Acts 28

Ayamar Bible (Qullan Arunaca)

1Cunapachatejj takpachani wañar mistjjapjjta, ucqhaquiw yatipjjta uca islan Malta satätapjja.

2Uca islan jaquirinacasti wali sum catokapjjetu. Jupanacasti mä jach'a ninwa phichapjjäna, thayampi jallumpi puritap laycu. Ucatsti takeniruw jawsapjjetu: “Jutapjjam, ninar jac'achasinipjjam junt'urasipjjañamataqui” sasa.

3Ucapachasti Pablojj mä juc'a waña lawanac apthapinisinsti, ninaruw apjjatascäna. Acatjamatwa mä catarejj ninat jaltañ munasina Pablon amparapat achthapi.

4Uca islanquirinacasti uqham Pablon amparapan catari warcusir uñjasinjja, jupanac puraw parlarasipjje: —Aca chachajj jake jiwayirïpachawa. Kotat khespincchi ucasa, juchapat jiwañapapunïpachawa —sasa.

5Pablosti nina patjjaruw amparapatjja catarir thalakasi. Janiraquiw juparojj cunas camachcänti.

6Takeniw Pablon amparap p'usuntañap suyasipcäna. Sapjjaraquïnwa: “Acatjamatwa jiwt'ani” sasa. Ucampis jaypach suyapjjatapatsti Pablorojj janiw cunas camachcänti. Uqham uñjasinjja jakenacajj mayrac amuyapjjäna: Aca chachajj mä diosäpachaw, sasa.

7Uca Malta islansti mä jilïr jakew utjäna Publio sutini. Jupan orakenacapasti ucawja jac'ancaraquïnwa. Ucansti jupajj wali sumaracwa catokapjjaraquitu. Quimsüruraquiw ucanjj kamarapjjta.

8Ucansti Publion tatapajj usutaw iquiñancascäna. Jupasti wali calenturampi, uqhamarac wila cursiyampi usutänwa. Pablosti ucar uñjt'iriw saräna. Tatitut mayisinsti amparapampi lokjjatasinwa usurirojj c'umaraptayäna.

9Uc yatisinsti uca islan yakha usutanacasti Pablon ucaruw jutapjjäna, jupanacasti kollatäpjjaraquïnwa.

10Ucatsti nanacarojj wal yäkapjjetu. Sarjjapcta ucqhasti take cunanacwa churawayapjjetu sarjjañataquejja.

11Uca islan quimsa phajjsi ucancapjjatajjatsti, yakha barcotaracwa mistuwayapjjta. Uca barcosti juyphipachjja ucanwa pasatayna. Ucasti Alejandría marcanquir barcönwa. Uca barcosti nayräjjapanjja pä c'ari diosan uñnakapampi uchatänwa. Uca c'ari diosanacasti, maynejj Castor satänwa; maynïristi Polux sataraqui.

12Ucatsti Siracusa puertoruraquiw puripjjta. Ucansti quimsüruraquiw kamarapjjaracta.

13Ucat sartasinsti, Regio sat puertoruw puripjjaracta, kota irananjam sarasina. Khepürusti aynach thayaw thayt'ani ucatsti khepürojj Puteoli sat chekaruw puripjjta.

14Ucansti mä kawkha jilatanacaruw jicjjatapjjta. Jupanacasti sapjjaraquituwa: “Mä seman kamart'awayañäni” sasa. Ucatsti khepürojj Roma marcaruraquiw mistuwayapjjta.

15Romanquir jilatanacasti nanacan puriñajj-jja yatipjjaraquïnwa. Ucatwa thaquir catokeri jutapjjäna, Foro de Apio satäquis ucacama. Jiquisipcta ucawjasti “Tres Tabernas” sataraquïnwa. Pablojj jupanacar uñcatasinsti, Diosaruw yuspagari, ucatsti wal cusisiraquïna.

16Roma marcar purisinsti, [soldadonacan capitanapajj guardia jilïriparuw presonac catuyjje.] Pablorojj yakhawjaruw jaytapjje, mä soldadompi jupar uñjayasa.

