Psalms 97

aymara-1997

1¡Taqpach uraqix kusispan! ¡Jan jakht'kay wat'anakax kusisipxpan! ¡Tatituw Reyixa!

2Jupax ch'amak qinayanakamp muyuntatawa; chiqapar uñjañampi, aski kankañampiw reyi qunuñaparux ch'amañchi;

3ninax jupan nayraqatap saranti, muyuntir timanakaparuw nakhanti.

4Lliju llijunakapax akapach qhantayi; ¡uk uñjasinsti uraqix axsarañat khathati!

5Qullunakax lik'ir uñtataw umatati, taqpach uraqin Tatitun nayraqatapana.

6Alaxpachax aski kankañap yatiyi; markanakasti qhapaq kankañap uñjapxi.

7Akapach diosanakar yupaychirinakax jisk'achjatäpxiwa, uka diosanakat jach'achasirinakas aynacht'apxiwa. ¡Taqpach diosanakaw nayraqatapan qunqurt'asipxi!

8Tatay, Jerusalén markampi, Judá uraqinkir markanakampix arsutanakamat walpun kusisipxi;

9Tatay, jumaw taqi uraqpachan jilïrïtaxa, taqpach diosanakat sipan juk'amp jilanktawa.

10Tatitux ñanqhar uñisir jaqinakarux munasiwa; aski arkirinakapan jakañaparux imiwa; ñanqha lurir jaqinakan amparapat qhispiyaraki.

11Qhanax aski jaqitakix k'ajtiwa; kusisiñasti chiqap chuyman jaqinakatakiwa.

12¡Aski jaqinaka, Tatitump kusisipxam, qullan sutip jach'añchapxam!

← Chapter 96 Chapter 98 →