1 Samuel 12

Azerbajani Bible (South) Used in Both Iran and Azerbaijan 2008

1سمويئل ائسرايئللی‌لرئن هاميسينا ددي: "باخين من سئزئن هر دِدئيئنئزه قولاق آسيب اوستونوزه بئر پادشاه تعيئن اتمئشم.

2ائندي قاباغينيزدا پادشاه گدئر، لاکئن من آرتيق قوجالميشام، ساچلاريم آغاريب. باخ، اوغلانلاريم دا سئزئنله‌دئر. جاوانليغيمدان بو گونه قدر سئزئن قاباغينيزدا گتمئشم.

3باخ، قاباغينيزدايام، هانسينيزين اؤکوزونو آلميشام؟ کئمئن اِششه‌يئني آلميشام؟ کئمي آلداتميشام، کئمه ظولم اتمئشم، يا دا کئمدن روشوَت آليب حاقسيز عملئنه گؤز يومموشام؟ ربّئن و اونون مسح اتدئيئنئن قاباغيندا منه ضئدّ شهادت ادئن کي، حاقّينيزي ورئم."

4اونلار بله جاواب وردئلر: "سن بئزي هچ واخت آلداتماييبسان، ظولم اتمه‌يئبسن، هچ کئمئن اَلئندن ده هچ نه آلماييبسان."

5سمويئل اونلارا ددي: "سئزئن ضئدّئنئزه اَلئمده بئر شي تاپماديغينيزا بو گون رب و اونون مسح اولونموش پادشاهي دا شاهئددئر." خالق ددي: "بلی، شاهئددئر."

6سمويئل خالقا ددي: "موساني و هارونو تعيئن ادن، آتالارينيزي مئصئر دئياريندان چيخاردان ربدئر.

7ائندي، دايانين. قويون ربّئن حوضوروندا، ربّئن سئزه و آتالارينيزا اتدئيي بوتون صالح عمللر باره‌ده ثوبوتلار گؤرسدئم.

8يعقوب مئصئره گتدي. سونرا آتالارينيز ربّه فرياد اتدئلر. رب موسا و هارونو گؤندردي کي، آتالارينيزي مئصئردن چيخارديب بو يرده ساکئن اتسئن.

9لاکئن اونلار تاريلاري ربّی ياددان چيخارتديلار، رب ده اونلاري خاصور قوشونونون باشچيسي سئسِرايا، فئلئسطلی‌لره و موآب پادشاهينا تسلئم اتدي. اونلار آتالارينيزين ضئدّئنه ووروشدولار.

10خالق ربّه فريادلا ددي: «بئز گوناه اتمئشئک، چونکي ربّی آتيب، بَعَل و عَشتاروت بوتلرئنه قوللوق اتمئشئک. ائندي يارب، بئزي دوشمنلرئمئزئن اَلئندن قورتار و بئز سنه قوللوق اده‌رئک.»

11رب ده يِروب‌بَعَلي، يئفتاخي و من سمويئلي گؤندردي. او سئزي اطرافينيزداکي دوشمنلرئن اَلئندن قورتاردي و اَمئن-آمانليقدا ياشادينيز.

12سئز عَمّون پادشاهي ناخاشين سئزئن ضئدّئنئزه گلدئيئني گؤرنده، رب تارينيز سئزه پادشاه ائکَن منه دِدئنئز: «خير، گرک بئزه بئر پادشاه حؤکمرانليق اتسئن.»

13ائندي باخين. بو دا سِچدئيئنئز و ائسته‌دئيئنئز پادشاه! باخين، رب اوستونوزه بئر پادشاه تعيئن ادئب.

14اگر ربدن قورخوب اونا قوللوق اده‌سئنئز و سَسئنه قولاق آسيب امرئنه ضئدّ چيخماياسينيز، او واخت هم سئزه حؤکمرانليق ادن پادشاهينيز، هم ده سئز تارينيز ربّئن دالينجا گِدَرسئنئز.

15يوخ، اگر ربّئن سَسئنه قولاق آسماياسينيز و ربّئن امرئنه ضئدّ چيخاسينيز، او زامان ربّئن اَلي آتالارينيزا ضئدّ اولدوغو کئمي، سئزئن ده ضئدّئنئزه اولار.

16حتّا ائندي دايانين، ربّئن گؤزونوز قاباغيندا اده‌جَيي بو بؤيوک حادئثه‌ني گؤرون.

17بو گون مگر بوغدا بئچئمي ديئل؟ ربّئن حوضورونا يالواراجاغام کي، گؤي گورولتوسو و ياغيش گؤندرسئن. او زامان گؤرَرسئنئز کي، اؤزونوز اوچون پادشاه ائسته‌مَکله اتدئيئنئز پئسلئک، ربّئن گؤزونده نه قدر بؤيوکدور.

18سمويئل ربّی چاغيردي و رب او گون گؤي گورلاديب ياغيش ياغديردي. بوتون خالق ربدن و سمويئلدن چوخ قورخدو.

19او واخت جاماعات سمويئله ددي: "قوللارين اوچون تارين ربّه يالوار کي، اؤلمه‌يک، چونکي بوتون گوناهلاريميزين اوستونه اؤزوموزه پادشاه ائسته‌مک تقصئرئني ده علاوه اتدئک."

20لاکئن سمويئل خالقا ددي: "قورخمايين، بوتون بو پئسلئيي سئز ادئبسئنئز، آمّا گئنه ده ربّئن دالينجا گتمکدن دؤنمه‌يئن، بوتون قلبئنئزله ربّه قوللوق ادئن.

21دؤنمه‌يئن، چونکي او زامان بوش بوتلرئن دالينجا گتمئش اولاجاقسينيز، او بوتلر کي فايدا ورمَزلر، خئلاص دا اتمَزلر، چونکي پوچدورلار.

22چونکي رب خالقيني اؤز بؤيوک آدينين خاطئرئنه آتماياجاق، اونا گؤره کي، سئزي اؤز خالقي اتمک ربّئن خوشونا گلئب.

23بوندان علاوه، منه گلئنجه، مندن ائراق اولسون کي، سئزئن اوچون دوعا اتمکدن اَل چکئب، بلجه ربّئن ضئدّئنه گوناه اِدئم. من سئزه ياخشي و حاق يولونو اؤيرَده‌جيم.

24آنجاق ربدن قورخون و اونا حقئقتده بوتون قلبئنئزله خئدمت ادئن. گؤرون سئزئن اوچون نجه عظمتلي ائشلر گؤروب.

25آمّا اگر پئسلئک اتمکده داوام اده‌سئنئز، هم سئز محو اولاجاقسينيز، هم ده پادشاهيز."

← Chapter 11 Chapter 13 →