2 Samuel 12

Ayamar Bible (Qullan Arunaca)

1Tatitusti Natán profetaruw qhitaraquïna Davidar uñjiri sarañapataqui. Natanasti Davidan nayrakataparu uñstasinsti saraquïnwa: —Mä marcan pani jakew utjäna. Maynejj kamirïnwa, maynisti pobreraqui.

2Kamiristi walja ovejanacani uqhamaraqui walja vacanacanïnwa,

3ucampisa pobrenjja mä sapa jisc'a alat ovejapaquiw utjäna. Jupa quipcaw uca jisc'a ovej-jja uywasïna, jupampi chicaw jilsuraquïna uqhamaraqui wawanacapampi chicaraqui; pachpa mank'apwa mank'araquïna, umañapatwa umasiraquïna, jupampi chicaw iquisiraquirïna. Uca jakesti jisc'a ovejaparojj mä imill wawaparjamaraquiw munasïna.

4Mä uruw mä thaqui sarir jakejj uca kamiri jakeru sart'araquïna. Ucampisa kamirejj sart'iripataquejj janiw ovejapatsa ni vacapatsa qharst'añ muncänti, jan ucasti pobre jaken ucar sarasinjja uca jisc'a ovejapwa aparanïna ucat qharsuraqui sart'iriparu churañataquejja —sasa.

5Davidasti uca jake contrajj walpun colerasïna, Natanarusti saraquïnwa: —¡Diosan sutipjjaruw arsta, cawquïri jaketejj uc lurqui ucajj jiwañapawa!

6¡Uca jisc'a oveja jiwayatapatsti pusi ucqhampi cuttayjjañapawa, jan acch'as qhuyapt'ayasiñapajj utjatap laycu! —sasaw Davidajj säna.

7Natanasti saraquïnwa: —¡Jumätaw uca jakejja! Ucwa khanañchi Israelan Tatitu Diosapajja: ‘Nayaw jumarojj Israelan reyipat ajllissma, uqhamaraqui Saúl reyin amparapatsa khespiyaracsma;

8Reyin palaciopsa jumaruw catuyaracsma, uqhamaraqui ucan utjir warminacsa, Israel marcsa uca quipcaraqui Judá marcaru apnakañsa. Ucajj inas juc'aquïchi, ucampisa juc'ampi yänacwa yapt'iriscasamänjja.

9¿Cunatsa arunacajja jisc'achtajja, ucatsti cuntejj nayataquejj jan asquïqui uc luraractajja? Hitita Uriasarusti jiwayaractawa, amonita jakenacampiw juparojj jiwayayaractajja, warmipsa catuntasiractawa.

10Jichhajj jumajj nayarojj jisc'achistawa, Urías hitita jaken warmipa catuntasisajja, ucatsti warmt'asiractawa, ucatpï jichhajj utamatjja janipuniw jayarst'caniti jan walt'añanacajja.

11Naya Tatituw acjja arsta: Jichhasti jan walt'añanacjja juma contrajj pachpa utamatwa sartayäjja, juman uñjcataraquiw warminacamarus pachpa familiamat mayniru catuyaraquëjja, jupajj urpachaw uca warminacampejj iquintaraquini.

12Jumajj jaken jan uñjcata jamasan ucanacjja lurtajja, nayasti take Israel marcan uñjcañaw lurä uqhamaraqui uruwa, khanan luraraquï’ —sasa.

13Davidasti Natán nayrakatanjja juchanïtapwa amuyasïna: —Tatitu contraw juch lurta —sasa. Natanasti saraquïnwa: —Tatitojj janiw jumarojj juchamat mutuycätamti, janiw jiwcaraquïtasa.

14Ucampisa cunjämtejj Tatiturojj chuymapjja walpun ust'aytajja cawquïri wawamatejj nascani ucaw jiwani —sasa.

15Cunapachatejj Natán profetajj utaparu cuttanjjän ucqhasti Tatitojj usuntayänwa Uriasan warmipajj Davidataqui wawachascän uca wawarojja, niya jiwt'irpachjama usuntataraquïnwa uca wawajja.

16Ucapachaw Davidajj Diosarojj wali achict'asïna, ayunasina orakeru iquisina.

17Cawquïri jilïri jakenacatejj palaciopan jacapcän ucanacasti, sarasin Davidarojj achict'apjjaraquïnwa oraket sartjjañapataqui, ucampisa jupajj janiw sartañ muncänti, janiraquiw jupanacampi chicas mank'cänti.

