Joshua 5

azerbaijan-2013

1اوردون چایینین قرب طرفئنده اولان بوتون اِمورلولارین پادشاهلاری، و دهنز کناریندا یاشایان بوتون کَنَعان پادشاهلاری اشئتدئلر کی، رب ائسرایئل اؤولادلارینین قاباغیندا نجه اوردون سولارینی قوروتدو، اله کی، اونلار کچسئنلر. و اورَکلری قورخویا دوشدو. ائسرایئل اؤولادلارینین واهئمه‌سئندن اونلاردا طاقت قالمادی.

2او زامان رب یوشَعه ددی: «اؤزون اوچون چاخماق داشیندان بیچاقلار دوزَلت و ائسرایئل اؤولادلارینی قاباقکی دفه کئمی ختنه ات.»

3یوشَع اؤزو اوچون چاخماق داشیندان بیچاقلار دوزَ‌لدئب، گئبعَت‌‌حاعَراِلوتدا ائسرایئل اؤولادلارینی ختنه اتدی.

4یوشَعئن ختنه اتمه‌سئنئن سببی بودور: بوتون دؤیوش قابئلئیّتی اولان اِرکَکلر، مئصئردن چیخاندان سونرا یول بویو صحرادا اؤلدولر.

5اورادان چیخان خالقین هامیسی ختنه‌لی ائدی، آمّا مئصئردن چیخاندان سونرا یول بویو صحرادا دوغولانلارین هچ بئری ختنه اولونمامیشدی.

6ائسرایئل اؤولادلاری قیرخ ائل صحرادا گَزدئلر، اله کی، مئصئردن چیخان دؤیوش قابئلئیّتی اولان آداملارین هامیسی اؤلدولر. چونکی اونلار ربّئن سؤزونه قولاق آسمادیلار. رب آند ائچمئشدی کی، بئزه ورمک اوچون آتالاریمیزا آند ائچدئیی سود و بال آخان تورپاغی ائطاعت اتمه‌یَنلره گؤرسدمیه‌جک.

7بونون عوضئنه رب اونلارین اؤولادلارینی یتئشدئردی و یوشَع اونلاری ختنه اتدی. چونکی اونلار ختنه‌سئز ائدئلر و یولدا اونلاری هچ کئم ختنه اتمه‌مئشدی.

8بوتون ائسرایئللی‌لرئن ختنه اولونماسی قورتاردیقدان سونرا، اونلار صاغالانا قدر اوردوگاهدا اؤز یرلرئنده قالدیلار.

9سونرا رب یوشَعه ددی: «مئصئر روسوایچیلیغینی بو گون اوستونوزدن هِل‌له‌دئب آتدیم.» اونا گؤره ده بو گونه قدر او یرئن آدینا گئلگال دیئلئر.

10ائسرایئل اؤولادلاری گئلگالدا اوردوگاه قوردولار. آیین اون دؤردونجو گونو، آخشام واختی اَرئحا اوواسیندا پاسخا بایرامینی توتدولار.

11پاسخانین صاباحیسی، اِله همئن گون بو تورپاغین بَهره‌سئندن اولان مایاسیز چؤرک و قووورولموش باشاق یدئلر.

12اونلار او تورپاغین بَهره‌سئندن یِدئکلری گونون سحری مانّانین تؤکولمه‌سی کسئلدی. آرتیق ائسرایئل اؤولادلارینین مانّاسی یوخ ائدی و او ائل کَنَعان تورپاغینین محصوللاری ائله دولاندیلار.

13یوشَع اَرئحانین یاخینلیغیندا اولاندا، باشینی قالدیریب باخدی و اَلئنده سئیرئلمئش قیلینج اولان بئر شخص گؤردو کی، قاباغیندا دایانیب. یوشَع اونون یانینا گلئب اوندان سوروشدو: «سن بئزئم طرفئمئزدنسن، یوخسا دوشمنلرئمئز طرفئندن؟»

14او ددی: «خیر، من کی، ائندی گلمئشم، ربّئن قوشونونون باشچیسی‌یام.» یوشَع اوزو اوسته یره ییخیلدی و اونا سجده ادئب ددی: «آغامین بو قولونا نه سؤزو وار؟»

15ربّئن قوشونونون باشچیسی یوشَعه ددی: «چاریغینی آیاغیندان چیخارت، چونکی اوستونده دوردوغون یر موقدّسدئر.» و یوشَع بله اتدی.

← Chapter 4 Chapter 6 →