Romans 12

aymara-1997

1Ukhamasti munat jilatanaka, Diosan khuyapayasiñap laykuw achikt'apxsma, jumanak pachpay jakkir waxt'äwjam luqtasipxam, qullana, ukhamarak Diosar kusisiykir luqtjama. Uka luqtäwiwa chiqpach yupaychäwixa.

2Janiy jumanakax jichha pacha saräwinakarjam jakxapxamti; jan ukasti, amtañanakam mayjt'ayapxam, ukhamat jumanakan jakäwiman sumäxañapataki, ukat Diosan munañap yatiñataki, kunatix askïki, kunatix munkañäki, kunatix chiqäki ukanaka.

3Diosax munasiñapan iwxa arunak nayar churatap laykuw taqi jumanakar sapxsma, jan maynis jumanak pachpax jilankatam amuyasipxamti, jan ukasti, kunatix wakiski ukhamak amuyasipxam, kuntix Diosax waxt'äwinak iyawsañamp chika churki ukarjama.

4Kamisatix mä sapa janchin walja chiqanak utjistuxa, janiw uka chiqanakax mä lurañak phuqhapkiti,

5ukhamarakiw jiwasanakax waljanïkasas Criston mä sapa janchirukiw tukxtan, ukatsti maynit maynikamax pachpa janchin mayar tukt'atäxtanwa.

6Diosax kunayman waxt'äwinak churistu, kunjämtix sapa maynir churañ munki ukarjama. Ukhamasti, Diosatix jutir urut arsuñ waxt'äwi churchistu ukaxa, iyawsañasax utjkistu ukarjam arsuñäni;

7mayninakar yanapt'añ waxt'äwtix churchistu ukasti, wali sum yanapt'añäni. Khititix yatichañ waxt'äwi katuqki ukax, yatichañaruy uchaspan;

8khititix mayninakar ch'amañcht'añ waxt'äwi katuqki ukax, ch'amañchañaruy uchaspan. Yänak churirix jisk'ar tukt'asay churpan; khititix sarayañatak uchatäki ukasti, wali amuyumpi saraypan; khititix pist'atanakar yanapki ukax, kusisiñampiy yanappan.

9Maynit maynikamax chiqpach chuymampi munasipxam, ñanqha lurañ apanukupxam, ukatsti aski lurañar katuyasipxam.

10Maynit maynikamax jilapurjam munasipxam, purapat yäqasisa.

11Luräwinakansti jan jayrasipxamti, Diosatakix taqi chuyma lurapxam.

12Suyt'añamansti kusisitak jakasipxam; t'aqhisiñanaksti llamp'u chuymampi mutupxam; janipun Diosat mayisiñ armasipxamti.

13Diosan markap taypin pist'ayasirinakar yanapt'apxam. Qurpachasiñ thaqhirinakar sum katuqapxam.

14Uñisirinakamarux askimpiy uñjapxam. Ask lurapxam, janirak ñanqhachapxamti.

15Kusisitanakampix kusisipxam, jachirinakampisti jachapxarakim.

16Jumanak taypin mä amtanik jakasipxam. Jan jach'a jach'a tukupxamti, jan ukasti, llamp'u chuymaninakjamäpxam. Janirak wali yatiñanjamas tukupxamti.

17Janiy khitirus ñanqhat ñanqha kutt'ayapxamti; jaqinak nayraqatansti aski lurañatak ch'amachasipxam.

18Kawkhakamatix wakiski ukkhakamax taqinimpis suman jakasiñatak ch'amachasipxam.

19Munat jilatanaka, jumanak purax jan ukhamat ukham lurjasipxamti, jan ukasti Diosar jaytapxam, jupaw mutuyaskani. Qillqatax siwa: “Nayaruw chiqapar uñjañax wakt'itu; nayaw mutuyaskä, siw Tatituxa” sasa.

20Juk'amp saskakiwa: “Uñisirimatix manq'at awtjatächi ukaxa, manq'añ churam, umat pharjatächi ukasti, um churarakim; ajanupasti p'inqapat wilaruw tukuni” sasa.

21Janiy ñanqhampix atipjayasimti, jan ukasti, askimpiy ñanqharux atipjam.

← Chapter 11 Chapter 13 →