1 Samuel 5

azerbaijan-2013

1فئلئسطلی‌لر تارینین ساندیغینی اَله کچئردئب اِبِنعِزِردن اَشدودا آپاردیلار.

2تارینین ساندیغینی داگونون معبدئنه گتئرئب داگونون هیکلئنئن یانینا قویدولار.

3او گونون صاباحی اَشدودلولار اِرکَن دوراندا گؤردولر کی، داگون ربّئن ساندیغینین قاباغیندا اوزو اوسته یره دوشوب. اونلار داگونو گؤتوروب اؤز یرئنه قویدولار.

4آمّا صاباحیسی گون سحر اِرکَن دوردوقلاری واخت گؤردولر کی، داگون گئنه ربّئن ساندیغینین قاباغیندا اوزو اوسته یره دوشوبدور. بو دفه داگونون باشی ائله ائکی اَلی قیریلیب، قاپی آغزینا دوشموش و فقط بدنی قالمیشدی.

5بونا گؤره بو گونه قدر اَشدودداکی داگون معبدئنه گلنلر ده بو معبدئن قاپیسی آغزینا آیاق باسمیرلار.

6ربّئن اَلی اَشدودلولارین اوستونده آغیرلاشدی. اونلارا و اطرافینداکی جاماعاتا بلا ورئب بدنلرئنه شئشلر چیخارتدی.

7اَشدودلولار وضعئیّتئن بله اولدوغونو گؤرنده ددئلر: «ائسرایئل تاریسینین ساندیغی بئزئم یانیمیزدا گرک قالماسین، چونکی اونون اَلی بئزی و آللاهیمیز داگونو آغیر بئر شَکئلده ذلئل ادئر.»

8اونا گؤره ده هر طرفه قاصئدلر گؤندَردئلر و بوتون فئلئسطلی‌لرئن آغالارینی یانلارینا ییغیب سوروشدولار: «ائسرایئل تاریسینین ساندیغینی نه اِدَک؟» فئلئسطلی‌لرئن آغالاری ددئلر: «ائسرایئل تاریسینین ساندیغی گَته آپاریلسین.» بله‌جه، ائسرایئل تاریسینین ساندیغینی گَته آپاردیلار.

9اونلار ساندیغی گَته گتئرندن سونرا، ربّئن اَلی بو شهرئن اوستونده ده آغیرلاشدی. شهری دهشتلی بئر قورخو بورودو. شهر ساکئنلرئنئن هامیسینی بؤیوکدن کئچئیه قدر ووردو. اونلارین دا بدنلرئنه شئش چیخدی.

10بو حادئثه‌دن سونرا تارینین ساندیغینی عِقرونا گؤندَردئلر. تارینین ساندیغی عِقرونا چاتاندا، عِقرونلولار فریاد ادئب ددئلر: «ائسرایئلئن تاریسینین ساندیغینی بورایا گتئرئبلر کی، هم بئزی هم ده خالقیمیزی اؤلدورسونلر!»

11اونا گؤره ده هر طرفه قاصئدلر گؤندَردئلر و بوتون فئلئسطلی‌لرئن آغالارینی یانلارینا ییغیب ددئلر: «ائسرایئل تاریسینین ساندیغینی اؤز یرئنه گری گؤندَ‌رئن اِله کی، بئزی و خالقیمیزی قیرماسین.» چونکی بوتون شهری اؤلوم واهئمه‌سی بوروموشدو و تارینین اَلی اورا اوچون ده چوخ آغیر اولموشدو.

12صاغ قالانلارین دا بدنلرئنه شئش چیخدی و شهرئن فریادی عرشه قالخدی.

← Chapter 4 Chapter 6 →