Psalms 46

aymara-1997

1Diosaw imantasiñasaxa, juparakiw ch'amañchirisasa, jupaw chijinakan arxatirisaxa.

2Ukat jan axsarapkañäniti, uraqis khathatiskpan, qullunakas lamar qutar tinkuntaskpan,

3lamar qutan mathapinakapas qhuthutiskpan, qullunakarus uxix khathatiyaskpan.

4Mä jawiraw Diosan markaparux kusisiyi, Alaxpachankirin qullan markaparu.

5Tatit Diosax markap taypinkiwa, jupaw imaskani; Diosaw qhanjtatpach markaparux yanapaskani.

6Markanakax uxuwa, reyinakasti khathatiwa, uraqix khathatiwa, ch'aman arup ist'asiyki ukapachaxa.

7¡Taqi ch'aman Tatitux jiwasampïskiwa! ¡Jacobun Diosapaw arxatirisaxa!

8Tatitun muspharkañ luräwinakap uñjir jutapxam, uraqin lurki uka muspharkañ luräwinaka:

9aka uraq tukuskamaw nuwasiñ t'akurayi; mich'i antutt'añanak jisk'a jisk'a p'akinuqi, lanzanak t'unarpayi, ¡nuwasiñ carronaksa ninampiw phichhantaraki!

10“¡Amukt'xapxam! ¡Nayan Diosätax yatipxam! ¡Nayax markanakat juk'ampïtwa! ¡Uraqitsa juk'ampirakïtwa!”

11¡Taqi ch'aman Tatitux jiwasampïskiwa! ¡Arxatirisax Jacobun Diosapawa!

← Chapter 45 Chapter 47 →