Numbers 28

aymara-1997

1Tatitux Moisesaruw säna:

2“Israelitanakar parlam, jupanakar sarakim: wakisit uruyañanakan, jan armt'asis nayar luqtapxitpan, t'ant'ampi, nakt'ayat waxt'anakampi, nayatak suma q'apkir waxt'a luqtanaka.

3“Jupanakar sarakim: nayar jach'añchasaw nakt'ayapxañapa aka waxt'anaka: Sapüruw mä maran pä urqu oveja nakt'ayat wilañcha luqtapxani, uka uywasti jan kuna kamacht'atäñapawa.

4Willjta tuqirux maya luqtapxani, mayïrsti jayp'thapiruw luqtapxarakini.

5Grano juyranakat waxt'ax mä litro oliva aceitempi chapuntata pä kilo suma jak'utäñapawa

6(Sinaí qullunxa, sapüruw aka waxt'a nakt'ayasïna, Tatitur mä suma q'apkir waxt'a luqtasina).

7Vino waxt'atsti sapa ovejat mä litro vino luqtapxani. Uka vinompiw Tatitur jach'añchasa qullan utjäwir warakipapxani.

8Maynïr urqu ovejasti jayp'u tuqiruw wilañcha luqtatäni, ukarusti grano juyra waxt'ampi, vino waxt'ampiw yapt'asini, kamisatix willjtan luqtatäki ukhama. Ukasti Tatitur jach'añchas nakt'ayat mä suma q'apkir luqtawa.

9“Sábado urunakanxa, jumanakax mä maran pä urqu ovejanak luqtapxäta, uka ovejanakasti jan kuna kamacht'atäñapawa, pusi kilo suma jak'u aceitemp chaputa, grano juyranak waxt'ata, vino waxt'apamp kuna.

10Aka nakt'ayat waxt'ax sábado urunakan luqtatäni, vino waxt'apamp kuna, sapüru nakt'ayat waxt'a luqtanakax yaqhäskaniwa.

11“Sapa phaxsit qallta uru saraqkipan Tatiturux nakt'ayat waxt'a luqtapxäta, pä vaca qallumpi, mä urqu ovejampi, mä maran paqallqu urqu ovejampi, uka uywanakasti jan kuna kamacht'atäñapawa.

12Sapaqat vaca qallut suxta kilo suma jak'u aceitemp chaput luqtapxäta; sapaqat urqu ovejatsti, pusi kilo jak'u aceitemp chaputa,

13uka pachparaki mä marani oveja qallutxa, pä kilo jak'u aceitemp chaputa. Ukasti Tatitur jach'añchasa nakt'ayat mä suma q'apkir luqtäniwa.

14Vino waxt'asti, pä litro vino sapaqat vaca qalluta, mä litro chikatan sapaqat urqu ovejata, mä litro sapaqat mä maran oveja qalluta. Taqi aka nakt'ayat waxt'anak luqtapxäta, marpacha, sapa phaxsina.

15Sapüru nakt'ayat waxt'a luqtatat sipansa, Tatiturux jucha luratat mä chivo wilañcha luqtapxäta, vino waxt'amp kuna.

16“Sapa mara qallta phaxsina, tunka pusin uru saraqatarusti, Pascua uruyapxäta, Tatitun jach'a kankañapat amtasisa,

17tunka phisqan uru saraqatasti, jach'a urüniwa. Paqallq uruw jan levaduran t'ant'a manq'apxäta.

18Uka paqallqu urunakat nayrïr urunxa, mä qullan tantachäwiwa utjani. Ukürusti janiw jumanakax kuna irnaqañanaksa lurapxätati.

19Tatituruw nakt'ayat waxt'a luqtapxäta, pä urqu vaca qallu, mä urqu oveja, mä maran paqallqu urqu oveja, uka uywanakasti jan kuna kamacht'atäñapawa.

20Uka wilañchanakamp chikax, suma jak'u aceitempi chapuntat waxt'xa, akham lurapxäta: sapaqat vaca qallutxa, suxta kilo jak'u, sapaqat urqu ovejatxa, pusi kilo jak'u,

21ukatsti sapaqat maran oveja qallutxa, pä kilo jak'u.

22Juchanakamat pampachayasiñ jikxatañatakisti mä chivo wilañcha luqtapxarakïta.

23Taqi akanak luqtapxäta, willjtanak nakt'ayat waxt'a sapür luqtaski ukanakat sipana.

24Ukham lurapxäta, sapüru, uka paqallqu uruyañ urunakana, Tatitur jach'añchasa nakt'ayat suma q'apkir waxt'a luqta. Ukasti vino waxt'apampiw luqtasini, sapa urun nakt'ayat waxt'a luqtat sipana.

25Paqallqüri ururusti qullan tantachäwi lurapxäta. Uka urusti janiw kuna irnaqañanaksa lurapxätati.

26“Nayrïr achunak luqtañ urunxa, Tatitur yapunakamat machaq achunakap apthapisin luqtapkäta ukapachax, Semananaka sat uruyañ urunxa, qullan tantachäwi lurapxarakïta. Uka urusti janiw kunsa irnaqapxätati.

27Tatituruw luqtapxäta, nakt'ayat mä suma q'apkir waxt'a, pä urqu vaca qallu, mä urqu oveja, maran paqallqu urqu oveja; uka uywanakasti jan kuna kamacht'atäñapawa.

28Sapaqat vaca qallutxa, suxta kilo suma jak'u aceitempi chaput luqtäta; urqu ovejatxa pusi kilo suma jak'u;

29sapaqat urqu oveja qallutxa, pä kilo suma jak'u.

30Jucha luratanakamat pampachayasiñ jikxatañatakix, mä chivo wilañcha luqtapxarakïta.

31Uka luqtasti sapüru nakt'ayat waxt'at sipana, grano juyranakat waxt'ampi, vino waxt'amp chika luqtapxäta. Uywanakasti jan kuna kamacht'atäñapawa.

← Chapter 27 Chapter 29 →