Numbers 36

aymara-1997

1Mä urusti, Manasés chachan ayllupankiri, Galaad chachan wila masi tamapan jilïrinakapax, Moisesamp parliriw sarapxäna. Jupanakasti Israelan ayllunakapan jilïrinakap nayraqatan jupar sapxäna:

2—Tatitux suertet wakt'kani uka uraqinak israelitanak taypin lakintañamatakiw jumar sistam, ukatsti saraktamwa Selofhad wila masixar wakt'añapäki uka uraqi phuchhanakapar churxañamataki.

3Jichhasti jupanakatix israelitanakan yaqha ayllunkir chachanakampi jaqichasipxanixa, jupanakar wakt'ki uka uraqinakax, janiw nanakan ayllunakaxankxaniti, jan ukasti jaqichasipki uka chachanakan ayllupankirïxaniwa. Ukhamat suertet wakt'apkitän uka uraqinakax jisk'ar tukxani.

4Israelan qhispiyasiñ mara uruyäwix purinkan ukkhasti, uka uraqinakapax wiñayatakiw uka yaqha ayllutakïxani, nanakan aylluxasti wakt'ki uka uraqit jisk'a uraqinikïxaniwa —sasa.

5Moisesasti Tatitun arsutaparjamaw israelitanakar säna: —José chachan ayllupankir chachanakax walik arsusipki.

6Tatitux Selofhad chachan phuchhanakapan khiti chachanakamp jaqichañapsa munaskaniwa, ukampis uka chachanakax awkipan ayllupankirïñapawa.

7Israelan sapa maynir wakt'ki uka uraqinakax, janiw mä ayllut yaqha ayllur sarakipkaniti; taqi israelit jaqiw uraqipa pachpa ayllupan katxäsiñapa.

8Mä ayllunkir imill wawatix uraqinak katuqanixa, jupax pachpa ayllupat wila masi tamankir chachampiw jaqichasini. Ukhamat sapa israelita jaqix awkinakapat katuqat tuti katxäsini.

9Janiw katuqat uraqix, mä ayllut yaqha ayllurux sarakipkaniti. Israelan sapaqat ayllunakapaw wakt'ki uka uraqinak katxäsiñapa.

10Ukat Mahlá, Tirsá, Hoglá, Milcá, Noá sat Selofhad chachan phuchhanakapax, kunjämtix Tatitux Moisesar siskatayna ukhamarjam lurapxäna, jupanakasti awkipan jilanakapan yuqanakapampiw jaqichasipxäna,

12uka chachanakasti Manasés ayllunkirinakänwa. Ukhamat uka imill wawanakan katuqat uraqinakapax, awkipan ayllupankir uraqipakïskäna.

13Aka arsutanakampi, kamachinakamp Tatitux Moisés tuqi israelitanakar churäna, kunapachatix jupanakax Moab pampanakana, Jordán jawir jak'ana, Jericó marka uñkatasin jikxatasipkän ukapacha.