Psalms 149

Ayamar Bible (Qullan Arunaca)

1¡Tatitojj jach'ar aptatäpan! Tatiturojj machak k'och k'ochupjjam, iyawsirinacap taypin jach'añchapjjam.

2Israel marcajj utjayiripat cusispan, Sión marcan wawanacapajj Reyipat cusisipjjpan.

3Thokoñanacamp sutiparojj jach'añchapjjam, arpanacampi, chhulluchhullunacamp k'ochupjjam.

4Tatitojj marcaparojj munasiwa, llamp'u chuyman jakenacarojj atipt'ayiwa.

5Asqui jakenacajj jach'a cancañapar uruyapjjpan, iccasas cusisiñat k'ochupjjpan.

6Lacanacapan Diosar jach'añchañajj utjpan, amparanacapansti purapar arin espada ayt'atäpjjpan;

7Diosar jan uñt'ir marcanacar uqhämat uqhäm apsusiñataqui, jach'a marcanacar mutuyañataqui,

8reyinacar ñach'antañataqui, munañaninacarusti cadenanacamp ñach'antañataqui.

9Tatitun arsutapajj jupanacamp phokhasiñapataqui. ¡Ucajj takpach iyawsirinacapar jach'ar aptirïniwa! ¡Tatitojj jach'añchatäpan!

← Chapter 148 Chapter 150 →