Jeremiah 12

Ayamar Bible (Qullan Arunaca)

1Tata, jumampi ch'ajjwañarutejj uscusëjja, juman arumajj chekapapuniwa; ucampis nayajj jisct'añ munirisma, ¿cunatsa ñankha jakenacataquejj take cunasa sumaqui lurasirapi? Uqhamaraqui, ¿cunatsa ch'ojjña luririnacasa, sumaqui jacasipjje?

2Jumaw jupanacarojj ayrunttajja, jupanacasti saphintapjjaraquiwa, jiltapjjaraqui, achupjjaraqui. Lacampiquiw jupanacajj juma jac'ancasipqui, chuymanacapanjja jumatjja wali jayancapjjewa.

3Ucampisa Tata, jumajj nayarojj uñt'istawa; jumajj uñjistawa, yatiraquistawa, cawquïrinacatejj jumataqui amtatanacajjäqui ucjja. ¡Uca jakenacarojj qhariñ ovejanacarjam apasjjam, qhariñ urutaqui chimpt'awayaraquim!

4¿Cunapachcamas orakejj wañäni, pampanacan koranacas wañsuscaraquini? Animalanacasa, jamach'inacasa jiwarasipquiwa, aca marcan jaquir jakenacan ñankha luratanacap laycu, jupanacasti janiw luratanacapjja jumajj uñjcasmas uqham amuyapquiti.

5“Cayut sariri jakenacampi sarasatejj wali karstajja, ¿cunjämaraqui saräta caballot sariri jakenacampi chicasti? Suma orakenjja c'uchiquïsctawa, ucampisa ¿cunsa luräta Jordán token alinac taypinjja?

6Pachpa jilanacamawa, cawquïrinacatejj familianacamäqui ucanacaw jumataquejj sartapjje, khepäjjamatsti jan wali arunacampiw arnakanipjjaractam. Jupanacarusti janipun alcatasimti, suma arunacampi parlapcchïtam ucasa.

7“Marcajjarojj apanuctwa, cawquïritejj nayanccäna ucarusti maysaruw apanucuracta. Wali munat marcajjarusti, uñisirinacan amparaparuw uchta.

8Aca nayanquir marcasti jichhajj nayataquejj montenquir leonjamawa warari, ucatwa jichhajj uñistjja.

9Marcajjajj mä suma phuyunacani jamach'jamawa, cawquïrirutejj yakha jamach'inacajj nuwapjjaraqui uqhama. ¡Take montenquir animalanaca jichhajj jutapjjam; jach'a mank'äwi lurañataqui tantacht'asipjjaraquim!

10Uñisirinacan jach'a jilïrinacapasti uva yapojj-jja t'unjapjjewa, orakenacajjsa taquisipjjaraquiwa. Nayan wali munata orakejjsti llaquiscañ wasararuraquiw tucuyapjje.

11Llaquiscaña wasararuw tucuyawayapjje; nayasti jichhajj jupar jachasquirwa uñjaracta. Take aca orakpachaw jichhajj wasara tucuta, ucampis janiw qhitis llaquiscaraquiti.

12Take wasara kollu patanacatsti, khoru jakenacaw jutantapjjäna, ucampisa naya Tatitojj mä espada ayt'atätwa, aca marcsti maysat mayswa t'unjanï, janiraquiw qhititaquis suman sarnakasiñajj utjcaniti.

13Trigo yapuchasipjjäna, ucatsti ch'aphinacaqui apthapjjapjje, take luratanacapasti inamayaquiwa, Cosechanacapasti k'ala aynacht'atawa, nayan colerasiñajjan naqhatap laycu.”

14Diosasti aqham siwa cawquïri marcanacatejj Israel marca jac'ancapqui uca ñankha marcanacarojja, cawquïrinacatejj aca orake t'unjapqui ucanacarojja, aca oraksti Diosaw marcaparu mä herenciäcaspas uqhama churaraqui: “Nayaw uca marcanacarojj orakenacapat jiq'inucü, Judá marcarusti jupanac taypitjja apsunjjaraquïwa.

15Uqhama jiq'inucutatsti, jupanacatjja qhuyapayasiraquïwa, pachpa orakeparu, pachpa marcaparuw cuttayanjjaraquï.

16Jupanacaw marcajjaru Baal diosataqui juramento lurañsa yatichapjjejja, ucampisa jichhajj marcajj taypinjja utjnokasjjapjjaniwa, sititejj marcajjan Diosaparu yupaychañataqui catokapjjani, sutejjaruraqui jurapjjani sasa: ‘Tatitojj jacasquiwa’ sasa.

17Ucampisa cawquïri marcatejj jan nayaru jaysquitani ucarusti saphitpacha jiq'inucü, t'unjaraquïwa. Naya Tatituw ucjja arsta.”

← Chapter 11 Chapter 13 →