Job 16

azerbaijan-2013

1او زامان اَیّوب جاواب ورئب ددی:

2«بله شیلردن چوخ اشئتمئشم؛ هامینیز بدبخت تسلّی ورنلرسئنئز.

3آیا هاوایی سؤزلرئن آخیری یوخ؟ سئزی نه شی جاواب ورمه‌یه مجبور ادئر؟

4سئزئن یِرئنئزده اولسایدیم، من ده اله دانیشا بئلردئم. ضئدّئنئزه سؤزلر دوزوب باشیمی دا سئزه تَرپه‌ده بئلردئم.

5آغزیم اورَکلَندئرئجی سؤزلر دئیردی، و دوداقلاریمدان تؤکولَن تسلّی دردئنئزی آزالدا بئلردی.

6دانیشسام بله، دردئم آزالماز، دانیشماسام دا، اوندان نه اَسکئلر؟

7آمّا ائندی تاری منی طاقتدن سالیب؛ بوتون منئمله اولانلاری دارماداغین ادئب.

8منی باغلاییبسان و او منه شاهئد اولوب؛ ضعئفلئیئم ده اوزومه قالخیب ضئدّئمه شهادت ورئر.

9قضبی ائله منی ییرتیب، یره چیرپیب، دئشلرئنی منه قیجیردیب؛ دوشمنئم گؤزونو منه دئکئبدئر.

10آغیزلارینی اوستومه بوزوبلر، یاناغیما حقارتله ووروبلار؛ ضئدّئمه بئربئرلری ائله بئرله‌شئبلر.

11تاری منی ائنصافسیزلارین اَلئنه ورئب؛ شر آداملارین اَلئنه سالیب.

12راحات یاشاییردیم، لاکئن منی پرئشان اتدی، بوینومدان توتوب منی پارچالادی. منی اؤزونه هدف قویدو.

13اوخچولاری اطرافیمی آلیرلار، آمان ورمه‌دن بؤیره‌کلرئمی دِشئر؛ صَفرامی یره تؤکور.

14بدنئمده یارا اوستوندن یارا وورور؛ جنگاور کئمی اوستومه یوگورور.

15دَرئمئن اوستونه چول تئکمئشم، ذئلّت تورپاغینا اوتورموشام.

16آغلاماقدان اوزوم قیزاریر، کئرپئکلرئمئن اوستونه ظولمت دوشوب؛

17اَللرئمده ظالئملئک یوخ ائکَن، دوعام خالئص اولدوغو حالدا.

18ای تورپاق، قانیمین اوستونو اؤرتمه، فریادیمی هچ یر ساخلاماسین.

19لاپ ائندئدن، باخ، شاهئدئم گؤیلرده‌دئر. مندن دئفاع ادن اوجالاردادیر.

20دوستلاریم منی اَله سالیرلار، گؤزلرئم تارییا باخیب آغلاییر.

21ائنسان قونشوسو اوچون یالواردیغی کئمی، بئری ده من ائنساندان اؤتری قوی تارییا یالوارسین.

22چونکی بئر نچه ائل کِچَندن سونرا، قاییداجاغی اولمایان یولا گده‌جیم.

← Chapter 15 Chapter 17 →