1 Kings 19

Azerbajani Bible (South) Used in Both Iran and Azerbaijan 2008

1اَخاب ائليانين اتدئيي بوتون ائشلري و اونون نجه بوتون پيغمبرلري قيلينجلا اؤلدوردويونو ائزِبله دانيشدي.

2ائزِبِل ائليانين يانينا قاصئد گؤندرئب ددي: "صاباح بو واختاجاق اگر من سني اونلارين گونونه سالماسام، قوي آللاهلار منه بله و بوندان بَتَرئني اتسئنلر.»

3ائليا قورخدو و قالخيب جا‌نيني قورتارماق اوچون يهودايا عاييد اولان بئرشئباعا گلدي. نؤکرئني اورادا قويوب

4اؤزو چؤلده بئر گونلوک يول گتدي. و گلئب بئر سوپورگه بوتاسينين آلتيندا اوتوردو و جانينا اؤلوم آرزو ادئب ددي: "بَسدئر، يارب، ائندي منئم جانيمي آل، چونکي من آتالاريمدان ياخشي ديئلم."

5او، سوپورگه بوتاسينين آلتيندا اوزانيب يوخويا گتدي. باخ، بو زامان بئر مَلَک اونا توخونوب ددي: "قالخ يمک يِه!"

6ائليا باخيب گؤردو کي، باشينين کناريندا ائستي داش اوستونده پئشَن بئر کؤکه و بئر بارداق سو وار. او يِيئب ائچدي و گئنه يوخويا گتدي.

7ربّئن مَله‌يي گئنه گلدي و اونا توخونوب ددي: "قالخ يمک يِه، چونکي يول سنئن اوچون چوخ اوزوندور."

8او قالخدي و يِيئب ائچدي. يِمه‌يئن گوجو ائله قيرخ گون-قيرخ گجه تارينين داغي خورِبه قدر گتدي.

9ائليا اوراداکي ماغارايا گئردي و گجه‌ني اورادا قالدي. باخ، ربّئن سؤزو نازئل اولوب ددي: "ائليا، بورادا نه ادئرسن؟"

10ائليا ددي: "من قوشونلارين تاريسي رب اوچون چوخ قيرت گؤرستدئم. چونکي ائسرايئل اؤولادلاري سنئن عهدئني ترک ادئبلر، قوربانگاهلاريني داغيديبلار، و پيغمبرلرئني قيلينجلا اؤلدوروبلر. تَکجه من قالميشام، و اونلار منی ده آختاريرلار کي، جانيمي آلسينلار."

11او ددي: "چيخ، داغدا ربّئن حوضوروندا دور." و باخ، رب اورادان کچئردي. داغلاري ياران و ربّئن قاباغيندا قايالاري پارچالايان بؤيوک و گوجلو بئر کولَک اسئردي، آنجاق رب کولَکده ديئلدي. کولَکدن سونرا زلزله اولدو، آمّا رب زلزله‌ده ديئلدي.

12زلزله‌دن سونرا اود دوشدو، آمّا رب اوددا ديئلدي. اوددان سونرا خفئف بئر سَس گلدي.

13ائليا بونو اشئدنده، اوزونو جوبّه‌سي ائله اؤرتدو و چيخيب ماغارانين آغزيندا داياندي. بئر سَس اونا ددي: "ائليا، بورادا نه ادئرسن؟"

14ائليا ددي: "من قوشونلارين تاريسي رب اوچون چوخ قيرت گؤرستدئم. چونکي ائسرايئل اؤولادلاري سنئن عهدئني ترک ادئبلر، قوربانگاهلاريني داغيديبلار، و پيغمبرلرئني قيلينجلا اؤلدوروبلر. تَکجه من قالميشام، منی ده آختاريرلار کي، جانيمي آلسينلار."

15رب اونا ددي: "قالخ، يولونلا دَمَشق صحراسينا قاييت. اورايا چاتاندا خَزااِلي اَرام اوستونده پادشاه اولماق اوچون مسح ات،

16نئمشي اوغلو يِيهونو دا گرک ائسرايئل اوستونده پادشاه اولماق اوچون مسح اده‌سن، آبِل-مِخولادان اولان شافاط اوغلو اِلئشَعي ده اؤز يرئنه پيغمبر اولماق اوچون مسح ات.

17خَزااِل قيلينجيندان قورتاراني يِيهو اؤلدوره‌جک، يِيهونون قيلينجيندان قورتاراني اِلئشَع اؤلدوره‌جک.

18آنجاق من ائسرايئلده يدّي مئن آدامي قورويوب ساخلاميشام، بوتون اونلاري کي، بَعَلئن قاباغيندا دئزه دوشمه‌يئبلر و اونون آغزيني اؤپمه‌يئبلر."

19ائليا اوراني ترک اتدي و شافاط اوغلو اِلئشَعي تاپدي. او، ير شوخوملاييردي، قاباغيندا اون ائکي جوت اؤکوز وار ائدي و اؤزو اون‌ائکئنجي جوت اؤکوزو سوروردو. ائليا اِلئشَعئن يانيندان کچنده جوبّه‌سئني اونون اوستونه آتدي.

20اِلئشَع اؤکوزلري قويوب ائليانين دالينجا قاچدي و ددي: "قوي گدئب آتا- آنامي اؤپوم، سونرا سنئن دالينجا گله‌رَم." ائليا اونا ددي: "گری قاييت، مگر من سنه نه اتدئم؟"

21اِلئشَع اونون آرديندان گری قاييتدي. اؤز بئر جوت اؤکوزونو گؤتوروب اونلاري قوربان کَسدي. اؤکوزلري کوتانين تختلري ائله پئشئرئب اَتلرئني خالقا وردی و اونلار يدئلر. سونرا قالخيب ائليانين دالينجا گتدي و اونا خئدمت اتدي.

← Chapter 18 Chapter 20 →