Psalms 66

aymara-1997

1Taqi akapachankir jaqinaka, Tatitur kusisit q'uchupxam;

2qullan sutipar q'uchunak q'uchupxam, q'uchunak q'uchusax jach'ar aptapxam;

3Diosarux sapxam: “Luratanakamax muspharkañapuniwa. Timanakamax jach'a ch'amam laykuw nayraqataman axsarañat tinkurapxi;

4taqpach jaqinakaw nayraqataman killt'asipxi, sutimaruw q'uchunak q'uchupxaraki” sasa.

5Diosan luratanakap uñjir jutapxam, jaqin askipatak muspharkay luräwinakap uñjapxam:

6lamar qutarux waña uraqiruw tukuyäna, nayra awkinakasax wañanjam jawir makhatapxäna; ¡jichhasti Diosampi kusisipxañäni!

7Ch'amapampiw wiñayatak markanakar apnaqi; nayranakapax markanakaruw uñch'ukiski, qallasir jaqinakan jupatak jan sayt'añapataki.

8¡Markanaka, Diosasar jach'añchapxam!, ¡jach'añchañ q'uchunak jach'at q'uchupxam!

9Jupaw jakayasiskistu; janiw jiwañas munkiti.

10Diosay, jumaw yant'arux puriyapxista, ¡qullqirjamaw q'umachsupxista!

11Sipitaruw jalt'ayapxista; jach'a llakinakampiw apxatapxista.

12Khitimpis takisiyapxakistawa; nina chiqa, uma chiqaw makhatapxta, ukampis qhipa tuqiruw samart'ayapxista.

13Utamar mantasin luqtäwinak churäma; ukhamat jumar arsutanakax phuqhä,

14chijinkasin jumar arskäyäsma, uka arsutanak phuqhä.

15Lik'i uywanak nakt'ayat luqtanïma, urqu vacanakampi, cabritonakamp churanïma, urqu ovejanakampi kun luqtanïma.

16¡Jumanakax taqin jutapxam, jutapxam, Diosar yupaychirinaka! ¡Ist'apxam, kuntix Diosax nayatak lurki ukanak yatiyapxäma!

17Lakaxampi, laxraxampiw juparux jawsta, ukatsti yupaycharaktwa.

18Jan wali amuyutix utjitasapänxa, Tatitux janiw ist'kitasapänti;

19¡ukampis Diosax ist'ituwa, mayisitaxarus jaysituwa!

20¡Diosax jach'añchatäpan, mayisitaxarux ist'apunituwa, munasiñapsa churapunituwa!

← Chapter 65 Chapter 67 →