Psalms 62

aymara-1997

1Dios sapanak ajayuxax samarañ jikxati; qhispiyasiñaxax jupat juti.

2Jupakiw qhispiyitu, arxatarakitu. Janiw pächaskäti, jupaw imantasiñaxaxa.

3¿Kunapachkamarak nuwañatak arknaqapxitätasti? ¿Kunapachkamarak tinkuyañ munapxitätasti? ¿Kunapachkamarak lluxisir pirqarjam uñjapxitätasti? ¿Kunapachkamarak tinkuñampïskir uyurjam uñjapxitätasti?

4Nayar tinkuyañak lup'isipki; k'arisiñax walpun kusisiyi. Lakakiw jach'añchapxitu, chuymampisti ñanqhachapxituwa.

5Nayax Dios sapanak samarañ jikxatta, suyt'añaxax jupat juti.

6Jupakiw qhispiyitu, arxatarakitu. Janiw tinkkäti, jupaw imantasiñaxaxa.

7Diosaw qhispiyirixaxa; jach'a kankañaxas jupat juti; jupaw arxatirixaxa, juparakiw imantasiñaxasa.

8¡Markaxay, jupar taqi chuymamp iyawsam! ¡Taqi chuymamp jupar mayisim! ¡Diosaw jiwasan imantasiñasaxa!

9Jaqix mä samsumpi sasikiwa, qamirisa, jan kunanisa; jupanakarutix balanzampi waytasispaxa, mä samsut sipan phisnakïspawa.

10Ch'axwañanakarux jan wayusipxamti; ¡janirak lunthatasiñarus chuym katuyasipxamti! Qamiris tukusipkätaxa, qullqir jan alkatapxamti.

11Diosan arsutap ist'ta, jupan arup yatta: “ch'amasa, munasiñas jupankatapa, jupax sapa mayniruw lurataparjam waxt'i” sasa.

← Chapter 61 Chapter 63 →