Revelation 18

aymara-1997

1Taqi ukanak qhipatsti, yaqha angelaruw uñjarakta alaxpachat wali munañan kankañampi saraqasinkiri; uraqisti uka angelan k'ajatapampiw qhanäna.

2Wali jach'at art'asirakïna: “¡Aynacht'xiwa, jach'a Babiloniax t'unjatawa! ¡Supayanakan utjäwiparuw tukuwayi, kunayman ñanqha ajayunakan putuparuw tukuwayi, kunayman q'añu jamach'inakan tapaparuw tukuwayi, q'añu qhuru uñisit animalanakan tapaparuw tukuwayxaraki!

3Wachuqa jucha lurat vinopampiw taqi markanakax macharapxi; akapach reyinakasti uka Babiloniampiw wachuqa juchan sarnaqapxi, alakipa lurir jaqinakasti, jupan jan wali sarnaqatapampiw qamiriptapxi” sasa.

4Ukatsti yaqha aru ist'arakta, alaxpachat art'asiniri: “Uka markat mistupxam, jumanakax markaxankirïpxtawa, jan jupamp chika jucha lurasipkañamataki, jupanakxar jutkani uka t'aqhisiñanakas jumanakxar jan purisinkañapataki.

5Jucha luratanakapasti walipuniwa, alaxpachkamarakiw puri. Diosasti ñanqha luratanakap amxäsiwa.

6Kuntix jupax yaqhanakar lurkänxa uka pachpa juparux lurapxam, pä ukkhampirak luratanakapat kutt'ayapxam. Kuna machjañanaktix jupax mayninakatak wakichkän ukatxa, pä ukkhampi wali machjayir uma wakicharapipxam.

7Kunjämtix jupax jach'a jach'a tukurïkänxa ukhamarak jichhax t'aqhisiyapxam, ayquyapxam; jupax chuymapan amuyiwa: ‘Nayax akan reinar uñtat qunt'atäsktwa, janiw ijmäkti, janirakiw t'aqhiskäsa’ sasa.

8Uka arsutap laykuw jupatak t'aqhisiñax mä urunak purinini: jiwañampi, t'aqhisiñampi, manq'at awtjayasiñampi, ninar nakhantayataw uñjasirakini; taqi ch'aman Tatitu Diosaw jupar mutuyañ amti” sasa.

9Akapachankir reyinakasti, nina jiwq'i uñjasax uka warmit wal jachapxani, jakhusipxarakini, jupampi q'añusipxatap layku, k'achachasiñanakar katuyasipxatap layku.

10Ninan mutuyäwipar axsarasasti, jayatak uñch'ukipxani, sapxarakiniwa: “¡Ay! ¡Babilonia jach'a marka, ch'aman marka, kunarus purt'asta! ¡Akatjamatakirakis mutuyäwimax purinixä!” sasa.

11Akapachan alakipa lurir jaqinakasti uka markar uñjasax jachapxaniwa, jakhusipxarakiniwa, janiw khitis aljañanakap alasirix utjkxaniti. Babiloniax jupanakat

12quri, qullqi yänak alasïna, suma k'ajkir qalanaka, perlanaka, linot lurat suma sawutanaka, suma wila chupika sawutanaka; suma q'aphin kunayman lawanaka; marfilat lurat yänaka, suma lawanakat lurata, bronceta, hierrota, marmolat lurat yänak alasïna;

13canela, suma q'apkir qullanaka, incienso, mirra, vino, aceite, suma jak'u, trigo; khumur uywanaka, ovejanaka, caballonaka, caballompi qatatiñ carronaka, uywat jaqinaksa.

14Uka markarusti sapxarakiniwa: “¡Janirakis suma muxsa achunakamax utjkxtamtixä, uka achunak walxay jumax munirïstaxa; wiñayatakiw apt'asxtaxa, taqi suma kankañama, qamir yänakamsa!” sasa.

15Uka yänakampi alakipa luririnakasa, uka markïpan qamiriptirinakasa, mutuyäwir axsarasax jayatak uñch'ukipxani. Jachasisa, jakhusisarakiw

16sapxani: “¡Ay! ¡Kunarurak purt'asta! ¡Llakkañätaw ch'aman jach'a marka! Suma lino isinakampi isthapitaw sarnaqäyätaxa, suma wila chupika isinakampi, qurimpi, suma k'ajkir qalanakampi, suma perlanakampiw k'achachasïyätaxa.

17¡Akatjamat ukataqi qamir yänakax tukusiwayxi!” sasa. Barco apnaqir capitananakasa, qutanjam saririnakasa, barcon irnaqirinakasa, alakipa luririnakasa, axsarañatsa jayatak sayt'anipxäna.

18Uka markan nakhatapat jiwq'i mistur uñjasasti, jach'at art'apxarakïna: “¡Janipuniw Babilonia markjam wali ch'amanix utjkänti!” sasa.

19Ukatsti laq'ampiw p'iqinakapat willxatasipxäna, jachapxäna, wararipxarakïna: “¡Ay, kunarurak purt'asta! ¡Llakkañätaw ch'aman jach'a marka! Qamir yänakamampiw qutan barcompi irnaqirinakax qamiriptapxi. ¡Jichhasti jank'akirakis uka qamir yänakamax tukusiwayxixä!”

20“¡Alaxpacha, jichhax uka markan tukusitap layku kusisim. Qullananaka, apostolunaka, profetanaka, kusisipxam; Tatituw uka luratapampix chiqapar uñjapxtam” sasa.

21Ukatsti mä wali ch'aman angelaw mä jach'a qala apti, ukasti molino qalar uñtat jach'änwa, ukatsti jach'a qutaruw jaqunti akham sasa: “Jach'a Babilonia marka, akham jaquntataw uñjasïta, janirakiw mayampsa uñjapkxätamti.

22Marka thakhinakamansti janipuniw arpan jayllitapasa, pinkillunakana, trompetanakan phust'asitapas ist'askxaniti, janirakiw kunayman irnaqirinakasa marka thakhinakaman utjkxaniti, molino qalan ñut'uchatapas janirakiw ist'askxaniti.

23Janipuniw juman mä micha qhanas qhankxaniti, jaqichasïwinakan kusisiñ uxutanakapas janirakiw ist'askxaniti. Alakipa lurir jaqinakamax aka uraqpachan wali munañan jaqinakäpxänwa, jumasti layqasitanakamampiw taqpach markanakar sallqanttaxa.”

24Diosaw uka jach'a markarux mutuyäna, profetanakaru, Diosan markapankirinakar jiwayatapat juchanïtap layku. Uka markaw aka uraqin waljaninakar jiwarayäna.

← Chapter 17 Chapter 19 →