Psalms 13

aymara-1997

1Tatay, ¿kunapachkamarak nayat armasitätasti? ¿Wiñayatakipunit armasitätasti? ¿Kunapachkamarak nayatak imantasïtasti?

2¿Kunapachkamarak ajayuxas t'aqhisiñankanisti? ¿Kunapachkamarak sapürus llakt'at sarnaqästi? ¿Kunapachkamarak uñisirixasti apnaqitanisti?

3Tatit Diosaxay, ¡uñtanikitaya, ist'akitaya, suma qhanam uñjayakitaya! ¡Janikiy wiñay jiwañar puriyistati!

4Janikiy uñisirixax sispati: “Nayaw atipjta” sasa. Aynacht'ataxatsa janikiy kusispati.

5Nayax khuyapayasiñamaruw iyawsta; chuymaxax nayar qhispiyatamat kusisi.

6¡Tatituruw nayax aski luratapat q'uchü!

← Chapter 12 Chapter 14 →