Isaiah 60

Ayamar Bible (Qullan Arunaca)

1Jerusalén, mä c'ajquir khanampi llawuntata sartasim, khanamasti purinjjewa, Tatitun c'ajquir khapak cancañapasti jumjjan khani.

2Aca orakerusti ch'amacaw muyunti, marcanacarus aruma ch'amacaw muyuntascaraqui, ucampisa Tatituw jumjjanjja khanani, jumjjanracwa Tatitun khanapajj uñstani.

3Marcanacajj uca khanamaruw jutapjjani, reyinacasa khantati khanamaruraquiw jutapjjani.

4Sartasim ucatsti take toke uñatatasiraquim, takeniw tantacht'asipjje juman ucar jutañataqui. Yokall wawanacamajj jayatpachwa jutjjapjjani; imill wawanacamasa ampararu ichunitäjjapjjaraquiniwa.

5Jumasti, ucanac uñjasajj walpun cusisïta, chuymamasti cusisiñansa phokt'ataraquïniwa; kota tokenquir marcanacan kamir cancañanacapwa apanirapipjjätam, marcanacan kamir cancañapwa catuyapjjaraquïtam.

6Walja camello tamanacaw muyuntapjjaraquïtam, ucanacasti Madián, uqhamaraqui Efa sisqui uca chekanacatwa jutapjjani; Sabá tokenquirinacasti takeniw jutapjjani kori, incienso ucanac apt'ata, ucatsti Tatitun suma luräwinacapwa yatiyapjjaraquini.

7Cedar tokenquir take uywa tamanacasti jumancamaquïniwa, Nebaiot chekanquir orko ovejanacasti juman ampalaymincaraquiniwa, uqhamat Tatitun altaraparu loktañamataqui mä suma ofrendar uñtata, jupasti suma templopjja juc'ampi sumwa tucuyani.

8“¿Qhitinacas ucanacajja kenayar uñtata jalnakapjje, palomanacar uñtataraqui utanacaparu jalapjje?

9Ucanacasti kotanjam jutir barconacawa, mayaquiw jutapjjaraqui Tarsisanquir barconacampi irpata, jayatpachwa wawanacamjja irpanjjapjjaraqui, koripas kollkepas apt'ata, Tatitumar jach'añchäwi churasa, Israelan Kollan Diosaparu, qhititejj jumarojj wali suma tucuyctam ucaru.

10Yakha marcanquir jakenacaw perkanacamjja wasitat sayt'ayapjjani, reyinacapasti jumaruw sirvipjjaraquïtam; Tatitojj colerasiñapan mutuycchiyätam ucasa, jichhajj munasiñapanwa jumarojj qhuyapayasiractam.

11Puncunacamasti jist'aratapunïniwa, janiraquiw arumasa, urusa jist'antascaniti, uqhamat marcanacan kamir yänacapa jumataqui apaniñapataqui. Reyinacas uca chekjja jilïrinacapampi mantapjjañapataqui.

12Cawquïri marcatejj jan sirvcätamjja, ucajj tucusiniwa; marcanacasti uqhampacharaquiwa tucjatäpjjani.

13Tatitusti Jerusalenarojj siwa: “Líbano kollunquir kamir cancañanacasti juman ucaruw jutjjapjjani, pinonaca, abetonaca, uqhamaraqui ciprés sat kokanacasa, templojja c'achachañataqui, cawqharutejj tact'ascta uca cheka jach'achañataquiraqui.

14Qhitinacatejj jumaru t'akhesiyapcäyätam ucanacan wawanacapasti juma nayrakataruw alt'ata jutapjjani, qhitinacatejj jisc'achapcäyätam ucanacasti cayunacamaruw quillt'asipjjani, sapjjaraquïtamwa: ‘Tatitun marcapa’ ‘Israelan Kollan Diosapan Sión kollupa’ sasa.

15Janiw mayampis apanucutäpcätati, uñisita, sapaquiraqui, jan ucasti nayaw jumarojj wiñayataqui c'ajquir tucuyäma, wiñayataqui cusiscañaraqui.

16Marcanacasti suma mank'anacapwa churapjjaraquïtam, reyinacasti kamir cancañanacapwa apanipjjaraquini; ucapachaw amuyaraquïta, naya Tatitojj juman khespiyirimätajja, naya, Jacobon Ch'amanipajja, jumar khespiyirïtajja.

17“Bronce lantsti kori churäma, hierro lantsti, kollke churaraquïma, lawa lantsti, bronce churäma, kala lantsti, hierro churaraquïma. Sumancañampiw apnakayäma, cunatejj chekapäqui ucaw irparaquïtam.

18Orakemansti janipuniw ch'ajjwañanacajj mayampis ist'ascjjaniti, uqhamaraqui orakemansa janiw t'unjatäñajj, aynacht'añas utjcjjaniti, jan ucasti perkanacamarojj: ‘Khespiyasiña’ sasaw sutichäta, puncunacamarusti: ‘Yupaychaña’ sasaraqui.

19“Urusti janiraquiw intin khanañapas munascjjaniti, arumasti janiraquiw phajjsin khanañapasa, munascjjaniti jan ucasti naya Tatituw juman wiñaya khanamäyäjja, naya Diosamaw, juman khanamäyäjja.

20Intimajj janipuniw ch'amact'caniti, phajjsin khanapas janiraquiw chhaktcaniti naya Tatituw juman wiñay khanamäyäjja uca laycu, lutosiña urunacamasa tucusjjaniwa.

21“Marcamanquiri take jakenacasti suma jakenacäniwa, orakepatsti wiñayataquiw jupanacancjjani; cawquïri altï nayajj ayrcäyätjja ucat sartirïpjjtawa, amparajjampi uscutäpjjtawa, nayan jach'a cancañajj uñacht'ayañataqui.

22Aca mä juc'a jakenacasti warankanacaruw tucupjjani, aca mä kawkha jakenacasti mä jach'a marcaw tucupjjaraquini. Nayätwa Tatitojja, nayaw take ucanacjja horasaparu phokhasiyaraquï.”

← Chapter 59 Chapter 61 →