گلئب دره‌ده کمئن قوردو.

6او، قِنلی‌لره ددي: "گدئب عَمالِقلی‌لردن آيريلين کي، سئزي ده اونلارلا برابر قيرماييم. چونکي ائسرايئل اؤولادلاري مئصئردن چيخان زامان سئز اونلارا مهرئبانليق اتدئنئز.» بلجه قِنلی‌لر عَمالِقلی‌لردن آيريلديلار.

7شاعول خَوئلادان مئصئرئن شرقي اولان شورا قدر عَمالِقلی‌لري قيردي.

8عَمالِق پادشاهي اَگَگي صاغ توتدو و بوتون خالقي کامئل بئر شکئلده قيلينجدان کچئرتدي.

9آمّا شاعول و خالق اَگَگه و عَمالِقلی‌لرئن لاپ ياخشي قويونلارينا، اؤکوزلرئنه، کؤکَلدئلمئش حيوانلارينا، قوزولارينا و ياخشي شيلرئن هاميسينا حيفي گلئب کامئل محو اتمک ائستمه‌دئلر. کامئل محو اولونان فايداسيز و دَيَرسئز شيلر ائدي.

10بوندان سونرا ربّئن سؤزو سمويئله نازئل اولدو:

11"شاعولو پادشاه اتدئيئمه پشمان اولدوم. چونکي او منئم داليمجا گلمکدن دؤنوب، سؤزلرئمي يرئنه يتئرمه‌يئبدئر." سمويئل قضبلَندي و بوتون گجه‌ني ربّه فغان اتدي.

12سحر اِرکَن دوردو کي، شاعوللا گؤروشسون. آمّا اونا بله خبر وردئلر: "شاعول کَرمِله گلدي و اؤزونه يادبود بئر سوتون قوياندان سونرا دؤنوب، ائره‌لئده‌کي گئلگالا اِندي."

13سمويئل شاعولون يانينا گلدي. شاعول اونا ددي: "قوي رب سنه برکت ورسئن، من ربّئن امرئنه عمل اتدئم."

14آمّا سمويئل ددي: "بس قولاقلاريما گلن بو قويون مَلَشمه‌سي و اشئتدئيئم بو اؤکوز بؤيورتوسو ندئر؟"

15شاعول ددي: "اونلاري عَمالِقلی‌لردن گتئرئبلر. چونکي خالق قويون-کچئلرئن و اؤکوزلرئن لاپ ياخشيسيني ساخلادي کي، سنئن تارين ربّه قوربان اتسئنلر. لاکئن قالانلاريني کامئل يوخ اتدئک."

16او واخت سمويئل شاعولا ددي: "دايان، قوي کِچَن گجه ربّئن منه ددئکلرئني سنه ديئم." شاعول ددي: "دانيش."

17سمويئل ددي: "سن اؤز گؤزونده کئچئک اولدوغون حالدا، مگر ائسرايئل قبئله‌لرئنئن باشچيسي اولمادين؟ مگر رب سني ائسرايئل اوستونه پادشاه مسح اتمه‌دي؟

18رب سني وظئفه اوچون گؤندرئب ددي: «گت و گوناهکارلاري، بو عَمالِقلی‌لري کامئل محو ات. اونلاري قيريب قورتارانا قدر اونلارلا ووروش.»

19بس نه اوچون ربّئن سؤزوندن ائطاعت اتمه‌دئن، تالانا گئرئشدئن و ربّئن گؤزونده پئس ساييلان ائشي گؤردون؟"

20شاعول سمويئله ددي: "من ربّئن سؤزوندن ائطاعت اتدئم و ربّئن منی گؤندردئيي وظئفه‌يه گتدئم. عَمالِق پادشاهي اَگَگي بورايا گتئرمئشم، عَمالِقلی‌لري ده کامئل محو اتمئشم.

21لاکئن خالق تالان ماليندان قويون-کچئلري و اؤکوزلري، محو ادئلمه‌يه وقف اولونانلاردان لاپ ياخشيسيني گؤتوردو کي، گئلگالدا سنئن تارين ربّه قوربان اتسئن."

22سمويئل ددي: "ربّئن نَدَن خوشو گلر، سؤزونون ائطاعت اولماسيندان يا يانديرما قورباني و آيري قوربانلاردان؟ باخ ائطاعت اتمک قورباندان، قولاق آسماق قوچلارين پئيئندن داها ياخشي‌دير.

23چونکي عاصئلئک فالچيليغا برابر گوناهدير، عئنادکارليق دا بوت‌پَرَستلئک تقصئرئنه برابردئر. ائندي کي، سن ربّئن سؤزونو ردّ ادئبسن، او دا سني پادشاهليقدان ردّ ادئب."

24او واخت شاعول سمويئله ددي: "گوناه اتمئشم. دوغرودان دا ربّئن امرئني و سنئن سؤزلرئني پوزموشام، چونکي خالقدان قورخوب اونلارين سؤزونه قولاق آسميشام.

25خاهئش ادئرم، گوناهيمي باغيشلا و ائندي منئمله برابر گری قاييت کي، ربّه پرستئش ادئم."

26سمويئل شاعولا ددي: "من سنئنله گری قاييتماياجاغام، چونکي سن ربّئن سؤزونو ردّ ادئبسن. اونا گؤره رب ده سني ائسرايئل اوستونده پادشاه اولماقدان ردّ ادئب."

27سمويئل گری قاييتماق اوچون دؤنَن زامان، شاعول اونون جوبّه‌سئنئن اَته‌يئندن ياپيشاندا اَتَک ييرتيلدي.

28سمويئل اونا ددي: "بو گون رب ده سندن ائسرايئل پادشاهليغيني بو جور ييرتيب و سندن ياخشي اولان قونشونا ورئب.

29ائسرايئلئن عئزّتي اولان يالان دِمَز و فئکرئني دَيئشمَز. چونکي او، ائنسان ديئل کي، فئکرئني دَيئشسئن."

30شاعول ددي: "گوناها باتديم. خاهئش ادئرم، ائندي خالقيمين آغساقّاللاري و ائسرايئل موقابئلئنده منه حؤرمت ات و منئمله بئرلئکده گری قاييت کي، تارين ربّه پرستئش اِدئم."

31سمويئل شاعولون داليسيجا گری قاييتدي و شاعول ربّه پرستئش اتدي.

32سونرا سمويئل ددي: "عَمالِق پادشاهي اَگَگي بورايا، منئم يانيما گتئرئن." اَگَگ اونون يانينا بَشّاش گلدي. اَگَگ اؤز-اؤزونه ديئردي: "يقئن کي، اؤلومون آجيليغي کچئب گدئب."

33سمويئل ددي: "سنئن قيلينجين آروادلاري نجه اؤولادسيز قويوب، سنئن آنان دا آروادلار آراسيندا بلجه اؤولادسيز قالاجاق." سمويئل گئلگالدا، ربّئن حوضوروندا اَگَگي دوغرادي.

34سونرا سمويئل رامايا گتدي، آمّا شاعول گئبعاداکي اِوئنه قالخدي.

35سمويئل اؤلَنه قدر داها شاعولو گؤرمه‌دي، چونکي شاعول اوچون ماتم توتموشدو. رب شاعولو ائسرايئلئن پادشاهي اتدئيئنه پشمان اولموشدو.

← Chapter 14 Chapter 16 →