Psalms 6

aymara-1997

1Tatay, janikiy q'apisiñamampix tuqintistati; janirak phiñasiñamampis mutuyistati.

2Tatay, nayat khuyapt'ayasita, ch'ama pisiw uñjasta. Tatay, wasitat k'umaraptayxita, taqpach janchixaw khathatiski.

3¡Axsarañat inakiw khathatiskta! Tatay, jumasti ¿kunapacharak jutätasti?

4Tatay, jutakimaya, ¡jakañax qhispiyakitaya! ¡Khuyapayasiñam laykuy qhispiyita!

5Janiw khitis jiwatanak taypin amtaskiristamti, ¿khitirak manqhapachan jach'añchiristamsti?

6Jachkäwix qaritäxtwa. Paqar paqariw ikiñaxan jachta, jachaxampix ch'ijmaxarus juriptaytwa.

7Jachkäwix nayraxax ch'amakt'xituwa; ¡uñisirinakaxan juchap laykuw nayraxax ch'amakt'xi!

8Ñanqha lurir jaqinaka, nayat jithiqtapxita, Tatituw jachataxarux ist'itu;

9Tatituw achikt'asitaxar jaysitu, Tatituw mayisitax katuqitu.

10Nayampi timasirinakax axsarañat aynacht'apxani, ¡mä ch'ipxtanak p'inqapat jaltxapxani!

← Chapter 5 Chapter 7 →