1 Kings 12

Azerbajani Bible (South) Used in Both Iran and Azerbaijan 2008

1رِحوبعام شِکِمه گتدي، چونکي بوتون ائسرايئللی‌لر شِکِمه گلمئشدئلر کي، اونو پادشاه اتسئنلر.

2نِباط اوغلو يَروبعام بونو اشئتدئيي زامان، حله مئصئرده ائدي. اورايا سوليمان پادشاهين اَلئندن قاچميشدي و مئصئرده ياشاييردي.

3اونو چاغيرتديرديلار. يَروبعام گلدي و ائسرايئلئن بوتون جاماعاتي ائله بئرلئکده رِحوبعاملا دانيشيب اونا ددی:

4"آتان اوستوموزه آغير يوغ قويدو. ائندي سن، آتانين چتئن قوللوغونو و اوستوموزه قويدوغو آغير يوغو يونگوللَشدئر، بئز ده سنه قوللوق اده‌رئک."

5رِحوبعام اونلارا ددي: "ائندي گدئن و اوچ گوندن سونرا گئنه منئم يانيما گلئن." خالق گتدي.

6پادشاه رِحوبعام آتاسي سوليمانين صاغليغيندا اونا مصلحت ورن آغساقّاللاردان سوروشدو: "بو خالقا جاواب ورمک اوچون منه نه مصلحت ورئرسئنئز؟"

7آغساقّاللار اونا ددئلر: "اگر بو گون سن بو خالقا خئدمتچي اولاسان، اونلارا قوللوق اده‌سن و اونلارلا ياخشي دانيشاسان، دائم سنه قول اولاجاقلار."

8لاکئن او، آغساقّاللارين وردئکلري مصلحته محل قويمادي، اونونلا بئرلئکده بؤيوموش و اونا خئدمت ادن جاوان آداملارلا مصلحتلَشدي.

9اونلارا ددي: "سئز نه مصلحت ورئرسئنئز؟ منه ديئن بو خالقا کي، «آتانين اوستوموزه قويدوغو يوغو يونگوللَشدئر» ديئرلر، نه جاواب ورئم؟"

10اونونلا بئرلئکده بؤيوموش جاوان آداملار اونا ددئلر: "سنه «آتان اوستوموزه آغير يوغ قويدو، سن اونو يونگوللَشدئر» دئين بو خالقا بله دِه: «منئم کئچئک بارماغيم آتامين بِلئندن يوغوندور.

11آتام سئزي آغير يوغلا يوکله‌مئشدي، آمّا من سئزئن يوغونوزو داها دا آرتيراجاغام؛ آتام سئزي قامچيلارلا تَنبِه اتدي، آمّا من سئزي عقربلرله تَنبِه اده‌جيم.»"

12يَروبعام بوتون خالقلا بئرلئکده، پادشاهين ددئيي کئمي کي، "اوچ گون سونرا گئنه يانيما گلئن" اوچ گون سونرا رِحوبعامين يانينا گلدئلر.

13پادشاه خالقا ياوا جاواب وردی، آغساقّاللارين اونا وردئيي مصلحته محل قويماييب

14جاوان آداملارين مصلحتئنه گؤره خالقا ددي: "آتام سئزي آغير يوغلا يوکله‌مئشدي، آمّا من سئزئن يوغونوزو داها دا آرتيراجاغام؛ آتام سئزي قامچيلارلا تَنبِه ادئردي، آمّا من عقربلرله تَنبِه اده‌جيم."

15بلجه پادشاه خالقا قولاق آسمادي، چونکي بو حادئثه رب طرفئندن اولدو کي، او، شئلولو اَخئيا واسئطه‌سئله نِباط اوغلو يَروبعاما ددئيي سؤزو يرئنه يتئرسئن.

16بوتون ائسرايئللی‌لر پادشاهين اونلارا قولاق آسماديغيني گؤرنده جاواب ورئب ددئلر: "داوودلا بئزئم نه ائشئمئز وار؟ يَسّه‌نئن اوغلوندا ائرثئمئز يوخدور! ای ائسرايئللی‌لر، گدئن اِوئنئزه، ای داوود، ائندي اؤز اِوئنه باخ!" ائسرايئللی‌لر اِولرئنه گتدئلر.

17رِحوبعام فقط يهودا شهرلرئنده ياشايان ائسرايئل اؤولادلاري اوستونده پادشاهليق اتدي.

