Psalms 63

azerbaijan-2013

1ای تاری، سن منئم تاریمسان، اورَکدن سنی آختاریرام، جانیم سنئن اوچون سوسوزدور، ووجودوم سنئن اوچون ائنتئظار چکئر، قورو و جان‌سیخیجی بئر دئیاردا، او دئیاردا کی، سودان بئر اثر یوخدور.

2سنئن موقدّس یرئنده سنه باخمیشدیم کی، قودرت و عئزّتئنی گؤروم.

3دوداقلاریم سنه حمد اده‌جک، چونکی سنئن محبّتئن حیاتدان یاخشی‌دیر.

4نه‌قدر جان بدنئمده وار، سنه حمد اوخویاجاغام، اَللرئمی قالدیریب سنئن آدینی چاغیراجاغام،

5جانیم دویوب، گؤزل بئر یمکله دویان کئمی؛ شن دوداقلارلا آغزیم حمد اوخویور؛

6یاتدیغیم یرده سنی خاطیرلایاندا، گجه‌نئن نؤوبه‌‌لرئنده سنی دوشونَنده!

7قانادلارینین کؤلگه‌سی آلتیندا شادلیقدان اوخویاجاغام، چونکی منئم کؤمه‌یئم سن‌سن.

8جانیم سنه باغلی‌دیر، سنئن صاغ اَلئن منی ساخلاییر.

9لاکئن جانیمی هلاک اتمه‌یه چالیشانلار محو اولاجاقلار، یرئن لاپ دئب یرلرئنه باتاجاقلار،

10قیلینج آغزینا ورئله‌جکلر، چاقّاللارین یئیه‌جیی اولاجاقلار.

11آمّا پادشاه تاریدا سوئنه‌جک، تارینین آدینا آند ائچن هر کس شادلاناجاق؛ حال بو کی، یالانچیلارین آغزی باغلاناجاقدیر.

← Chapter 62 Chapter 64 →