Psalms 102

Ayamar Bible (Qullan Arunaca)

1Tatay, mayisitajjarojj ist'aquimaya, ¡arnakasitajjajj jac'amcam purinicpanaya!

2Janiquiy llaqui urun nayatac maysa uñtamti. Naya tokeruy jinchum alcatanim; art'asinsma ucapachajj ist'aquitaya.

3Jacañajjajj jewk'er uñtataw tucusisqui, ch'aqhanacajjasti nina sanc'jamaw naqhantasqui;

4chuymajjajj aynacht'atawa, korar uñtataw wañsusqui; ¡janiw mank'as munasquituti!

5Jachcäw sarnakcatajj ch'aqhanacaruw janchejj lip'catjjetu.

6Wasaranquir pelícano jamach'ir uñtatätwa, lakayanacan jaquir jucu jamach'jamätwa;

7janiw iquis purquituti, uta patjjanquir saparst'at jamach'jamätwa.

8Timasirinacajjajj jan inact'asaw tokepjjetu; naya contra k'apisisaw ñankhachapjjetu.

9T'ant'a lantejj khellac mank'ta, umañajjasti jachampiw quituntasi,

10k'apisiñam laycu, tipusiñam laycu. Jumaw sayt'ayista, uca khepat tincuyaraquista.

11Jacañ urunacajjajj ch'iwir uñtataquiw saraquipi, korar uñtataw wañsuscaracta.

12Jumasti, Tatay, wiñayapuniw jactajja, sutimajj wiñayapuniw amtatäni.

13Sartasimaya, Sión marcat qhuyapt'ayasim, t'akhesiñ urunacajj phokhasjjewa, pampachjjañam urojj purinjjewa.

14Uywatanacamajj marcapan kalanacaparuw munasipjje, t'unjat perkanacapat jachapjje.

15Takpach marcanacaw Tatitun khapak sutip wakaychapjjani, acapach reyinacasa, aytat cancañamataquiw ajjsarthapipjjani,

16Tatitojj Sión marcar wasitat utachcani ucapacha, khapak cancañapan uñstcan ucapacha,

17apanucut jaken mayisitap ist'cani ucapacha, achict'asitanacapar jayscani ucapacha.

18Acanacajj jutir mita jakenacatac kellkatäpan, machakat utt'ayat marcan Tatitur jach'añchañapataqui.

19Tatitojj kollan utjäwipatpach uñtanïna, orakerojj kollan alajjpachatpach uñtanïna,

20catuntatanacan aykotanacap ist'añataqui, jiwañatac juchañchatanacar khespiyañataqui:

21Tatitun sutipat Sión marcan yatiyañataqui, aytat cancañapat Jerusalenan parlañataqui;

22jakenacajj take marcanacat mayachasipcan ucapacha, reyinacasti Tatitur yupaychañatac tantachasipcan ucapacha.

23Jupaw chica thaquin ch'amajjar thayjtayi, jacañ urunacajj juc'aptayaraqui.

24Nayasti juparojj sistwa: “Diosajjay, janiquiy jacäwejj chicatpach apakestati” sasa. ¡Maranacamajj janiw tucuyanïquiti!

25Orakerojj kalltatpach sum utt'aytajja; alajjpachasti amparamamp luratawa;

26take ucanacajj tucusjjaquiniwa, jumasti pachpaquïsctawa, ucanacajj isir uñtataw merk'esipjjani, tucusir isir uñtatäpjjaniwa.

27Jumasti pachpaquïsctawa, jacañ maranacamajj janiw tucuscaniti.

28Uywatanacaman wawanacapajj suma uñjataw jacapjjani, allchhinacapajj nayrakataman wiñayaw jacapjjani.

← Chapter 101 Chapter 103 →