Psalms 90

aymara-1997

1Tatay, mitat mita jaqinak taypin, jumaw nanakan imantasiñaxätaxa.

2Qullunak janïr utjkipana, akapachas janïr utjkipana, wiñayan wiñayapatakiw jumax Diosätaxa.

3Jumaw jaqirux laq'ar tukuytaxa, “Jaqinaka, laq'ar kuttxapxam” sasa.

4Jumatakix waranq maraxa, wasür tukusir urur uñtatakiwa. ¡Arum ch'amakax tukuski ukhamakiwa!

5Jaqirux munkir jan munkir aptaxa, samkäkaspas ukham chhaqtaytaxa;

6jaqinakax qurar uñtatakïpxiwa, alsusinxa willjta tuqiruw panqarsu, jayp'u tuqirusti pharsusin jiwsuraki.

7Juman q'apisiñamaw tukjapxitu, jan amuyun antutapxitu.

8Jucha luratanakaxaxa, ñanqha luratanakaxasa juman nayraqataman uñsti.

9Chiqpachansa, jakañanakaxax q'apisiñam laykuw tukusi; maranakaxasti mä samanjamakiw tukusi.

10Yaqhipanakax paqallq tunka maraw jakapxi; ch'amaninakasti kimsaqallq tunka marakamaw puripxi; ukataq jakañasti, jan walt'añanakampi, qhathami sarnaqañampik apani. ¡Urunakasti jaqinakjam jank'akiw tukusi!

11¿Khitirak phiñasiñamampi lurjatanak yatisti? ¿Khitirak q'apisiñam uñt'isti?

12Jakañ urunakaxay jakhuñ yatichapxita, amuyunakaxan yatiñ kankañ jikxatañapataki.

13¡Tatay, uñtanxapxakitaya! ¿Kunapachkamarak apanukupxitätasti? ¡Aka uywatanakamat khuyapt'ayasim!

14¡Willjtatpach khuyapayasiñamamp phuqt'apxita, jakañaxansti kusisiñampiw q'uchupxä.

15¡Qawqha urunakatix t'aqhisiyapkista ukkha urunakarak kusisiyapxita.

16¡Uywatanakamax luratanakam uñjapxpan, wawanakapasti qhapaq kankañam uñt'apxarakpan!

17Tatitun munasiñapax jiwasanakampïpan. ¡Tatay, luräwinakaxarux juk'ampiy jilxatayam! ¡Jïsa, irnaqatanakaxarux juk'ampiy yapxatam!

← Chapter 89 Chapter 91 →