2 Chronicles 6

azerbaijan-2013

1او زامان سولیمان ددی: «رب بویوروب کی، قالین قارانلیقدا ساکئن اولاجاق.

2من سنئن اوچون اوجا بئر معبد تئکمئشم کی، سنئن ابدی یاشایاجاغین یر اولسون.»

3پادشاه دؤنوب بوتون ائسرایئل جاماعاتینا برکت وردی. بو زامان بوتون ائسرایئل جاماعاتی آیاق اوسته دورموشدو.

4پادشاه ددی: «ائسرایئلئن تاریسی رب موبارک اولسون کی، آتام داوودا اؤز آغزی ائله دانیشدی و اؤز اَلی ائله اونو یرئنه یتئرئب. او دمئشدی:

5”من خالقیمی مئصئر تورپاغیندان چیخارتدیغیم گوندن بَری، ائسرایئلئن هچ بئر قبئله‌سئندن بئر شهر سچمه‌دئم کی، اورادا بئر معبد تئکئم و آدیم اوستونده اولسون. بئر آدام دا سچمه‌دئم کی، خالقیم ائسرایئل اوستونده حؤکمدار اولسون.

6لاکئن اورشلئمی سچمئشم کی، آدیم اورادا اولسون. داوودو دا سچمئشم کی، خالقیم ائسرایئل اوستونده حؤکمدار اولسون.“

7آتام داوودون اوره‌یئنده آرزو وار ائدی کی، ائسرایئلئن تاریسی ربّئن آدینا بئر معبد تئکسئن.

8لاکئن رب آتام داوودا ددی: ”سن یاخشی ادئبسن کی، منئم آدیما بئر معبد تئکمک نئیّتئنه دوشوبسن.

9لاکئن معبدی سن تئکمیه‌جکسن، سنئن بِلئندن گلن اوغلون منئم آدیما معبد تئکه‌جک.“

10رب ددئیی سؤزونو یرئنه یتئردی: چونکی من آتام داوودون یرئنه قالخمیشام، ربّئن ددئیی کئمی ائسرایئل تختئنده اوتورموشام و ائسرایئلئن تاریسی ربّئن آدینا معبد تئکمئشم.

11صاندیغی اورایا قویموشام. ربّئن ائسرایئل اؤولادلاری ائله باغلادیغی عهد اونون ائچئنده‌دئر.»

12سولیمان ربّئن قوربانگاهی قاباغیندا، بوتون ائسرایئل جاماعاتینین قاباغیندا دوروب اَللرئنی گؤیلره آچدی.

13او، بورونجدن بئر کورسو دوزَلتمئشدی کی، اوزونلوغو ائله اِنی بش قول‌آچ ، بویو دا اوچ قول‌آچ ائدی و اونو حَیَطئن اورتاسینا قویموشدو. سولیمان اونون اوستونده دوردو. بوتون ائسرایئل جاماعاتی قاباغیندا دئزه دوشوب اَللرئنی گؤیه آچدی.

14سولیمان ددی: «یارب، ائسرایئلئن تاریسی! نه گؤیده، نه ده یرده سنئن کئمی تاری وار. سن عهدئنی و محبّتئنی بوتون او قوللارینلا ساخلاییرسان کی، بوتون اورَکلری ائله سنئن حوضوروندا یاشاییرلار.

15سن قولون آتام داوودا وردئیئن وعده‌یه عمل ادئبسن؛ اؤز دئلئنله ددئیئنی، بو گون اؤز اَلئنله یرئنه یتئرئبسن.

16ائندی، یارب ائسرایئلئن تاریسی، قولون آتام داوودا ددئیئن سؤزه عمل ات. وعده ورئب دِمئشدئن کی: ”سن یولوملا گتدئیئن کئمی، اوغوللارین دا اگر قانونوما موطابئق عمل ادئب اؤز یوللارینا دئقّت اده‌لر، ائسرایئل تختئنده سنئن نسلئندن بئر کئشی اَسکئک اولمایاجاق.“

17ائندی ای ائسرایئلئن تاریسی رب، قوی قولون آتام داوودا ددئیئن سؤزلر تصدئق اولونسون!

18لاکئن، مگر تاری حقئقتن یرده، ائنسانلارین یانیندا ساکئن اولار؟ باخ، سن گؤیه و گؤیلرئن گؤیونه سیغمازسان، نه قدر آز منئم تئکدئیئم بو معبده!

19لاکئن سن بو قولونون دوعاسینا و یالواریشینا نظر سال، یارب تاریم، سنئن حوضوروندا اتدئیی فریادی و دوعانی اشئت.

20قوی سنئن نظرئن گجه-گوندوز بو معبدئن اوستونده اولسون. بو یِر باره‌ده سن دیئبسن کی، آدینی اورادا قویورسان. قولونون بورایا اوز توتوب اتدئیی دوعانی اشئت.

21بو یره طرف دوعالار اتدئکلری واخت، اؤز قولونون و خالقین ائسرایئلئن یالواریشلارینی سن اشئت، گؤیلرده اولان مسکنئندن اشئت؛ اشئت و باغیشلا!

22اگر بئر آدام اؤز یاخینینین ضئدّئنه گوناه اتسه و اوندان آند ائچمک طلب اولونسا، او دا گلئب بو معبدده، سنئن قوربانگاهین قاباغیندا آند ائچسه،

23او واخت سن گؤیدن اشئت و عمل ات. قوللارینا حؤکم ات: شرور آدامین عملئنی اؤز باشینا دؤندَ‌رئب اونو محکوم ات و صالح آداما صالحلئیئنه گؤره برائت ور.

