Ezekiel 38

azerbaijan-2013

1منه ربّئن بو سؤزو نازئل اولدو:

2«ای بشر اوغلو، ماگوگ اؤلکه‌سئندن اولان مِشِکئن و توبالین باش رهبری گوگا اوز توت و اونون ضئدّئنه نبئلئک ادئب دِه کی،

3پروردئگار رب بله دیئر: ”ای مِشِکئن و توبالین باش رهبری گوگ، من سنئن ضئدّئنه‌یَم.

4سنی گری قایتاراجاغام، چنه‌لرئنه چنگل‌لر تاخاجاغام. سنی، بوتون قوشونو، آتلاری، بوتون تجهئز اولونموش آتلی‌لاری، سئپر، قالخان و قیلینجلا سئلاحلانمیش بؤیوک قوشونو قوووب چیخارداجاغام.

5اونلارلا بئرلئکده قالخان و دَبئلقه‌یه بورونموش فارسلاری، کوشلولاری، پوطلولاری،

6گومِری و اونون بوتون قوشونلارینی، اوزاق شئمالدان بِیت توگَرمانی و اونون بوتون قوشونلارینی، بونلارلا بئرلئکده بئر چوخ خالقلاری قوووب چیخارداجاغام.

7حاضیر اول! اطرافیندا ییغیلمیش او بؤیوک قوشونلا بئرلئکده حاضیرلاش. اونلارا سن ریئس اولاجاقسان.

8اوزون مودّتدن سونرا دؤیوشه چاغیریلاجاقسان. گله‌جک ائل‌لرده قیلینجدان قورتولوب راحاتلانان اؤلکه‌یه هوجوم اده‌جکسن. او اؤلکه‌نئن ساکئنلری چوخلو خالقلارین ائچئندن ائسرایئل داغلارینا ییغیلیبلار. بو داغلار همئشه خارابالیق ائدی، آمّا اونلارین ساکئنلری خالقلار آراسیندان گری قایتاریلیبلار و هامیسی آسایئش ائچئنده یاشاییرلار.

9سن، بوتون قوشونون و سنئنله بئرلئکده بئر چوخ خالق چیخیب طوفان کئمی گله‌جکسئنئز، اؤلکه‌نئن اوستونو توتان بولودا بَنزه‌یه‌جکسئنئز.“

10پروردئگار رب بله دیئر: ”او گون آغلینا بعضی دوشونجه‌لر گله‌جک، پئس بئر نئیّت قوروب

11دئیه‌جکسن: دووارسیز کَندلری اولان او اؤلکه‌یه هوجوم اده‌جیم. آسایئش و آراملیق ائچئنده یاشایان آداملارین اوستونه گده‌جیم. بو کَندلرئن هامیسی دووارسیزدیر، دروازالاری دا، سورگولری ده یوخدور.

12وئران اولموش شهرلرده یاشایان خالقی قارت ادئب مالینی تالان اده‌جیم. سوروسو و مالی اولان، دونیانین اورتاسیندا یاشایان بو مئلّتلرئن آراسیندان ییغیلمیش خالقین ضئدّئنه اَلئنی اوزاداجاقسان.

13شِبا و دِدان اهالئسی، تَرشئش تاجئرلری، و بوتون کَندلرئنئن اهالئسی سنه دئیه‌جکلر: قارت اوچون گلئبسن؟ تالان اتمک، قیزیل-گوموش گؤتورمک، مال-حیوان و اشیا آپارماق، بول قنئمت اَله کچئرتمک اوچوندور کی، قوشون ییغیبسان؟“

14بونا گؤره ده، ای بشر اوغلو، نبئلئک ادئب گوگا دِه کی، پروردئگار رب بله دیئر: ”او گون خالقیم ائسرایئل آسایئش ائچئنده یاشایاندا بونو مگر درک اتمیه‌جکسن؟

15سن و سنئنله بئرلئکده بئر چوخ خالقلاردان اولان و هامیسی آتا مئنمئش بؤیوک بئر قوشون، گوجلو بئر قوشون اؤز یِرئندن، اوزاق شئمالدان گله‌جکسئنئز.

16اؤلکه‌نی بورویَن بئر بولود کئمی خالقیم ائسرایئلئن اوستونه هوجوم اده‌جکسئنئز. ای گوگ، گله‌جکده سنی اؤز اؤلکه‌مئن اوستونه گتئره‌جیم کی، گؤزلری قاباغیندا موقدّسلئیئمی سنئن واسئطَنله گؤرستدئیئم زامان مئلّتلر منی تانییا بئلسئن.“

17پروردئگار رب بله دیئر: ”مگر سن او آدام دیئلسن کی، قدئم زامانلاردا ائسرایئل پیغمبرلری واسئطه‌سی‌ائله اونون حاقّیندا دانیشدیم؟ سنی اونلارین اوستونه گتئره‌جیئم باره‌ده بو پیغمبرلر او واخت ائللر نبئلئک اتدئلر.

18او گون، گوگ ائسرایئل تورپاغینا هوجوم اتدئیی گون، قضبئم آلوولاناجاق.“ پروردئگار رب دیئر.

19”قیرتئمله و شئدّتلی قضبئمله دِیئرم کی، او گون ائسرایئل تورپاغیندا قطعن بؤیوک بئر زلزله اولاجاق.

20دهنزده‌کی بالیقلار، گؤیده‌کی قوشلار، چؤلده‌کی حیوانلار، یرده سورونن بوتون جانلی‌لار و یِر اوزونده‌کی بوتون ائنسانلار حوضورومدا تئتره‌یه‌جکلر. داغلار یِرله بئر اولاجاق، قایالیقلار اوچاجاق، بوتون دووارلار ییخیلاجاق.

21بوتون داغلاریمدا گوگون اوستونه گتمه‌یه بئر قیلینج چاغیراجاغام.“ پروردئگار رب بویورور، ”هر کس قارداشینین اوستونه قیلینج چکه‌جک.

22اوستونه وبا گتئرئب قانینی تؤکه‌رک اونو موحاکئمه اده‌جیم. اونون، قوشونلارینین و یانیندا گلن چوخلو خالقلارین اوستونه لِیسان یاغیشی، ائری دولو دنه‌لری، اود و گوگورد یاغدیراجاغام.

23بله‌جه عظمتئمی و موقدّسلئیئمی گؤرسه‌دئب، بئر چوخ مئلّتلرئن گؤزو قاباغیندا اؤزومو تانیداجاغام. او واخت بئله‌جکلر کی، رب منم.“

← Chapter 37 Chapter 39 →