Numbers 18

aymara-1997

1Tatitux Aaronaruw säna: “Kunapachatix israelitanakax Tatitump Jikisiñ Carpar ñanqhachañatak kuna juchsa lurapkani ukkhaxa, jumampi, wawanakamampi, Leví ayllunkir mayni jilanakamampikiw jupanakan jucha luratapat pampachäwi mayipxäta; ukampis kunapachatix jumampi, wawanakamampi sacerdote kankañ phuqkasin jucha lurapxäta ukkhaxa, janiw khitis jumanakan jucha luratanakamat pampachäwi maykaniti, jan ukasti, jumanakpachaw mayisipxäta.

2Ukampis Tatitump Jikisiñ Carpan lurañanakanxa, Leví ayllunkir mayni jilanakamampix jumarusa, wawanakamarus yanapt'añapawa.

3Jupanakax juman yanapirinakamäniwa, carpan kuna lurañatix utjki ukanakansa yanapasirakiniwa, ukampis Tatitump Jikisiñ Carpan yänakapampiru, altarampirux jan jak'achasipxpati; jan ukasti, jupanakax jiwapxaniwa, jumanakas jiwapxarakïtawa.

4Jupanakax Tatitump Jikisiñ Carpa luräwinakan, taqi luqtäwinakan juma chikäpxañapawa. Ukampis janiw khiti jan uñt'at jaqis jumanakar jak'achasiñapäkiti;

5jumanakaw qullan utjäwimpina, altarampin luräwinak phuqhañatak utt'ayatäpxtaxa. Ukhamat israelitanakatakix wasitat jan phiñaskxäti.

6Nayaw levita jilanakamarux israelitanak taypit yaqhachta, jumanakar churañataki, Tatitump Jikisiñ Carpan luräwinakan yanapasipxañapataki;

7ukampis jumampi, wawanakamampikiw sacerdote luräwinak phuqhapxäta, altarana, velo qhipäxansa. Uka lurañasti jumanakaruw wakt'apxtam, nayaw jumanakar sacerdote luräwinak churapxsma. Maynitix jan sacerdotëkasin sacerdoten luräwip luranixa, jiwañapatak juchañchatäniwa” sasa.

8Tatitusti Aaronarux sänwa: “Nayar luqtat waxt'anak uñjañamatakiw katuysma. Israelitanakax qullan waxt'anak churapkitu ukanaksti, jumampiru, wawanakamampiruw churapxsma, wakt'apktam ukhamarjama; ukasti wiñayatak arsut kamachïniwa.

9Nakt'at wilañchanakatxa, grano juyra waxt'anakaw jumar wakt'ätam, ukhamarak jucha luratat israelitanakax luqtapkitu uka wilañchanakampi; taqi uka qullan waxt'anakax jumampitaki, wawanakamampitakïniwa.

10Jumanak taypin utjir chachanakax aka waxt'anakat manq'asipkaspawa, ukanaksti pachpa qullan chiqan manq'apxañapa, uka waxt'anakan qullanätap layku.

11“Ukatsti, israelitanakax luqtapkitan uka suma waxt'anaksti jumampitaki, jumamp jakasir yuqall wawamampitaki, imill wawamampitakiw churaraksma. Ukasti wiñayatak arsut kamachïniwa. Utamankir jaqinakat q'umachat jikxatasirix manq'askarakispawa.

12Israelitanakax nayrïr achunak sapa mara apanirapipkitu ukanakat churarakïmawa: sumïr aceite, sumïr vino, sumïr trigo.

13Taqi kuntix uraqix achuyki, taqi uka achunakat nayrïr achunakap jupanakax apanipxani, nayasti jumaruw ukanak katuyäma. Q'umachat jikxatasir jaqix, ukanak manq'askaspawa.

14Kuna waxt'anaktix israelitanakax nayar luqtapkitan ukanakax jumatakïniwa.

15“Taqi israelitanakan jilïr wawanakapampi, uywanakan nayrïr wawachat qallunakapa nayar luqtapkitan ukanakax jumatakïniwa. Ukampis jaqinakan jilïr wawanakapampita, q'añu uywanakan nayrïr wawachat qallunakapampitxa alap mayïta kutsuyasxañapataki.