24اگر خالقین ائسرایئل سنئن ضئدّئنه گوناه اتدئیی اوچون دوشمن قاباغیندا مغلوب اولسا و اونلار تکرار سنه طرف دؤنوب آدینی دئل‌لرئنه گتئرسه‌لر و بو معبدده سنه یالواریب فریاد اتسه‌لر،

25او واخت سن گؤیدن اشئت و خالقین ائسرایئلئن گوناهینی باغیشلا، اونلاری گئنه اونلارا و آتالارینا وردئیئن تورپاغا قایتار.

26اگر خالقین سنئن ضئدّئنه گوناه اتدئیی اوچون گؤی باغلانیب یاغیش یاغماسا، اگر بو یِره طرف دوعا ادئب آدینی دئل‌لرئنه گتئرسه‌لر و اونلاری ذلئل اتدئیئن زامان اؤز گوناهلاریندان دؤنسه‌لر،

27او واخت سن گؤیدن اشئت، قوللارینین و خالقین ائسرایئلئن گوناهینی باغیشلا؛ و گده‌جکلری یاخشی یولو اونلارا اؤیرَت. خالقینا ائرث وردئیئن تورپاغینا دا یاغیش گؤندَر.

28اگر اؤلکه‌ده آجلیق اولسا، وبا اولسا، ائستی یِل، کوف، چَیئرتکه یا دا بئتکی قوردو اولسا، اگر دوشمن اونلاری اؤلکه‌نئن هر هانسی بئر شهرئنده موحاصئره‌یه آلسا؛ هانسی بلا، هانسی ناخوشلوق اولور، اولسون -

29هر کَسئن طرفئندن، یا دا بوتون خالقین ائسرایئل طرفئندن بئر دوعا و یالواریش اولسا، هر کس اؤز ذلئل‌لئیئنی و دردئنی بئلئب بو معبده طرف اَللرئنی آچسا،

30او واخت سن گؤیدن، اؤز مسکنئندن اشئت و باغیشلا. اوره‌یئنی بئلدئیئن هر آداما، بوتون عمل‌لرئنه گؤره عوض ور، چونکی ائنسان اورَکلرئنی فقط سن بئلئرسن.

31اله کی اونلار سندن قورخسونلار و آتالاریمیزا وردئیئن تورپاقدا یاشادیقلاری بوتون گونلر بویو، سنئن یولونلا گتسئنلر.

32اگر خالقین ائسرایئلدن اولمایان یاداِللی ده اوزاق اؤلکه‌دن سنئن آدینین خاطئرئنه گلسه، سنئن بؤیوک آدین، قودرتلی اَلئن و اوزانان قولون باره‌ده اشئدئب بو معبده طرف دوعا اتسه،

33او واخت سن گؤیدن، اؤز مسکنئندن اشئت و یاد اِللی‌نئن سنه فریاد اتدئیی هر شیی ات کی، یر اوزونون بوتون خالقلاری دا سنئن آدینی تانیسینلار، خالقین ائسرایئل کئمی سندن قورخسونلار و بئلسئنلر کی، تئکدئیئم بو معبد سنئن آدینلا چاغیریلیر.

34اگر خالقین گؤندَ‌ردئیئن یوللا دوشمنلرئنئن ضئدّئنه موحارئبه‌یه چیخسا و سنئن سِچدئیئن بو شهره طرف، سنئن آدینا تئکدئیئم معبده طرف سنه دوعا اتسه،

35سن گؤیدن اونلارین دوعاسینی و یالواریشینی اشئت، اونلاردان حئمایت ات.

36اگر اونلار سنئن ضئدّئنه گوناه اتسه‌لر-چونکی گوناه اتمه‌یَن ائنسان یوخدور-و سن قضبله‌نئب اونلاری دوشمنه تسلئم اده‌سن و دوشمن اونلاری اسئر ادئب یاخین یا دا اوزاق تورپاغینا آپارسا،

37اگر اونلار اسئرلئکده اولدوقلاری اؤلکه‌ده اورَکلرئنی دؤندَ‌رئب تؤوبه اتسه‌لر و اسئر اولان اؤلکه‌ده سنه دوعا ادئب ”بئز گوناه و حاقسیزلیق اتمئشئک، پئسلئک اتمئشئک“ دِسه‌لر،

38اگر اونلارین اسئر اولونوب آپاریلدیغی اؤلکه‌ده، بوتون اورَکلری و جانلاری ائله، سنه طرف دؤنسه‌لر، آتالارینا وردئیئن تورپاغا، سچدئیئن شهره و آدینا تئکدئیئم معبده طرف سنه دوعا اتسه‌لر،

39او واخت سن گؤیدن، اؤز مسکنئندن اونلارین دوعا و یالواریشلارینی اشئت و اونلاردان حئمایت ات و سنئن ضئدّئنه گوناه ادن خالقینی باغیشلا.

40ائندی، ای تاریم، سنه یالواریرام، بو یرده ادئلَن دوعانی گؤزلرئن گؤرسون و قولاقلارین اشئتسئن.

41ائندی یارب تاری، چیخ یاشایاجاغین یره! سن و قووّتئنئن مظهری اولان ساندیغینلا بئرلئکده؛ یارب تاری، قوی کاهئنلرئن نئجاتلا اَحاطه اولونسون، موتّقی‌لرئن سنئن یاخشیلیغیندا سِوئنسئن.

42یارب تاری، مسح اتدئیئندن اوز دؤندَرمه، قولون داوودا گؤرستدئیئن محبّتئنی یادا سال.»

← Chapter 5 Chapter 7 →