Matthew 11

azerbaijan-2013

1عئسا اون ائکی شاگئردئنه نصئحت ورندن سونرا اورادان گتدی کی، اونلارین شهرلرئنده تعلئم ورئب، وعظ اتسئن.

2یحیا زئنداندا مسئحئن اتدئیی ائشلری اشئدن واخت، شاگئردلرئندن بعضئسئنی گؤندَ‌ردی کی،

3عئسادان سوروشسونلار: «آیا گلمه‌لی اولان سن‌سن، یوخسا اؤزگه بئرئنی گؤزله‌یک؟»

4عئسا جاوابیندا اونلارا ددی: «گدئن نه اشئتدئیئنئزی و نه گؤردویونوزو یحیایا بئلدئرئن؛

5کورلار گؤرورلر، آخساقلار یرئیئرلر، جوذاملی‌لار شفا تاپیرلار، کارلار اشئدئرلر، اؤلولر دئرئلئرلر، و یوخسوللارا ائنجئلئن خوش خبری ورئلئر.

6خوش او آدامین حالینا کی، منئم باره‌مده بودره‌مئر!»

7یحیانین شاگئردلری گدن واخت، عئسا جاماعاتا یحیانین حاقّیندا دانیشماغا باشلادی: «چؤله نه گؤرمه‌یه گتدئنئز؟ یلئن ترپتدئیی بئر قامیشی؟

8اگر یوخ، بس نه گؤرمه‌یه گتدئنئز؟ ظرئف پالتار گیئنمئش بئر آدامی؟ ظرئف پالتار گِینلر کی، پادشاهلارین سارایلاریندادیرلار.

9بس نه گؤرمه‌یه گتدئنئز؟ بئر پیغمبر؟ بلی، سئزه دیئرم، حتّا پیغمبردن اوستون اولانی.

10بو، او آدامدیر کی، اونون حاقّیندا یازیلیب: ”باخ، سندن قاباق من اؤز الچئمی گؤندَ‌ره‌جه‌یم. او، سنئن یولونو سنئن قاباغیندا حاضیرلایاجاق.“

11دوغروسونو سئزه دیئرم؛ آرواددان دوغولانلار آراسیندا تعمئد ورن یحیادان داها بؤیوکو اولماییب؛ لاکئن گؤیلرئن پادشاهلیغیندا لاپ کئچئک اولان، اوندان بؤیوکدور.

12تعمئد ورن یحیانین گونلرئندن ائندئیه کئمی گؤیلرئن پادشاهلیغی زورلا برقرار اولور و زورلو آداملار اونو اَله گتئرئرلر.

13چونکی بوتون پیغمبرلر و شرئعت، یحیایا قدر اولاجاقلاری نبئلئک اتدئلر.

14و اگر بونو قبول اتمک ائسته‌یئرسئنئز، یحیا اؤزو هَمَن گلمه‌لی اولان ائلیادیر.

15قولاغی اولان قوی اشئتسئن.

16بو نسئلی نه‌یه بنزه‌دئم؟ بازار میدانیندا اوتوران اوشاقلارا بنزه‌یئرلر کی، یولداشلارینی چاغیریب دیئرلر:

17”سئزه توتک چالدیق، سئز اوینامادینیز، قملی ماهنی‌لار اوخودوق، سئز آغلامادینیز.“

18چونکی یحیا گلدی، نه ییئردی نه ده ائچئردی. و دیئرلر کی، ”اوندا ائبلئس وار.“

19ائنسان اوغلو گلئب، هم یِیئر هم ده ائچئر و دیئرلر: ”باخ بو قارینقولو و شراب ائچن آداما؛ باج ییغانلارین و گوناهکارلارین دوستو!“ حال بو کی، حئکمت گؤرستدئیی عمللرله تصدئق اولونور.»

20او زامان عئسا او شهرلری دانلاماغا باشلادی کی، مؤجوزه‌لرئنئن چوخلاری اونلاردا باش ورمئشدی. چونکی اونلار تؤوبه اتمه‌دئلر:

21«وای سنه ای خورازین! وای سنه ای بیت‌صیدا! چونکی سئزده باش ورن مؤجوزه‌لر صور و صئدوندا باش ورسَیدی، اونلار چوخدان چولا بورونوب، کول اوستونده تؤوبه ادردئلر.

22لاکئن سئزه دیئرم، قئیامت گونونده صور و صئدونون حالی سئزئنکئندن داها آسان اولاجاق.

23و سن ای کفرناحوم، مگر گؤیه قدر اوجالاجاقسان؟! یوخ، اؤلولر دئیارینا قدر آلچالاجاقسان. چونکی سنده باش ورن مؤجوزه‌لر سودومدا باش ورسَیدی، او، حله ده بو گونه کئمی دوراردی.

24لاکئن سنه دیئرم کی، قئیامت گونو سودومون حالی سنئنکئندن داها آسان اولاجاق.»

25بوندان سونرا عئسا بله ددی: «ای آتا، گؤیون و یرئن ربّی، شوکور ادئرم سنه کی، بو شیلری آغیلّی‌لاردان و عالئملردن گئزلَدئب، کئچئک اوشاقلارا بلّی ادئرسن!

26بلی آتا! چونکی سنئن ریضان بله ائدی.

27هر شی آتام طرفئندن منه ورئلئب. هچ کس اوغولو تانیماز مگر آتا، و هچ کس ده آتانی تانیماز مگر اوغول و او آداملار کی، اوغول اونلاری آتانی تانیماق اوچون سچئر.

28ای بوتون یورغونلار، ای یوکلری آغیر اولانلار، منئم یانیما گلئن و من سئزه راحاتلیق وره‌رم.

29منئم یوغومو گؤتورون و مندن اؤیره‌نئن: چونکی من حلئم و اورَکدن تواضؤعکارام. و جانینیزا راحاتلیق تاپارسینیز.

30چونکی یوغوم آسان و یوکوم یونگولدور.»

← Chapter 10 Chapter 12 →