Revelation 9

aymara-1997

1Ukxarux phisqïr angelaw trompetap phust'äna, ukatsti mä warawar uñjta, alaxpachat uraqiruw jalaqtanitayna; uka warawarasti uraqi manqha pachan jist'arañanakap katuqäna.

2Ukatsti uka ch'amak manqha jist'aräna, uka ch'amak manqhatxa jiwq'iw mistüna mä jach'a hornot mistunkaspa ukhama; uka jiwq'iw intiru, saman thayar q'al ch'amakt'ayäna.

3Uka jiwq'itsti t'iju t'ijunakaw misturäna, ukatsti aka uraqin phuqhantapxäna, ukanakasti munañanïñ kankañ katuqapxäna, jaqinakar alacrán sat laq'unakar uñtat achjañataki.

4Ukanakasti uraqinkir quranakaru jan ñanqha lurapxañapatakiw ixwa katuqapxäna, janirak kuna ch'uxñanakarusa, kuna quqanakarus ñanqha lurapxañapataki, jan ukasti, khitinakatix Tatitun chimpupampi paranakapan jan chimpt'atäpki uka jaqinakaruk t'aqhisiyañataki.

5Janiw uka t'iju t'ijunakax jaqir jiwarayañatak munañanïñ katuqapkänti, jan ukasti, jaqinakar phisqa phaxsi t'aqhisiyañatak uskutäpxänwa; t'iju t'ijunakan achjatapasti, alacrán sat laq'un mich'ipat sipan juk'amp usuykirïnwa.

6Uka phisqa phaxsinsti, achjat uñjasipkatayna uka jaqinakax, jiwañak munxapxäna, ukampis jakasipkakïnwa. Jiwax jupanakat jaltkaspa ukhamänwa.

7Uka t'iju t'ijunakasti nuwasiñatak wakichat caballonakar uñtatänwa, p'iqinakaparux niyas quri pillumpjam asxatatänwa, jaqi ajanut ajanunjamarakïnwa.

8Ñik'utanakapasti warmi ñik'utar uñtatänwa, laka ch'akhanakapasti leonan laka ch'akhapar uñtatarakïnwa.

9Janchinakapasti hierro isimpi isthapitäkaspas ukhamänwa, chhiqhanakapan jawq'alitanakapasti, nuwasiñar mantir caballonakan qatatit walja carronakan uxutapjamänwa.

10Wich'inkhanakapasti, alacranan mich'ini wich'inkhapjamänwa, ukampisti ch'amanirakïnwa jaqir phisqa phaxsi t'aqhisiyañataki.

11Uka t'iju t'ijunakan jilïripasti manqha pachan angelapawa. Aka angelasti hebreo arunxa Abadón satawa, griego arunsti Apolión satarakiwa, paypach arunsti sutipax “T'unjiri” sañ muni.

12Nayrïr t'unjäwix tukusxänwa, ukampis payampiw jutañapäski.

13Suxtïr angelax trompetap phust'arakïna. Ukatsti akatjamat mä aru ist'ta, uka arusti Diosan nayräxapankkis uka quri altaran pusi waxrap taypit mistunïna.

14Uka arusti trompeta phust'katayna uka suxtïr angelaruw säna: “Éufrates jawir thiyan chinuntatäkis uka pusi angelanakar antutnukxam” sasa.

15Ukapachaw uka pusi angelanakax jaranukut uñjasipxäna, niya chikatan chikatap jaqinakar jiwarayañataki, jupanakasti uka pachataki, uka urutaki, uka phaxsitaki, uka maratak wakichatäpxataynawa.

16Ukatsti ist'araktwa, caballot sarir soldadonakan pä patak waranqätapa.

17Ukham uka unañchäwin caballonak uñjta, uka caballonakar lat'xatat soldadonakasti, metalat lurat jark'aqasiñan uchatäpxänwa, ukasti ninar uñtat wila, zafiro qalar uñtat sajuna, azufrer uñtat q'illurakïnwa. Uka caballonakan p'iqinakapasti león p'iqinakar uñtatänwa, lakanakapatsti ninampi, jiwq'impi, azufrempiw mistüna.

18Jaqinakasti niya chikatan chikatapaw jiwaräna, uka caballonakan lakanakapat mistur ninampi, azufrempi, jiwq'impi.

19Uka caballonakan ch'amapasti lakampina, wich'inkhampinkänwa; wich'inkhanakapax katarinakar uñtatänwa, p'iqinakapampiw jaqinakar usuchjapxäna.

20Uka t'aqhisïwinakampi jan jiwarir jaqinakasti, jichhax janirakiw jan wali luratanakap apanukupkänti, kunayman ajayunakar yupaychañsa janirakiw apanukupkänti; qurita, qullqita, bronceta, qalata, lawat lurat diosanakarus yupaychasipkakïnwa, jan uñjiri, jan ist'iri, jan sarnaqiri diosanakaru.

21Uka jaqinakax janiw jaqi jiwayatanakapat kutikipstapkänti, layqasitanakapatsa, wachuqa juchan sarnaqatanakapatsa, lunthatasipxatapatsa janirakiw kutikipstapkänti.

← Chapter 8 Chapter 10 →