Numbers 24

aymara-1997

1Israel markar jach'añchañax Tatitur kusisiyatap Balaamax uñjäna, ukat jupax jan kuns lurkxänti Tatitun jupar uñstañapataki, kunjämtix walja kutinak lurkatayna ukhama, jan ukasti, jupax wasar tuqirukiw uñtäna.

2Balaamax Israel markarux ayllunakapatkam utjnuqtat uñjäna, ukhamaruw Tatitun ajayupax jupxar jutäna,

3ukapachasti Balaamax aka arunak arsüna: “Balaaman arunakapawa, Beor chachan yuqapa; qhan arsur chachan arunakapawa.

4Tatitun arunakap ist'irin arunakapawa, Taqi ch'amanin unañchäwinakap yatirin arunakapawa, ajayunkki ukapacha unañchäwinak uñjirin arunakapawa.

5¡Jacob, chhujllanakamax wali sumanakawa! ¡Israel, utjnuqäwimax sumapuniwa!

6Walja siqintat palmeranakar uñtatawa, jawir lakanakan utjir panqaranakar uñtatawa, Tatitun ayruntat áloe panqaranakar uñtatawa, ¡uma thiyanakan alir cedro quqanakar uñtatawa!

7Israel markax jilarkir umanïniwa, yapunakap qarpañataki, umt'añataki. Reyipax Agag reyiruw atipjani; marka apnaqäwipax jach'aptaniwa.

8Tatituw jupanakar Egipto markat irpsunïna, búfalo animalan ch'amapar uñtat ch'amampi. Israel markax uñisir markanakaruw t'unjani; mich'inakapampiw usuchjani ch'akhanakap p'akirarakini.

9Samarañatak winkt'aski uka leonar uñtata ukhamätaw jumax, Israel. ¡Janiw khitis sartayañ yant'kaspati! ¡Jumar jach'añchirix, jach'añchataw uñjasini, jumar ñanqhachirix, ñanqhachataw uñjasini!” sasa.

10Uk ist'asinsti, Balac reyix walpun Balaamatak phiñasïna, amparanakap t'axllisisaw jupar säna: —Nayax uñisirinakaxar ñanqhachayiriw jumar jawsaysma, jumasti kimsa kutiw jupanakar jach'añchtaxa.

11¡Jichhpach utamar sarxam! Nayax jumar walja churäwinak churañ arsüyäta, ukampis Tatituw jan ukham lurasiñap munkiti —sasa.

12Balaamasti ukxaruw sarakïna: —Nayax khithanit jaqinakamar sistwa:

13“Balac reyix qullqini, qurini phuqhantat reyi utap churkitaspa ukkhas nayax janiw jupan mayitap lurkiristti. ¡Janiw nayax Tatitun arsutapar ch'urkhiskiristti! Kuntix Tatitux nayar siskitani ukakpun arsuskä” sasa.

14Jichhax markaxar kuttawayxä, ukampis janïr sarkasin, kuntix akat qhipar Israel markax markamar lurkan uk arsuwayä —sasa.

15Ukapachaw Balaamax aka arunak arsüna: “Balaaman arunakapawa, Beor chachan yuqapa, qhan uñjir chachan arunakapa.

16Tatitun arunakap ist'irin arunakapawa, Alaxpachankirin amtäwip uñt'irin arunakapawa; Taqi ch'amanin unañchäwinakap uñjirin arunakapawa, ajayunkkasin unañchäwinak uñjirin arunakapawa.

17Tatitux uñacht'aykitu ukax janïräkiwa; ukax akat qhiparüskaniwa. Israelan mä reyiw sartani, jupasti mä warawarar uñtataw k'ajani. Jupaw Moab markarux p'iqit takxatani, Set chachan saraqirinakapar taqpachanir pampachjani.

18Edom markaruw katuntani, Seír uñisiripax atipjataw uñjasini. Israel markax jach'a luräwinak lurani.

19Jacobun markapat mä atipjiriw sayt'ani, jupaw markan qhiparirinakar t'unjani” sasa.

20Uka arunak sasinsti, Balaamax Amalec uraqi tuqir uñtasaw aka arunak arsüna: “Amalec markax wali ch'aman markawa; taqpach markanakat sipan wali ch'amaniwa, ukampis q'ala t'unjataw uñjasini” sasa.

21Ukhamarakiw Balaamax quenitanakar uñtasax aka arunak arsüna: “Caín chachan saraqirinakapa: utjäwinakamax suma chiqar sayt'atäskpansa, utanakamax qarqanak taypir utachatäskpansa, uka utanakamax ninampi t'unjataw uñjasini, Asiria markax katuntapkätam ukapachaxa” sasa.

23Tukuyañatakisti, Balaamax wasitat arsüna: “¡Ay, kunakïkan jakir jaqinakatxa, Tatitux taqi akanak lurkan ukapachaxa!

24Chipre quta thiyanakatpach barconakax jutani, Asiria, Éber markanakaruw tukjani, Éber markas t'unjatarakïniwa” sasa.

25Uka qhipat Balaamax utapar kuttawayxäna, Balac reyisti thakhipanjam sarxarakïna.

← Chapter 23 Chapter 25 →