Psalms 139

aymara-1997

1Tatay, jumaw uñakipista, ukat nayarux sum uñt'ista;

2jumaw qunt'ataxsa, sartataxsa yattaxa; lup'itanakaxsti jayatpach amuytaxa.

3Jumaw sarnaqataxsa yattaxa, ¡taqpach luräwinakaxsa yattaxa!

4Tatay, janïraw kuns arskti ukkhaw jumax taqpach yatxtaxa.

5Taqi tuqit nayar muyuntista; amparamampiw imxäsista.

6Ukataq yatiñ kankañamax atipjapunituwa; ¡sinti muspharkayawa, janiw amuyt'irjamäkti!

7Ajayum jak'atsti ¿kawkirurak sarästi? nayraqatamatsti ¿kawkirurak jaltästi?

8Alaxpacharutix makhatiristxa, jumax ukanktawa; uraq manqharutix mantiristxa, jumax ukankaraktawa;

9inti jalsu tuqirutix thuqtawayiristxa, jan ukax lamar quta tukuskamas puriristxa,

10ch'iqa amparamax ukan jikxatitaspa; ¡kupi amparamasti janiw antutkitaspati!

11Ch'amakamp imxatayasiñtix amtiristxa, jan ukax, qhana urun ch'amak arumar tukuñaptix muniristxa,

12ch'amakax janiw jumat imantkitaspati, arum ch'amakax urut sipan juk'amp qhanäspawa. ¡Ch'amakasa, qhanasa, jumatakix pachpakiwa!

13Jumaw nayarux irnuqasista; taykaxan purakapan utjayasista.

14Muspharkañ nayatak luratamat jumaruw yuspagarsma. ¡Uksti sumpun yatista!

15Janchixan jiltatapax juman uñjatänwa, jan khitin uñjkat irnuqatäkäyät ukchañkama, uraq manqhan utjayatäkäyät ukchañkama.

16Nayranakamax janchixan lurasitap uñjäna; taqi ukanakasti qillqatamar qillqantatänwa. Jakañ urunakaxax suma jakhutänwa, nayrïr uru janïr purinkipana.

17Diosaxay, juman amtatanakamax jan amuykayawa; ¡ukanakax jan tukuskiriwa!

18Ukanaktix jakht'añ muniristxa, ch'allat sipan juk'ampïspawa; jakhuñ tukuyirista ukasa, jumamp chikakïskiristwa.

19Diosaxay, ñanqha luririnakarux tukusiyamaya, jaqi jiwayirinakarusti nayat jithiqtayam,

20jumxat jan wal parlir jaqinakat jithiqtayita, jumar jan walt'ayir jaqinakat jark'aqita.

21Tatay, jumar uñisirirux uñisiraktwa; jumar qallasirirusti jisk'acharaktwa.

22¡Taqpach chuymaxampiw jupanakar uñista! ¡Uñisirixat jupanakarux uñt'ta!

23Diosay, uñakipitaya, chuymaxar uñantam; nayarux yant'itaya, lup'itanakax uñt'arakim;

24nayatix ñanqha thakhin sarnaqirïstxa, chiqa thakhinjamay irpasita.

← Chapter 138 Chapter 140 →