Mark 16

azerbaijan-2013

1سبّت گونو کچندن سونرا، مجدللی مریم، یعقوبون آناسی مریم، و سالومه عطئرلر ساتین آلدیلار کی، گدئب عئسانی عطئرله‌سئنلر.

2و هفته‌نئن ائلک گونونده، سحر چوخ اِرکن، گونش دوغان واخت قبئره گلدئلر.

3و آرالاریندا دیئردئلر: «گؤره‌سن قبئرئن آغزینداکی داشی بئزئم اوچون کئم دئیئرله‌ده‌جک؟»

4لاکئن باشلارینی قالدیریب باخاندا، داشی بئر یانا دئیئرلنمئش گؤردولر. او داش چوخ بؤیوک بئر داش ائدی.

5قبئره گئردئلر و صاغ طرفده آغ پالتار گیئنمئش بئر جاوانی اوتورموش گؤرَ‌نده حیرت اتدئلر.

6جاوان اونلارا ددی: «حیرت اتمه‌یئن! سئز چارمیخا چکلئمئش ناصئره‌لی عئسانی آختاریرسینیز. او دئرئلئب، بورادا دیئل. باخین، اونو قویدوقلاری یر بورادیر.

7ائندی اونون شاگئردلرئنئن و پطروسون یانینا گدئن و اونلارا دیئن کی، او سئزدن قاباق جلئله گدئر. ددئیی کئمی اونو اورادا گؤره‌جکسئنئز.»

8اونلار قبئردن چیخیب قاچدیلار، چونکی تئتره‌مه و حیرت اونلاری بوروموشدو. قورخدوقلاریندان هچ کسه بئر شی دمه‌دئلر.

9هفته‌نئن ائلک گونو سحر ارکن، عئسا دئرئلندن سونرا اوّلجه اؤزونو مجدللی مریمه گؤرستدی. عئسا مریمدن یدّی ناپاک روح قووموشدو.

10مریم گدئب عئسا ائله اولانلارا خبر وردی. اونلار یاس توتوب آغلاییردیلار.

11لاکئن عئسانین دئری اولوب اونا گؤروندویونو اشئدنده ائنانمادیلار.

12بو شیلردن سونرا، عئسا اونلاردان ائکئسئنه، آیری بئر صورتده کنده گدن واخت گؤروندو.

13بونلار قاییدیب شاگئردلره خبر وردئلر، آمّا اونلار بونلارا دا ائنانمادیلار.

14و اوندان سونرا عئسا اؤزونو او اون‌بئر شاگئرده، اونلار سوفره باشیندا اولاندا ظاهئر اتدی و اونلاری ائمانسیزلیقلاری و داش اورَکلی اولدوقلاری اوچون دانلادی. چونکی اونلار اونون اؤلولردن دئرئلندن سونرا اونو گؤرنلرئن سؤزلرئنه ائنانمامیشدیلار.

15عئسا اونلارا ددی: «بوتون دونیایا گدئن و ائنجئلی بوتون خالقا وعظ ادئن.

16ائمان گتئرئب تعمئد اولونان نئجات تاپاجاق؛ لاکئن ائمان گتئرمه‌ین محکوم اولاجاقدیر.

17بو علامتلر ائمان گتئرنلرله گده‌جک: منئم آدیملا ناپاک روحلاری قوواجاقلار. تزه دئللر‌له دانیشاجاقلار.

18ائلانلاری اَللری ائله توتاجاقلار. اؤلدورن زَهَر ده ائچسه‌لر، اونلارا زئیان یتئرمه‌یه‌جک. ناخوشلار اوستونه اللرئنی قویاجاقلار و اونلار صاغالاجاقلار.»

19بله‌جه رب عئسا اونلارلا صؤحبت ادندن سونرا گؤیه قالخدی و تارینین صاغیندا اوتوردو.

20شاگئردلر ده گدئب، تارینین سؤزونو هر یرده یایدیلار. رب اونلارلا ائدی و کلامی آرخادان گلن علامتلرله تصدئق ادئردی.