Psalms 10

aymara-1997

1Tatay, ¿kunatarak nayat jayanktasti? ¿Kunatarak t'aqhisiñaxan nayat imantastasti?

2Qhuru jaqin jach'a jach'a tukuñapax q'apisiñampiw llakit jaqirux t'aqhisiyi; ukampis jupan wakichat pachpa sipitaruw jalt'askani.

3Ñanqha lurir jaqix munapayatapat jach'achasi; Tatiturusti ñanqhachji, jisk'achjarakiwa.

4Ñanqha lurir jaqix, nasa qhiwtasaw arsu: “Janiw Diosax utjkiti, janiw khitis lurataxat wayt'irix utjkiti” sasa. Ukak jupax lup'iski.

5Taqi kunas jupatakix walikipuniwa. Jupatakix juman kamachinakamax wali jayankiwa. Uñisirinakapatsa sawkasiwa,

6janis khitis tinkuykaspax ukham amuyasi, janis jan walt'añanakar purkaspax ukham amuyasi.

7Arunakapax chuyma ust'ayir arunakawa; suma arunïpkaspas ukhamäpxiwa, ukampis ñanqhachaña, t'aqhisiyañ amtanïpxiwa.

8Jamasanakar qunt'asaw suyxati, jan juchan jaqirux uka jamasan jiwayi. Jan arxatirin jaqirux aliqapuniw qhamisiyi:

9mä leonar uñtataw putupar imantasis jan arxatirin jaqirux suyanti, akatjamat jupar katjañatakix suyxati, katji ukkhasti, sipitapar uskuntasaw qatati.

10Jupax alt'araki, lip't'arakiwa, jan arxatirin jaqinakasti jach'a sillunakaparuw jalt'i.

11Ñanqha chuyman jaqix siwa: “Diosax aka jaqit armasiwa, jupar jan uñjañatakix ajanupsa imantasiwa” sasa.

12¡Tatay, sartasikimaya, amparam luqatatasim! ¡T'aqhisir jaqinakat janikiy armasimti!

13Diosaxay, ¿kunatarak ñanqha lurir jaqinakast sawkasipxätamsti, janis jupanakar kuns wayt'kasma ukhamsti?

14Juma pachpaw ñanqha luratanakap uñjtaxa, ¡jumaw uñjtaxa, jupanakarusti juchap uñt'ayätaxa! Jumaruw jan arxatirin jaqinakax makhatxapxtam; jumaw wajchanakan yanapiripätaxa.

15¡Ñanqha lurir jaqinakan amparap t'unaram! ¡Ñanqha luratanakapat wayt'am, taqi kunat phuqhañapkama!

16Tatitux wiñayapuniw reyit qunt'asi, ¡Tatitur jan uñt'irinakasti uraqipat jaqunukutäniwa!

17Tatay, jumaw jan yäqat jaqinakan mayisitap ist'asktaxa, jumaw chuymachtaxa, ch'amañcharaktaxa.

18Wajcharusa, t'aqhisiyatarus chiqaparuy uñjam: ¡laq'at lurat jaqisti, janipun axsarayañ wasitat utjaypati!

← Chapter 9 Chapter 11 →