17Puritat quimsürurusti Pablojj Romanquir judionacan jilïrinacaparuw jawsayäna. Jupanac tantthaptïpansti, jupanacarojj sänwa: —Jilatanaca, nayajj janiw cuna jan wals lurcti judionacataquejja ni awquinacasan saräwinacap tokesa. Uqhamäquipansa nayarojj Jerusalén marcanjja catuntasipcaquituwa. Ucatsti romanonacaruraquiw preso catuyapjjetu.

18Jupanacasti wal wal jisct'asinjja janiw cuna juchs jicjjatapquitänti nayar jiwayañatacjamajja. Ucatwa antutjañ munjjapjjetäna.

19Ucampis judionacajj janiw antutatäñajj-jja munapcänti. Ucatwa nayajj emperadoran uñjatäñatac mayta. Ucampis nayan judío masinacajjataquejja, janiw cuna ñankha amtañajjas utjquituti.

20Ucatpï jumanacarojj jawsayapjjsmajja, jumanacamp jiquisisin parlt'asiñataqui. Cuntï Israel marcan suyt'apctansa, uca quicpa suyt'äwi laycuwa aqham aca cadenanacampi ñach'antat uñjastjja.

21Uc ist'asinsti jupanacajj Pablorojj sapjjänwa: —Nanacajj janiw cuna cartsa jumjjatjja Judea marcatjja catokapcti. Janiraquiw Jerusalenat jutir cawquïr jilatanacas jumjjatjja cuna jan walsa yatiyapcaraquituti.

22Nanacajj ist'añwa munapjjaraquirista juman amuyuma. Yatipjjtwa take chekan aca machak yatichäwita jan walinac parlapjjatapa.

23Uqham sasinsti mä urutaquiw tantacht'asiñjja amtapjjäna. Ucürusti walja jakenacaraquiw jutapjjäna, cawqhantejj Pablojj korpachascäns uca utaru. Alwat jayp'ucamaraquiw jupajj Diosan reinopat jupanacarojj parläna. Moisesan leyinacap toketa, uqhamarac profetanacan kellkatanacapampita Jesusjjat amuyt'ayañ munäna.

24Yakhepanacasti cuntejj Pablojj siscäna ucarojj iyawsapjjänwa, mayninacasti janiraquiw iyawsapcänti.

25Jupanac taypina jan mä amtäwic utjatapatjja sarjjañ munapjjäna, ucatwa Pablojj säna: —Kollan Ajayojj walicpun parlawayäna awquinacasarojj Isaías profeta toke, aqham sasa:

26‘Saram, ucatsti uca jakenacar saraquim: Jumanacajj ist'asipcätawa, ucampis janiw amuyt'apcätati. Uñjapjjaraquïtawa, ucampis janiw amuyapcätati.

27Jakenacan chuymanacapasti kalaratäjjewa, jan wal ist'apjje, nayranacapasti ch'irmthapitaraquiwa, jan uñjapjjañapataqui, jinchunacapampi jan ist'apjjañapataqui, chuymanacapampis janirac amuyt'apjjañapataqui, jupanacajj janiraqui naya toker cuttanipcpanti kollatäpjjañapataqui.’

28Jichhasti jumanacajj yatipjjam, jichhat ucsarojj Diosan khespiyasiñapajj jan judiöpquis ucanacaru yatiyatäniwa. Jupanacaraquiw ist'apjjani —sasa.

29[Pablon uqham jupanacar parlatapatjja, judionacajj jupanaccam ch'ajjwasaw sarjjapjje.]

30Pablosti pä maraw alquilat utapanjja utjasiwayi. Take jupar uñjt'ir jutirinacarusti catokaraquirïnwa.

31Ucansti jan ajjsartasaraquiw jupajj Diosan reinopatjja yaticharaquïna, uqhamarac Tatit Jesucristjjatsa. Janiraquiw qhitis juparojj jarc'cänti uqham parlatapatjja.