2 Samuel 22 — azerbaijan-2013

1رب داوودو بوتون دوشمنلرئنئن و شاعولون اَلئندن قورتاراندا، داوود بو نغمه‌نئن سؤزلرئنی ربّه ددی؛

2او بله اوخودو: «منئم قایام، منئم قالام، منئم قورتاریجیم ربدئر.

3تاریم قایامدیر، اونا پناه آپاریرام، اودور قالخانیم، گوجلو خئلاصکاریم، بورجوم، سیغیناجاق یِرئم. خئلاصکاریم؛ سن منی قدّارلیق اَلئندن قورتاریرسان!

4حمدلره لایئق اولان ربّی چاغیریرام، دوشمنلرئمدن خئلاص اولورام.

5اؤلوم شپه‌لری اطرافیما دولاشدی، هلاکت سل‌لری منی قورخوتدو.

6اؤلولر دئیارینین ائپلری اطرافیما ساریلدی، اؤلوم تله‌لری قاباغیما چیخدی.

7سیخینتیم ائچئنده ربّی چاغیردیم، تاریما یالواردیم. او، معبدئندن سَسئمی اشئتدی، کؤمک ائسته‌ین فریادیم اونون قولاغینا یتئشدی.

8او زامان یر لرزه‌یه دوشدو، تئتره‌دی، گؤیلر پایالاریندان اسئردئلر، تئتره‌یئردئلر، چونکی او قضبلَنمئشدی.

9اونون بورنوندان دومان قالخدی، آغزیندان یاندیریب یاخان اود چیخدی، کؤز کؤمورلر اوندان توتوشدولار.

10رب، گؤیلری یاریب اِندی. قارا بولودلار اونون آیاقلاری آلتیندا ائدئلر.

11رب کَرّوبا مئنئب اوچدو، یِل قانادلاری اوستونده گؤروندو.

12اطرافینی ظولمته بورودو، سولارین ییغینینی، گؤیون قارا بولودلارینی.

13اونون پاریلدایان حوضوروندان اودلو کؤزلر دوشوب آلوولاندی.

14رب گؤیدن گورلادی، اوجالاردا اولانین سَسی سَسلَندی.

15اوخلارینی آتیب اونلاری داغیتدی، شئمشه‌یئنی چاخدیریب اونلاری سَرسَم اتدی.

16ربّئن تَنبِهئندن، بورنونون نفسئنئن ووروشوندان، دهنزلرئن دئبی گؤروندو، دونیانین بونؤوره‌لری آچیلدی.

17رب اوجالاردان اَلئنی اوزادیب منی توتدو، منی او درئن سولاردان چیخارتدی.

18قودرتلی دوشمنئمدن منی قورتاردی؛ مندن نئفرت ادنلردن کی، اونلارا گوجوم چاتمیردی.

19بلالی گونومده ضئدّئمه قالخدیلار، لاکئن رب منه دایاق اولدو.

20منی گِنئشلئیه چیخاردیب قورتاردی، چونکی مندن خوشلاندی.

21رب صالحلئیئمه گؤره اجرئمی ورئب، اَل‌لرئمئن پاکلیغینین موطابئقئنده منه عوض ورئب.

22چونکی ربّئن یوللارینی توتموشام، تاریما عوصیان اتمه‌مئشم.

23اونون هامی حؤکملرئنی قاباغیما قویموشام، اونون امرلرئنئن ائطاعتئندن چیخمامیشام.

24اونون گؤزونون قاباغیندا کاماللا یاشامیشام، اؤزومو تقصئردن ساخلامیشام.

25رب صالحلئیئمه گؤره، گؤزونون قاباغیندا تمئزلئیئمئن موطابئقئنده منه عوض ورئب.

26سنه وفالی قالانا، اؤزونو وفالی گؤرسدئرسن، کاماللا یاشایان آداما، اؤزونو کامئل گؤرسدئرسن.

27پاک آداما اؤزونو پاک گؤرسدئرسن، لاکئن اَیری آدامین قاباغینی آلیرسان.

28فاغیر آداملارا نئجات ورئرسن، لووغالارا گؤز قویورسان، اونلاری آلچالدیرسان.

29یارب، سن منئم چیراغیمسان، قارانلیغیمی ائشیغا دؤندَ‌رَن، رب تاریمدیر.

30سنئنله بئر قوشونو اَزه‌رم، تاریملا دووار اوستوندن اوچارام.

31تارینین یولو کامئلدئر، ربّئن سؤزو خالئصدئر، رب اونا پناه گتئرن هرکسه قالخاندیر.

32ربدن باشقا تاری کئمدئر؟ بئزئم تاریدان ساوایی قایا کئمدئر؟

33تاری قالامدیر، منئم یولومو او، کامئل ادئر.

34آیاقلاریمی مارال آیاقلاری کئمی ادئر، اوجا یرلرده منی برک دوردورور.

35اَللرئمه دؤیوشمک اوچون تعلئم ورئر، قوللاریم بورونج کامانی دا اَیئر.

36سن منه نئجاتینین قالخانینی ورئبسن، عئنایتئن منی بؤیوک ادئب.

37آتدیغیم قدملرئن یرئنی گِنئشلَتدئن کی، آیاقلاریم سوروشمه‌سئن.

38دوشمنلرئمی قووالادیم، اونلاری قیردیم، اونلار محو اولاناجاق، گری قاییتمادیم.

39اونلاری اَزئب قورتاردیم، اله کی، قالخا بئلمه‌دئلر، اونلار آیاقلاریمین آلتینا دوشدولر.

40موحارئبه اوچون منی قووّته سئلاحلاندیران سنسن؛ منه ضئدّ اولانلاری آیاغیمین آلتینا سالدین،

41دوشمنلرئمئن آرخاسینی منه دؤندَ‌ردئن، مندن نئفرت ادنلری محو اتدئم.

42کؤمک اوچون باغیردیلار، لاکئن اونلارین دادینا یِتئشَن هچ کس یوخ ائدی، ربّی چاغیردیلار، لاکئن اونلارا جاواب ورمه‌دی.

43سونرا اونلاری یرده‌کی توز کئمی داغیتدیم، کوچه‌لرئن پالچیغی کئمی تاپدالادیم.

44خالقیمین چکئشمه‌سئندن منی قورتاریبسان، مئلّتلره منی ریئس قویوبسان، اله کی، تانیمادیغیم خالق دا منه قوللوق ادئر.

45یاداِللی‌لر منه بویون اَیئرلر. سَسئمی اشئدنده مندن ائطاعت ادئرلر.

46اورَکلری اوزولور، قالالاریندان تئتره‌یه-تئتره‌یه اشئیه چیخیرلار.

47رب دئری‌دئر، منئم قایاما حمد اولسون! قورتولوش قایام، منئم تاریم اوجالسین!

48ائنتئقامیمی آلان تاری‌دیر، خالقلاری منه موطئع ادن، اودور.

49او منی دوشمن ائچئندن چیخاردیر، ضئدّئمه قالخانلاردان منی چوخ اوجالدیبسان، قدّار آدامدان منی خئلاص ادئبسن.

50اونا گؤره ده، یارب، مئلّتلر آراسیندا سنه شوکور ادئرم، سنئن آدینا پرستئش نغمه‌لری اوخویاجاغام.

51رب پادشاهینا بؤیوک ظفرلر ورئر، مسح اتدئیئنه سِوگی گؤرسدئر. داوودا و اونون نسلئنه، ابده کئمی.»