Psalms 77

aymara-1997

1Diosaruw jach'at art'asta, nayar ist'añapatakiw mayista.

2Llakisiñaxan Tatituruw thaqta, arum paqariw amparas luqtat jupat mayista. Ajayuxasti janiw chuymachasiñ jikxatkiti.

3Diosat amtaskta ukkhasti; ch'ama laq'jtatak amuyasta walpun jachañ munarakta.

4Tatay, jumax janiw ikthapiykistati, ¡q'ala mayjt'atätwa, janiw arsurjamäkti!

5Nayra pacha urunak amthapta, nayra maranakat amtasta;

6arumanakax q'uchurïkäyät ukxat amtasta. Chuyma manqhixan naya pachpaw jiskt'asta:

7¿Tatitux wiñayatakipunit jaytanukpachïstu? ¿Janipunit mayampis khuyapayaskxistani?

8¿Munasiñapax tukusxapunpachati? ¿Arsutapax jan mayampitakich tukusxpacha?

9¿Diosax munasiñapat armasxpachati? jan ukax, ¿q'apisiñach chuymap jist'antpacha? sasa.

10Naya pachpaw sista: “¡Tatitun jiwasanakar jan khuyapayasxatapax walpun chuym usuyitu!” sasa.

11Nayra pachan Tatitun muspharkañ luratanakapat amtasï;

12taqi kun luratapat lup'isï.

13Diosay, thakhinakamax qullanawa; ¿khiti diosarak jumjam ch'amanisti?

14¡Jumaw muspharkañanak lurir Diosätaxa! ¡Jumaw markanakar ch'amam uñacht'aytaxa!

15Ch'amamampiw markamarux qhispiytaxa: Jacobun wawanakaparu, Josean wawanakaparu.

16Diosaxay, lamar qutax jumar uñjasax axsarthapïnwa, walja umanakapas khathatirakïnwa;

17qinayanakax waraskir jall purxatayäna, alaxpachansti q'ixu q'ixunakaw sartäna, lliju llijunakaw taqi chiqan llijtarakïna.

18Q'ixu q'ixunakamax jach'a thayampi chikaw ist'asïna, lliju llijunakamax taqi akapach qhant'ayäna, uraqisti khathatirakïnwa.

19Jumax lamar qutan thakhi jist'arastaxa, walja umanak taypinjam makhattaxa, ukampis janiw khitis takt'atam jikxatkänti.

20Markamarux ovej tamar uñtat irpäyätaxa, Moisesampin Aaronampin amparap tuqi.

← Chapter 76 Chapter 78 →