18Pakallko uru pasjjepansti uca wawajj jiwjjänwa. Davidan jakenacapasti ajjsarapjjaraquïnwa uca yatiyañjja, chuymanacapansti sapjjaraquïnwa: “Cunapachatejj wawajj jacascän ucapachajj parljjayaraquiyatänwa, ucampis janiw ist'quistänti, jichhasti, ¿cunjämarac sañäni wawan jiwjjatapatsti? ¡Cunsa luraquispawa!” sasa.

19Ucampisa Davidajj jakenacapan jupanaccama parlasipjjeri uñjasinsti, amuyjjaraquïnwa wawan jiwjjatapjja; ucatwa jisct'äna: —¿Wawajj jiwjjeti? —sasa. —Jïsa, jiwatäjjewa —sasaw jupanacajj sapjjaraquïna.

20Ucapachaw Davidajj oraket sartjjäna, jarekasisinsti, suma k'apquiri kollanacampiw jawsusïna, isinacapsa trocasiraquïna, ucatsti temploruw mantawayi Tatituru yupaychañataqui. Ucatsti utaparuw sarjjäna, mank'a mayisisin mank'asiraquïnwa.

21Ucatwa jakenacapajj jisct'apjjäna: —¿Jach'a rey, cunaraqui lurascta? Cunapachatejj wawajj usutäcän ucapachajj ayunayätawa, uca wawamatsti jacharaquiyätawa, ucampisa jichhajj wawan jiwjjatapatsti juma jach'a reyejj sartasisin mank'asjjaractawa —sasa.

22Davidasti saraquïnwa: —Cunapachatejj wawajj jaccän ucapachajj nayajj ayunayätwa, jacharaquiyätwa: ‘Inach Tatitojj nayat qhuyapt'ayasitaspa ucat wawajj jan jiwaycaraquispati’ sasa.

23Ucampis jichhajj jiwatäjjewa, ¿cunatarac jichhasti ayunascästi? Janejjay uca wawajj jactcchinitejja. ¡Nayaw uca wawampi jiquisirejj sarä, ucampis jupajj janiw nayampi jiquisirejj jutcaniti! —sasa.

24Ucatsti Davidajj Betsabé warmiparojj chuymacharaquïnwa. Uñjiri sarasinsti, uca warmimpiw iquintäna, ucat uca warmejj mä yokall wawa wawachasïna, ucarusti Davidajj Salomón sasaw sutiyäna.

25Tatitusti uca wawarojj munasiraquïnwa, Natán profeta toke Davidarojj ucjja yatiyaraquïna. Ucatsti Davidajj Tatitur ist'asajja uca wawarojj Jedidías, sasaw suticharaquïna.

26Uccañcamasti Joab chachajj amonitanacan Rabá marcaparuw soldadonacapampi nuwantascaraquïna, uca reyin marcapsti niya catuntirjamäscaraquïnwa.

27Ucat Davidarojj aca ewjja apayaniraquïna: “Rabá marcaruw nuwantasipcaracta, cawquïri jisc'a marcatejj umaña umjja jarc'jjäscän ucsti catuntjjaractwa.

28Jichhasti, juma, jach'a rey, tantacht'am mayni soldadonacaru, ucatsti uca marcar nuwantasinjja catuntaraquim jan nayan catuntascañajjataqui ucat sutejja uca marcar uscuscañataqui” sasa.

29Uqhamasti Davidajj take soldadonacaparu tantacht'asinjja Rabá marcaru nuwantiriw saräna, nuwantasinsti, catuntaraquïnwa.

30Ucatsti reyipan p'ekepatjja coronapa apakaniraquïna, suma c'ajquiri kalanacampi uchataraquïnwa, quimsa tunca quimsani kilo korit lurataraquïnwa, ucatsti uca coronjja Davidaruw asjjatapjjaraquïna. Uqhamarus Davidajj uca marcatjja jila alani yänacampwa apsunïna.

31Uca marcan khepariri jakenacarusti ansunisinjja serruchonacampi, fierro yawiñanacampi, hachanacampi irnakayaraquïna, uqhamaraqui ladrillo hornonacansa. Uca pachparacwa take amonitanacan marcanacapampejj luräna, ucatsti take soldadonacapampiw Jerusalén marcarojj cuttanjjäna.

← Chapter 11 Chapter 13 →