18رِحوبعام پادشاه ائجباري فَعله‌لر اوستونده نظارتچي اولان اَدورامي گؤندردي، بوتون ائسرايئللی‌لر اونو داشا باسيب اؤلدوردولر. پادشاه رِحوبعام تَلَسئک اؤز دؤيوش عاراباسينا مئندي و اورشلئمه قاچدي.

19بلجه ائسرايئل داوود سولاله‌سئنئن ضئدّئنه قالخدي و بو گونه قدر بله‌دئر.

20بوتون ائسرايئللی‌لر يَروبعامين قاييتديغيني اشئدنده، اونو اؤز ائجلاسينا چاغيرتديرديلار و بوتون ائسرايئل اوستونده اونو پادشاه اتدئلر. يهودا قبئله‌سئندن آيري، داوود سولاله‌سئنئن داليسيجا گِدن اولمادي.

21رِحوبعام اورشلئمه گلدئکده، بوتون يهودا اِوي ائله بِنيامئن قبئله‌سئني بئر يره ييغدي کي، ائسرايئل اِوي ائله موحارئبه ادئب پادشاهليغي سوليمان اوغلو رِحوبعاما قايتارسين: او يوز هشتاد مئن سچمه دؤيوشچوسونو ييغدي.

22لاکئن تارينين بو سؤزو تاري آدامي شَمَعيايا نازئل اولدو:

23"يهودا پادشاهي سوليمان اوغلو رِحوبعاما، بوتون يهودا و بِنيامئن اِوئنه، قالان خالقا دِه کي،

24رب بله ديئر: «سئز گرک گتمه‌يه‌سئنئز و اؤز هموطنلرئنئز ائسرايئل اؤولادلاري ائله موحارئبه اتمه‌يه‌سئنئز. هر کس اؤز اِوئنه قاييتسين، چونکي بو ائش منئم طرفئمدن اولوب.»" بلجه اونلار ربّئن سؤزونه قولاق آسديلار و ربّئن سؤزونه گؤره گری قاييتديلار.

25يَروبعام اِفرايئمئن داغليق بؤلگه‌سئنده شِکِمي تئکدي و اورادا ياشادي. اورادان چيخيب پِنواِلي تئکدي.

26يَروبعام اوره‌يئنده دوشوندو: "پادشاهليق گئنه داوود سولاله‌سئنه قاييداجاق.

27اگر بو خالق اورشلئمه، ربّئن معبدئنه قوربان گتئرمک اوچون گده‌لر، بو خالقين اوره‌يي آغالارينا، يعني يهودا پادشاهي رِحوبعاما طرف دؤنه‌جک. اونلار دا منی اؤلدوروب يهودا پادشاهي رِحوبعامين طرفئنه کچه‌جکلر."

28پادشاه مصلحتله‌شئب، ائکي قيزيل دانا دوزلتدي و خالقا ددي: "سئزه اورشلئمه گتمک چوخ آغير زحمتدئر. ای ائسرايئللی‌لر، باخين، بو دا سئزي مئصئر تورپاغيندان چيخاردان آللاهلارينيز!"

29او، دانالاردان بئرئني بِيت ائلده، او بئرئني ده داندا قويدو.

30بو ائش گوناه اولدو. چونکي خالق اونلاردان بئرئنه پرستئش اتمک اوچون دانا قدر گدئردي.

31يَروبعام پرستئشگاهلاردا معبدلر تئکدي و خالقين آراسيندان لاوئلی‌لردن اولمايان کاهئنلر تعيئن اتدي.

32يَروبعام سکّئزئنجي آيين اون بشئنجي گونو، يهودادا کچئردئلَن بايرام کئمي، بئر بايرام باشلاتدي و بِيت ائلده دوزلتدئيي دانالارا قوربان گتئرمک اوچون قوربانگاها قالخدي و تئکدئيي پرستئشگاهلارين کاهئنلرئني بِيت ائلده وظئفه‌يه قويدو.

33او سکّئزئنجي آيين اون بشئنجي گونو، حتّا اؤزوندن ائختئراع اتدئيي آي، ائسرايئل اؤولادلاري اوچون بايرام کچئرتدي و بوخور يانديرماق اوچون بِيت ائلده دوزلتدئيي قوربانگاها قالخدي.

← Chapter 11 Chapter 13 →