Psalms 44

azerbaijan-2013

1ای تاری، قولاقلاریمیزلا اشئتمئشئک، آتالاریمیز اونلارین گونلرئنده، او قدئم گونلرده، اونلارا اتدئیئن ائشلری بئزه نقل ادئبلر.

2نجه سن، الئنله مئلّتلری قوودون، آمّا آتالاریمیزی یرلشدئردئن؛ نجه طایفالاری ذلئل اتدئن، لاکئن آتالاریمیزا ووسعت وردئن.

3چونکی اونلار اؤلکه‌یه قیلینجلاری ائله مالئک اولمادیلار، اونلارا ظفر ورن، اونلارین اؤز قوللاری دیئلدی؛ سنئن صاغ الئن ائدی، سنئن قولون، سنئن جمالینین نورو، چونکی اونلاردان راضی ائدئن.

4سن منئم پادشاهیمسان، ای تاری، یعقوبون نسلئنئن نئجاتینا امر ات.

5سنئن کؤمه‌یئنله دوشمنلرئمئزی یره چیرپاجاغیق. سنئن آدینلا ضئدّئمئزه قالخانلاری پایمال اده‌جیئک.

6چونکی من اوخ کامانیما توکّول اتمه‌رم، قیلینجیم دا منه نئجات ورمز.

7آنجاق سن بئزه دوشمنلرئمئزدن نئجات ورئبسن، بئزدن نئفرت ادنلری سن اوتاندیریبسان.

8بوتون گون تارییا فخر اده‌جیئک، سنئن آدینا ابده کئمی حمد اوخویاجاغیق. سِلا

9آمّا ائندی سن بئزی بوراخیبسان، بئزی روسوای ادئبسن، بئزئم قوشونوموزلا چیخمیرسان.

10دوشمن قاباغیندا بئزی گری دؤندَ‌رئرسن، بئزدن نئفرت ادنلر بئزی غارت ادئبلر.

11قویوبسان کی، بئزی قویونلار کئمی یسئنلر، مئلّتلر آراسیندا بئزی داغیدیبسان.

12خالقینی هچ زادا ساتیرسان، اونلارین قئیمتی سنه فایدالی اولمور.

13قونشولاریمیز یانیندا بئزی اوزو-قارا ادئرسن، اطرافیمیزدا اولانلارا لاغ هدفی اولموشوق.

14مئلّتلر آراسیندا مثل اولموشوق، بئزی طایفالارین گولوش هدفی ادئرسن.

15روسوایچیلیغیم بوتون گون قاباغیمدادیر، اوزومون خجالتی منی اؤزونده بورویوب؛

16تحقئر و لعنت اده‌نئن سسلری اوزوندن، دوشمن و ائنتئقام آلان قاباغیندان.

17بوتون بولار باشیمیزا گلئب، لاکئن سنی یاددان چیخارتمامیشیق، سنئن عهدئنه خیانت اتمه‌مئشئک.

18اوره‌یئمئز گری دؤنمه‌یئب، قدملرئمئز سنئن یولوندان آزماییب.

19حال بو کی، سن بئزی چاقّاللار یرئنده ازئبسن، اؤلوم کؤلگه‌سی ائله بئزی بورویوبسن.

20اگر تاریمیزین آدینی اونوتموش اولسایدیق، اگر اللرئمئزی یاد بئر آللاها طرف اوزاتمیش اولسایدیق،

21تاری بونو مگر کشف اتمزدی؟ چونکی او اوره‌یئن بوتون سئرّلرئنی بئلَندئر.

22بلی، سنئن خاطئرئنه بوتون گون اؤلدورولوروک، قصّابلیق قویونلار کئمی ساییلیریق.

23ای پروردئگار، اویان! نه اوچون یاتیبسان؟ قالخ! بئزی ابده کئمی بوراخما.

24نئیه اوزونو بئزدن گئزله‌دئرسن؟ بئزئم جفامیزی، بئزئم ذلئل اولدوغوموزو اونودورسان؟!

25چونکی تورپاغا قدر اَیئلمئشئک، بدنئمئز یره یاپیشیب.

26بئزئم ائمدادیمیزا قالخ، محبّتئنئن خاطئرئنه بئزی خئلاص ات.

← Chapter 43 Chapter 45 →