Song of Solomon 8

aymara-1997

1¡Jumax nayan jilaxäsamäna, taykaxan ñuñupamp uywatäsamäna! Ukhamat nayax thakhin jikxatasin jumar jamp'att'añataki, jan khitis nayat sawkasiñapataki;

2amparat wayxarusawa, taykaxan utapar irpantirisma, ukan munasiñ tuqit nayar yatichañamataki. Nayasti jumarux mä suma vino umt'ayirisma, granada achunakaxat ch'iwrsut umap umt'ayarakirisma.

3¡Jupax ch'iqa amparapampi p'iqit katt'akitaspa, kupi amparapampisti qhumantt'arakitaspa!

4Jerusalenankir warminaka, nayaw achikt'asipxsma: munataxar jan sartayapxamti, ¡kunapachkamatix munki ukkhakam ikt'asiskpan!

5¿Khitirak wasarat jutaski, munasitapan kallachipxar alxatatasti? Manzano ali jak'an jumarux ikit sartaysma; ukanwa taykamax wawachasiñ usupa sartayasi; ukanarak taykamax jumarux wawachastam.

6¡Chuymamar nay chimpuntasita, amparamar nay chimpuntasita! Munasiñax jiwañar uñtat jan t'unjkayawa; jumar munañasti amay imäwir uñtat jan kamachkayawa. ¡Munasiñasti ninar uñtataw aqaraki, ukasti qullan ninawa!

7Taqi qutanakan umapasa janiw uka munasiñ jiwt'aykaspati; janirakiw jawiranakas jiwaykaspati. Maynitix qamir yänakapa churañ munaspa uka munasiñ laykuxa, jisk'achatakiw uñjasxaspa.

8Kullakitasax wali jisk'äskiwa janïraw ñuñupas jilaqkiti. ¿Kuns jupampix lurañäni, kunapachatix jupar sart'iri jutapkani ukkhaxa?

9Jupatix mä pirqäspa ukaxa, jupxarux qullqit lurat jark'aqasiñanak aptaysna; jupatix mä punküspa ukaxa, cedro lawanakampiw liq'ikipsna.

10Nayax mä pirqar uñtatätwa, ñuñunakaxasti torrenakar uñtatarakiwa. Ukat nayax munasitaxan nayraqatapan kusisiñ jikxatta.

11Salomonax Baal-hamón chiqan uva yapunïnwa. Uka yapsti uñjirinakaruw uñjañapatak jaytäna, jupanakax yapu apthapiñ tukuyasasti, sapa mayniw waranqa qullqi churäna.

12Salomón, waranqa qullqix jumatakiwa, pä patak qullqisti uñjirinakatakiwa; ¡uva yapuxax nayankakituwa!

13¡Panqar yapunakan reinapa, arsutam ist'ayita! ¡Jilat masinakasax arsutam ist'añ munapxi!

14¡Munasitaxay, jank'akiy jalanim, mä tarujar uñtat jaltanim, taruj qallur uñtat t'ijtanim! Qullu patanakax suma q'apkir alinakampi phuqhantatäxiwa.