Psalms 79

aymara-1997

1¡Diosaxay, Tatitur jan uñt'ir jaqinakaw uraqimarux mantantanipxi! ¡Qullan utamaruw ñanqhachapxi, Jerusalenarusti t'unjat markaruw tukuyapxi!

2Chiqpach arkirinakaman amayanakapxa, allqamarinakan manq'añapatakiw jaqunukupxi, animalanakan manq'añapatakiw liwtapxi.

3Jerusalén thiyanakanxa, umar uñtat wilanakap wartapxi, jiwatanakar janiw khiti p'amp'iris utjkiti.

4Nanak jak'an utjir markanakan phiskasiñapäpxtwa; nanakar muyuntirinakan larusiñapäpxaraktwa.

5Tatay, ¿kunapachkamarak q'apisitakïskätasti? ¿Kunapachkamarak q'apisiñamasti ninjam nakhanisti?

6¡Jach'a q'apisiñampiy t'aqhisiyam, jumar jan uñt'ir markanakaru, sutim jan aytasir reyinakaru!

7Jupanakaw Israel markarux t'unjapxi, utanakap q'al tinkurayapxi.

8Nayra awkinakaxan juchanakapatxa, janikiy nanakar mutuyapxistati; ¡khuyapayasiñamax jank'akiy purinpan, nanakax aynacht'ataw uñjasipxta!

9Qhispiyir Diosaxay, ¡juman jach'a sutim laykuy arxatapxita, qhapaq sutim laykuy qhispiyapxita, juchanakat pampachapxarakita!

10¿Kunatarak jucharar jaqinakast sasipkani: “Kawkinkarak Diosapasti?” sasa. Nanakan uñjkañay Diosar jan uñt'irinakax mutupxpan, chiqpach arkirinakamar jiwayapxatapat t'aqhisipxarakpan.

11Katuntat jaqin ayqutap ist'am: jiwañar juchañchatanakarusti ch'amamampiy qhispiyam.

12Tatay, marka masinakaxarux paqallq kutimp kutiyam, jumar jan walinak luratapata;

13nanakasti markamjamaxa, wiñayaw yuspagarapxäma, tamamankir ovejanakjamaxa, wiñayaw jach'añchapxäma, yupaychañ q'uchunak wiñayaw q'uchupxarakï.

← Chapter 78 Chapter 80 →