Zechariah 13

aymara-1997

1“Khä urun mä uma jalsuw jist'artani, ukan Davidat saraqir wila masinakapasa, Jerusalén markan jakirinakasa juchanakapa, q'añu luratanakap jariqasipxañapataki.

2Taqi aka markansti nayax yaqha diosanakan sutinakapsa jan mayampi amtasiñatakiw t'unjä. Uka pachparakiw profetanaksa, taqi ñanqha ajayunaksa q'alpun tukjarakï. Naya, Tatituw uk arsta.

3Ukhamasti, kunapachatix maynix jutir urunakat arsuñ munkani ukkhaxa, awkinakap kipkaw sapxani: ‘¡Jumax jiwätawa, k'ari arunakam Tatitun arupawa sas parlañ munatamata!’ sasa. ¡Khitinakatix profetätwa sasa sarnaqkani ukanakarusa, awkinakap pachpaw cuchillompi chhuqhuntas jiwayapxani!

4“Khä urunsti, profetanakax k'ari unañchäwinak parlapxatapat p'inqasipxani. Janiw khitis profetanakan lip'ichit lurat isinakampi uchasisax sallqjkaniti,

5jan ukasti sapa mayniw sani: ‘Nayax janiw profetäkti, yapu luririkïtwa. Wawatpach yapun irnaqañ yatta’ sasa.

6Jupar khitis jiskt'aspa: ‘¿Kunatsa janchiman uka chhuxriñchatanakax utji?’ sasaxa, jupasti sarakiniwa: ‘Masinakaxan utapan ukham lurapxitu’ ” sasa.

7Taqi ch'aman Tatitux siwa: “¡Sartasim espada, ajllit reyixaru jiwayam! ¡Munat awatirixar jiwayam, ukhamat markaxax ovejanakar uñtat aywitatani, nayasti saraqirinakaparux q'ala tukjarakï!

8Aka markankir jaqinakatxa, sapa kimsat paniniw jiwarani, ukat jilt'irikiw jakani. Uka jilt'irirusti ninampjamaw q'umachä, kunjämatix qullqix q'umachañäki ukhama, kunjämatix qurix q'uma tukuyañäki ukhama. Ukkhaw jupanakax nayar art'asipxitani, nayasti jaysäwa. Sarakïwa: ‘Nayan markaxa’ sasa. Jupanakasti sapxarakiniwa: ‘Tatituw jiwasan Diosasaxa’ sasa. Naya, Tatituw uk arsta.”

← Chapter 12 Chapter 14 →