16Uka kutsuyasiñasti wawax mä phaxsinïxani ukapachaw alapax churatäxañapa, kutsuyañ alasti phisqa qullqïñapawa, qullan utjäwin tupuparjama, tunka mayan gramo qullqi.

17Ukampis janiw vacanakan nayrïr qallunakap yaqha waxt'amp kutsuyätati, janirakiw cabritonakan nayrïr qallupsa kutsuyätati, janirakiw ovejanakan nayrïr wawachat qallunakapsa kutsuyätati. Ukanakasti nayatak yaqhachatawa, nayatakiw jiwarayäta; ukatsti altarxaruw wilap warxatäta, lik'ipsti nayatak mä suma q'apkir waxt'äñapatakiw nakt'ayäta.

18Uka uywanakan aychapasa, jaraphipasa, kawkïritix suma waxt'a churatäki uka, ukhamarak kupi charapas jumatakïniwa.

19Israelitanakax nayatak yaqhachapkani taqi uka churäwinaksti, jumaruw churäma, ukhamarak jumamp chika jakkani uka yuqall wawamampiru, imill wawamampiru. Uka arsutax wiñayatak arsut kamachiwa. Jan p'akintkaya, wiñay arust'äwiwa, nayaw jumampi, juman saraqirinakamamp uka arust'äwi lurta.”

20Tatitusti Aaronarux sänwa: “Janiw jumanxa Israel jaqinak taypin uraqimasa, tuti katuqäwimas utjkaniti. Nayaw Israel markan juman uraqimäyäxa, tutimäyäsa.

21Leví chachat saraqirinakarux, mä tutïkaspas ukham uk churta, kuntix israelitanakax achunakapat sapa tunkat maya churañapäki ukanaka, qullan utjäwin irnaqapxatap layku.

22Mayni israelitanakax janiw Tatitump Jikisiñ Carpar jak'achasipxañapäkiti, ukham lurasax jucha lurapxaspa, ukatsti jiwataw uñjasipxaspa.

23Levitanakakiw Tatitump Jikisiñ Carpan luräwinakap phuqhapxani, jupanakarakiw kuna pantjasitanakatsa juchañchat uñjasipxani. Ukasti, jumanakatakisa, wawanakamatakis wiñayatak arsut kamachïniwa. Leví chachat saraqirinakax janiw Israelan uraqinïpkaniti.

24Jupanakarux kuntix israelitanakax achunakapat sapa tunkat maya churapkitani ukanakxa, mä tutïkaspas ukham churta. Ukat nayax jupanakar sista: janiw israelitanak taypin uraqi katuqapkätati” sasa.

25Tatitux Moisesar sarakïnwa:

26“Levitanakarux akham sätawa: Israelitanakan achunakapata, sapa tunkat maya katuqapkan ukapachaxa, ukanakat sapa tunkat maya yaqhachapxpan nayar luqtañataki.

27Ukaw jupanakan waxt'apäni, kunjämtix israelitanakax trigonakapatsa, vinonakapatsa sapa tunkat maya churapki ukhama.

28Ukhamat israelitanakat sapa tunkat maya katuqapkani ukatxa, levitanakax Tatitur churañatak yaqhachapxani, uka waxt'anaksti Aarón sacerdoteruw churapxani.

29Taqi kunanaktix katuqapkan ukanakatxa, sumäki ukpun yaqhachapxani, nayar waxt'a churañataki.

30“Ukxarusti sarakim: Nayatak sumäki ukanak yaqhachxasinsti, ukat jilt'anakxa jupanakan trigopäkaspasa, vinopäkaspas ukham uñt'asxapxani,

31ukanaksti kawkhantix munapkani ukawjan wila masinakapamp chik manq'asipkani. Churäwipax ukäniwa, Tatitump Jikisiñ Carpan irnaqatap layku.

32Nayatak sumäki uk yaqhachxasinsti, jan kuna jucha lurasaw jilt'anakat manq'asax janiw juchañchatäpkaniti; ukhamat israelitanakan q'uma waxt'anakap jan q'añuchaskañataki, janirakiw jiwayatäñatak juchañchatäpkaniti” sasa.

← Chapter 17 Chapter 19 →