Leviticus 27

azerbaijan-2013

1گئنه رب موسایا دانیشیب ددی:

2«ائسرایئل اؤولادلاری ائله دانیشیب اونلارا دِه: ”ائنسانلاری ربّه تقدئم ادن آدام، نذرئنی بو دَیَرئنه گؤره وره بئلر:

3موقدّس مکانین شِکِلئنئن اؤلچوسونه گؤره، ائیئرمی یاشیندان آلتمیش یاشینا قدر کئشئنئن دَیَری، اَلّی شِکِل گوموشدور؛

4آروادین دَیَری اوتوز شِکِلدئر؛

5بش یاشیندان ائیئرمی یاشینا قدر اوغلانین دَیَری، ائیئرمی شِکِل، قیزین دا اون شِکِلدئر؛

6بئر آیدان بش یاشا قدر اولان اوغلانین دَیَری بش شِکِل گوموش؛ قیزین دَیَری ده اوچ شِکِل گوموشدور؛

7آلتمیش یاشیندان یوخاری اولان کئشئنئن دَیَری اون بش شِکِل، آروادین اون شِکِلدئر؛

8اگر نذرئنه عمل ادن آدام بله دَیَری ورمک اوچون چوخ کاسیبدیر، قوی تقدئم اتدئیی آدامی کاهئنئن قاباغینا گتئرسئن کی، کاهئن اونو قئیمتلَندئرسئن. نذرئنه عمل اده‌نئن گوجو نَیه چاتیر، کاهئن اونون قئیمتئنی تعیئن اتسئن.

9اگر بئر نفر ربّه قوربان گتئرئلَن حیوانلاردان بئرئنی تقدئم اتسه، بونلاردان ربّه ورئلَن هر بئری موقدّسدئر.

10او آدام حیوانی دَیئشدئرمه‌سئن. نه پئسی یاخشی ائله، نه یاخشیسینی پئس ائله عوض اتمه‌سئن. اگر او، حیوانین عوضئنه حیوانی دَیئشدئرئرسه، او و دَیئشدئرئلَن حیوان موقدّس ساییلسین.

11اگر ربّه قوربان گتئرمیه لایئق اولمایان هر هانسی نجئس حیوانلاردان بئرئنی تقدئم اتسه، قوی او حیوانی کاهئنئن یانینا گتئرسئن؛

12کاهئن اونو یاخشی، و یا پئس اولدوغونا گؤره قئیمتلَندئرسئن؛ اونون دَیَرئنی تعیئن ات و دَیَری او اولاجاقدیر.

13اگر حیوانی تقدئم ادن اونو گری آلماق ائسته‌سه، اوندا سنئن تعیئن اتدئیئن دَیَره بِشده بئری قدر علاوه ادئب ورسئن.

14بئر نفر اؤز اِوئنی موقدّس تقدئم کئمی ربّه وقف ادنده، کاهئن اِوی یاخشی و یا پئس اولدوغونا گؤره قئیمتلَندئرسئن. قئیمت کاهئنئن تعیئن اتدئیی کئمی قالسین.

15اگر او آدام اِوئنی گری آلماق ائسته‌سه، اونون قئیمتئنه بِشده بئرئنی علاوه ادئب ورسئن و اِو اونا قاییتسین.

16اگر بئر نفر مولکو اولان زمی ساحه‌سئنی ربّه وقف ادئر، اورادا اَکئلَن توخوم مئقدارینا گؤره، بئر حومِر آرپا اَکئلَن زمئنئن قئیمتی، اَلّی شِکِل گوموش اولسون.

17اگر او آدام زمئسئنی آزادلیق ائلئندن باشلاییب وقف ادئر، اونون دَیَری تامام قالسین.

18اگر زمئسئنی آزادلیق ائلئندن سونرا وقف ادئر، کاهئن اونونلا قئیمتئنی سونراکی آزادلیق ائلئنه قدر قالان مودّته گؤره حسابلاسین و دَیَری بله آشاغی سالینسین.

19اگر زمئنی وقف ادن آدام اونو گری آلماق ائسته‌سه، اونون قئیمتئنه بِشده بئرئنی علاوه ادئب ورسئن و زمی اونا قاییتسین.

20اگر زمئنی گری آلمادان آیری بئرئنه ساتسا، سونرا اونو هچ واخت گری آلا بئلمز.

21او زمی آزادلیق ائلئنده آزاد اولاندا، تقدئم اولونموش بئر زمی کئمی، رب اوچون وقف ادئلمئش ساییلسین؛ او، کاهئنئن مولکو اولسون.

22اگر بئر نفر اؤز مولکو اولمایاراق، ساتین آلدیغی بئر زمئنی ربّه وقف اتسه،

23قوی کاهئن اونون اوچون دَیَرئنی آزادلیق ائلئنه قدر حسابلاسین. او آدام همئن گون قئیمتی رب اوچون وقف ادئلمئش بئر شی کئمی ورسئن.

24آزادلیق ائلئنده همئن زمی ساتین آلیندیغی آداما کی، زمئنئن صاحئبی ائدی، قایتاریلسین.

25بوتون دَیَر موقدّس مکانداکی شِکِله گؤره ساییلسین. بو شِکِل ائیئرمی گِرایا برابردئر.

26حیوانلار آراسیندا ائلک دوغولان ربّه عاییددیر. هِچ کئم اونو وقف اتمه‌سئن. ائستر اؤکوز اولسون، ائستر قویون، اونلار ربّئندئر.

27اگر نجئس حیوانین بالاسی اولسا، اونو گتئرن آدام اونون دَیَرئنه بِشده بئرئنی علاوه ادئب گری آلا بئلر. اگر او گری آلینمیرسا، دَیَرئنه گؤره ساتیلسین.

28بئر نفرئن اؤز املاکیندان ائستر آدام، ائستر حیوان، ائستر مولکو اولان زمی ساحه‌سی، یعنی، ربّه همئشه‌لئک تقدئم اتدئیی هر بئر شی نه ساتیلسین، نه ده گری آلینسین. همئشه‌لئک تقدئم اولونموش هر شی رب اوچون لاپ موقدّسدئر.

29محو ادئلمیه وقف اولونموش هچ کسه عوض ورئله بئلمز، گرک اؤلدورولسون.

30تورپاغین محصولوندان، اونون وردئیی تاخیلدان و آغاجلارین میوه‌سئندن اوندا بئر حئصّه‌سی ربّه عاییددیر و رب اوچون وقف اولونوب.

31اگر بئر نفر اؤز اوندا بئر حئصّه‌سئنی گری آلماق ائسته‌سه، قوی قئیمتئنه بِشده بئرئنی علاوه ادئب ورسئن.

32بوتون رَمه‌نئن یا دا سورونون اوندا بئری اوچون، چوبان دَیَنَکئنئن آلتیندان کچن هر اونونجو حیوان، رب اوچون وقف اولونموش ساییلسین.

33حیوان صاحئبی حیوانلارا یاخشی و یا پئس فرق قویوب باخماسین؛ بئرئنی او بئری ائله دیئشدئرمه‌سئن. اگر او بله دیئشدئرسه، او و دیئشدئرئلن حیوان موقدّس ساییلیب گری آلینماز.“»

34بونلار، ربّئن موسایا، ائسرایئل اؤولادلاری اوچون، سئنا داغیندا وردئیی امرلردئر.