Job 4

azerbaijan-2013

1او زامان تِیمانلی اِلئفَز جاواب ورئب ددی:

2«اگر بئری سنه بئر سؤز دِسه، ائنجه‌‌یَرسن؟ آمّا کئم اؤزونو دانیشماقدان ساخلایا بئلر؟

3باخ، سن چوخ آداملارا درس ورئبسن؛ ضعئف اَللره قووّت ورئبسن.

4سؤزلرئن ییخیلانی قالدیریب، اَسن دئزلری مؤحکمله‌دئبسن.

5آمّا ائندی کی، سنئن اؤز باشینا گلئر، تابدان دوشوبسن، سنه توخونوب، اؤزونو ائتئرئبسن.

6مگر سنئن بل باغلادیغین، تاریدان قورخدوغون دیئل؟ مگر اومئد باغلادیغین، اؤز یوللارینین کامالی دیئل؟

7دوشون بئر آز: تقصئرسئز آدام مگر اولوب هلاک اولسون؟ هارادا دوز آداملار یوخ اولوبلار؟

8منئم گؤردویومه گؤره، پئسلئیی شوخوملایانلار، زحمت توخومو سَپَنلر، اونو دا بئچَرلر.

9اونلار تارینین نفسی ائله یوخ اولورلار، و قضبئنئن آلووو اونلاری اودور.

10شئرئن نَرئلتئسی، آصلانین سَسی، جاوان شئرلرئن دئشلری کَسئلئر.

11گوجلو آصلان، شئکاری اولمادیغی اوچون، هلاک اولور، دئشی شئرئن بالالاری دا داغیلیر.

12منه گئزلئجه بئر سؤز گلدی، اوندان قولاغیم بئر پیچیلتی اشئتدی.

13گجه رؤیالاریندان دوغان فئکئرلر ائچئنده، ائنسانلاری آغیر یوخو باسان زامان،

14اوستومه قورخو و تئتره‌مه گلدی، بوتون سوموکلرئمی لرزه‌یه سالدی.

15اوزومون قاباغیندان بئر روح کچدی، بدنئمئن توکلری بئز-بئز دوردو.

16او روح دوردو، لاکئن من گؤرونوشونو سِچه بئلمه‌دئم. گؤزلرئمئن قاباغیندا بئر شکئل وار ائدی؛ هر شی ساکئت ائدی، سونرا بئر سَس اشئتدئم:

17مگر ائنسان تارینین حوضوروندا صالح اولا بئلر؟ مگر ائنسان خالئقئنئن حوضوروندا طاهئر اولا بئلر؟

18باخ، او حتّا اؤز قوللارینا دا اعتئماد اتمَز، ملکلرئنده ده تقصئر تاپار.

19بس گؤر نه قدر چوخ، پالچیق اِولرده یاشایانلاردا! اونلاردا کی، بونؤوره‌لری تورپاقدادیر، اونلار کی، گووه‌دن تِز اَزئلئرلر.

20سحرله آخشام آراسیندا محو اولورلار، کئمسه فرقئنی ورمه‌دن یوخ اولورلار.

21مگر چادیرلارینین ائپلری ائچلرئنده قوپاریلماییب؟ اؤلورلر، لاکئن حئکمتسئز.

← Chapter 3 Chapter 5 →