Psalms 144

aymara-1997

1¡Nayar arxatir Tatitux qullanäpan! Jupaw ch'axwañatak wakicht'itu;

2jupaw nayan aski luririxaxa, arxatirixasa, jupaw jach'a imantasiñaxaxa, qhispiyirixasa; jupaw jark'aqasiñaxasa, ukampiw imt'asta; juparakiw markanakar nayamp apnaqayirisa.

3Tatay, ¿kunarak jaqisti, jupat amtasiñamatakisti? ¿Kunarak jaqinakasti, jupanakar munasiñamatakisti?

4Jaqix mä samsumpi sasikiwa, jakañapax chhaqtir ch'iwjamakiwa.

5Tatay, alaxpacham jist'aram, saraqanirakim; jiwq'i mistuyapxañapatak qullunakar llamkt'am;

6llixu llixurux antutnukunim, uñisirinakamarusti chhukhutatayam.

7Alaxpachatpach amparam luqtanim, lamar quta umanakat qhispiyita; yaqha markankir jaqinakan amparapat qhispiyita,

8khitinakatix k'ari arunak parlapki, kupi amparap aytas k'ari juramento lurapki ukanakata.

9Tatay, machaq q'uchu q'uchurapïma, arpamp chikaw q'uchurapïma.

10Jumaw reyinakar atipjaytaxa; jumarakiw David luqtirimar qhispiytaxa, jiwayir espadat arxatita; yaqha markankir jaqinakan amparapat qhispiyita, khitinakatix k'ari arunak parlapki, kupi amparap aytas k'ari juramento lurapki ukanakata.

12Yuqall wawanakaxax alinak taypinjam jiltapxi; imill wawanakaxasti reyin utapar thurxäsir qalanakar uñtatäpxiwa.

13Pirwanakaxax phuqhantatawa, kunayman manq'añanakampi phuqhantatawa. Uywanakaxax walipuniw miranti, uraqixan waranq waranqa tamanakaw mirantaraki.

14Vacanakaxax wallq'ikamakiwa, janiw sulluririnakax utjkiti. Janirakiw thakhinakaxan warariyasiñanakas utjkiti.

15Ukham phuqt'at markax kusisiñan markawa, Tatitut Diosanïki uka markax kusisiñaniwa.

← Chapter 143 Chapter 145 →