Psalms 17

aymara-1997

1Tatay, chiqapat mayisitaxarux ist'akimaya, arnaqasitaxar jaysakimaya, mayisitaxar iyawsakimaya, janiw k'ari arunakampi mayisksmati.

2Nayar juchañchañax jumat jutpan, jumaw chiqapäki uk yattaxa.

3Jumaw taqpach amuyunakax yattaxa; arumanakaw chuymax uñaqir jutista; ninampjamaw yant'ista, janirakiw kuna ñanqhsa jikxatkistati. Lakaxax janiw k'ari arunak arskiti,

4kunjämtix jaqinakax k'arisipki ukhama; ch'axwañ thakhinakat jithiqtasta, juman arsutamarjamaw phuqta.

5Kayunakaxax thakhiman thurt'ataw sarnaqi; chillqtanakaxasti janiw thakhimat jithiqtkiti.

6Diosaxay, ist'asirïtam laykuw mayisinsma, naya tuqiruy jinchum alkatanim, arunakaxar ist'arakim.

7Munasiñamay uñacht'ayita, ch'amamar taqi chuymamp iyawsirirux jumaw uñisirinakapat arxattaxa.

8Nayarusti, nayranakaman qalaparjamay imita, chhiqhanakaman ch'iwipar imantita,

9nayar chhukxatir qhuru jaqinakata, ¡jiwayañatak muyuntir uñisirinakaxata!

10Jach'a jach'a tukurinakäpxiwa, jach'a jach'a tukuñampiw kuns arsupxi;

11nayan sarnaqatax sum yatxatapxi, nayar jaqunukuñatakisti taqi tuqit uñch'ukiyapxitu.

12Katuntañatak jalxatir leonanakar uñtatäpxiwa, imantasiñapan jalxatañatak suyantir leonanakar uñtatäpxarakiwa.

13Tatay, sartasikimaya, ¡saykatasin killt'ayam! Ñanqha lurir jaqit espadamampi qhispiyita;

14Tatay, ch'amamampiy jupanakat qhispiyita; ¡akapachat jupanakar jaqunukum, akapachan jakañapax tukuspan! Yänakampix qamirkipstasipkakpan, wawanakapax phallañkam manq'apxpan, allchhinakapatakis jilt'askakpan.

15Nayasti kusisitaw jikxatasï; ajanuy ajanu jumar uñkatasina, ¡uñatatkä ukkhax nayraqataman jikxatasisina!

← Chapter 16 Chapter 18 →