Numbers 8

aymara-1997

1Tatitux Moisesar sarakïnwa:

2“Aaronamp parlam, juparusti sarakim: kunapachatix paqallqu lamparanak aqtaykani ukapachax, nayräxar qhant'kir candelero patxar apxatpan” sasa.

3Aaronasti kunjämtix Tatitux Moisesar siskatayna ukhamarjamaw phuqhäna, lamparanak nayräxar qhant'kir candelero patxar ucht'äna.

4Candelerox qurit luratänwa, kayut p'iqikam panqarar uñtat martillompkam liq'sutänwa. Tatitux uñacht'aykatayna ukhamarjamaw Moisesax luräna.

5Tatitux Moisesar sänwa:

6“Israelitanak taypit Leví chachat saraqirinakar yaqhacham, ukatsti jupanakar q'umacharakim.

7Jupanakar q'umachañatakisti, q'umachasiñ umampiw jupanakar ch'allakipäta, ukatsti janchipan utjir ñik'utanakap q'al khuchhurasiyäta, isinakapsa t'axsurayarakïta, ukhamat q'uma tukupxani.

8Ukatsti mä vaca qallu katusin apapxpan, aceitemp chaputa suma jak'u waxt'ampi. Jumasti, yaqha vaca qallu katurakïta, jucha luratat pampachäwi jikxatañ wilañcha luqtañataki.

9Jumarakiw levitanakar Tatitump Jikisiñ Carpar jak'achayäta, ukatsti taqpach israelitanakar tantachthapirakïta.

10Ukatsti levitanakar nayan nayraqataxaruw uñstayitäta, israelitanakasti amparanakapampiw levitanakan p'iqinakapxar luqxatapxani.

11Aaronasti nayan nayraqataxaruw levitanakar uñstayani israelitanakan waxt'apjama, ukhamat levitanakax nayan luqtirixat katuyatäni.

12Ukatsti levitanakax vaca qallunakan p'iqipxaruw amparanakapamp luqxatapxani, jumasti jucha luratat mä vaca qallu wilañcha luqtäta, mayïr vaca qallsti Tatitutak nakt'ayat luqtäwi churarakïta.

13Ukatsti levitanakarux Aaronampina, wawanakapampin nayraqataparuw sayarayäta, jupanakarusti luqta katuyañäki ukarjamaw nayar katuyitäta;

14ukham lurasaw levitanakarux mayni israelitanak taypit nayankxañapatak yaqhachäta.

15Ukatsti jupanakax Tatitump Jikisiñ Carpan yanapiriw sarapxani. Jupanakarux q'umachata, mä suma waxt'äwïkaspas ukham nayar katuyitäta,

16taqi israelitanak taypit jupanakan nayar katuyatäpxatap layku. Nayaw jupanakar taqi israelitanakan jilïr tayna yuqall wawanakap lanti katuqta,

17israelitanakan jilïr tayna yuqall wawanakapax nayankituwa, kunjämatix uywanakapan nayrïr qallunakapax nayankki ukhama. Egipcionakan jilïr tayna yuqall wawanakap jiwaraykäyät ukapachaxa, israelitanakan jilïr tayna yuqall wawanakap nayatakiw yaqhachasïyäta.

18Ukat nayax levitanakar jupanak lanti katusta.

19Nayaw levitanakarux mayni israelitanak taypit ajllista, jupanaksti Aaronampiru, wawanakapampiruw katuyta, Tatitumpi Jikisiñ Carpan israelitanakan sutipxar yanapapxañapataki, ukat Tatitun pampachäwip israelitanakatak katuqapxañapataki. Ukhamat israelitanakan qullan utjäwir jan jak'achasiñapäkaniti, janirakiw kunas jupanakar kamachkaniti.”

20Ukatsti Moisesasa, Aaronasa, Israel marka markachirinakas phuqhapxänwa, kuntix Tatitux Moisesar levitanakxat siskatayna taqi ukanaka.

21Levitanakax q'umachasipxänwa, isinakapsa t'axsurasipxänwa, Aaronasti jupanakar Tatit nayraqatan mä suma waxt'äwïkaspas ukham katuyxäna, q'umachäwi luräwi jupanakat lurasina.

22Taqi ukanak qhipatsti, levitanakax Tatitump Jikisiñ Carparuw lurañanakap phuqhir sarapxäna, jupanakax Aaronampina, wawanakapampin sarayataw lurañanakap phuqhapxäna. Kunjämtix Tatitux levitanakxat Moisesar arskatayna ukhamarjamaw phuqhasïna.

23Tatitux Moisesar akham sarakïna:

24“Levitanakax pä tunka phisqan maranit Tatitump Jikisiñ Carpan luräwinakap qalltapxañapa,

25phisqa tunka maranirusti, janiw jupanakan juk'amp lurañapax wakiskxaniti.

26Uka maranak phuqhatatsti, Tatitump Jikisiñ Carpa uñjañak jilanakapar yanapapxaspa, ukampis janiw juk'amp lurañanak lurkxapxaniti. Ukham jumax levitanakan luräwinakap apnaqäta.”

← Chapter 7 Chapter 9 →