Numbers 15

aymara-1997

1Tatitux Moisesaruw parlän akham sasa:

2“Israelitanakar akham sarakim: Nayax jumanakan jakapxañamatak churapkäma uka uraqir mantapkäta,

3ukatsti nayar jach'añchas mä urqu vaca, jan ukax, mä ovejsa luqtapxitäta suma q'apkir wilañcha nakt'ayañataki, kuntix arsupkta ukanak phuqhasa, jan ukax, chuymanakamatjam waxt'a churasa, jan ukax, mä uruyäwi uruyasasa ukapachaxa,

4khititix waxt'a churkani ukax, mä litro aceitemp chaputa suma jak'ut pä kilo yapt'ani.

5Uka wilañchanakarusti mä litro vino waxt'ampi yapt'añapa, sapaqat ovejata.

6Wilañchatix mä urqu ovejächi ukax, pusi kilo suma jak'ump yapxatani, mä litrot jilpacha aceitemp chapuntata,

7mä litrot jilpacha vinompi, nayatak suma q'apkir luqtäñapataki.

8Wilañchatix mä vaca qallüchi, nakt'ayat luqtäwi luqtañataki, jan ukax, sumankayir wilañchataki, jan ukax, arsüwi phuqhasin luqtächi ukapachasti,

9suxta kilo suma jak'ump yapt'ani, pä litro aceitemp chapuntata,

10pä litro vinompi, nayatak suma q'apkir nakt'ayat luqtäñapataki.

11Ukham lurani, sapa urqu vaca luqtampi, sapa urqu oveja luqtampi, sapa mä marani urqu oveja luqtampi, sapa cabrito luqtampi.

12Sapaqat uywa luqtaskan ukatxa, wakiski uka waxt'ap churasini, qawqha uywanakatix utjki ukhamarjama.

13Taqi israelitanakaw aka kamachinakarjam phuqhañapa, suma q'apkir nakt'ayat waxt'a luqtkitan ukapacha.

14“Yaqha markat jutir jaqitix jumanak taypin jakaspa, ukat suma q'apkir nakt'ayat waxt'a nayar luqtañ munitaspa ukaxa, jupax jumanakjamarakiw pachpa kamachinak phuqhañapa.

15Uka pachpa kamachinakaw jumanakatakisa, yaqha markat jutir jaqinakatakisa, wawanakamatakisa; uka kamachix wiñayatakïniwa.

16Mä pachpa kamachikiw utji, jumanakatakisa, yaqha markat jutir jaqinakatakisa” sasa.

17Tatitux Moisesar sänwa:

18“Israelitanakar akham sarakim: Nayax irpapkäm uka uraqir puripkäta,

19ukatsti ukan achur trigo apthapisin manq'añ qalltapkät ukapachasti, uka achunakat mä qawqha nayar luqtañatak yaqhachapxäta.

20Kunjämatix nayrïr jawq'at trigot mä juk'a luqtapkistaxa, ukhamarakiw nayrïr jak'u chaputatxa, t'ant'a waxt'a luqtapxitäta.

21Uka waxt'a lurapxapunïtawa.

22“Jumanakatix jan amuyasis nayrïr urutpach Moisesar arsut arunakarjam jan phuqhapkätaxa, akanak lurapxäta:

24“Markpachatix jan amuyasis pantjasinixa, taqpach markaw mä urqu vaca qallu luqtitani, nakt'ayat suma q'apkir luqta, wakiski uka grano achunakampi, vino waxt'apampi, Diosan arsutaparjama; ukxarusti, jucha luratat mä chivo wilañcha luqtapxitäta.

25Ukatsti sacerdotew Israel markpachatak luqta katuyani, juchat pampachäwi jikxatañataki, nayasti jupanakarux juchapat pampachäwa, jan amuyasisin pantjasipxatap layku; jupanakan uka jucha luratat waxt'apa, wilañchapa nayar luqtapxatap layku.

26Nayaw taqpach Israel markaru, jumanak taypin jakir yaqha markat jutir jaqinakan juchap pampachä, markatix jan amuyasis pantjaskan ukapachaxa.

27“Mä sapa jaqitix jan amuyasis jucha lurkani ukapachasti, uka jaqix jucha luratat mä marani qachu cabra wilañcha luqtani.

28Ukatsti sacerdotew nayan nayraqataxan uka jaqitak luqtäwi katuyani, jan amuyasis jucha luratapat pampachäwi jikxatañataki, nayasti uka jaqirux juchap pampachäwa.

29Mä pachpa kamachikiw utji, israelitanakatakisa, jumanak taypin jakir yaqha markat jutir jaqitakisa, mä jaqitix jan amuyaskasin pantjaskan ukapacha.

30“Ukampis mä jaqitix sum yatkasin juch lurani, israelit jaqïpansa, yaqha markat jutir jaqïpansa, ukasti nayaruw ñanqhachitu. Ukhamïpansti, uka jaqix markap taypit jaqunukutaw uñjasini,

31nayan arunakax jisk'achatap layku, arsutanakax jan phuqhatap layku; uka jaqix jaqunukutaw uñjasini, juchap uñt'asirakini.”

32Israelitanakax wasaran jikxatasipkän ukapachax, mä jaqiruw sábado urun phayañ lawanak apthapiskir jikxatapxäna.

33Ukat uka jaqir Moisesampina, Aaronampin nayraqatapar irpapxäna, taqpach markachirinak nayräxaru.

34Jupanakasti uka jaqir katuntasin jak'atak uñch'ukipxäna, uka jaqir janïra kuna lurañ yatisitap layku.

35Ukapachaw Tatitux Moisesar säna: “Uka jaqix jiwañapawa. Taqpach marka jupar qalamp k'upjapxpan campamentot anqäxana” sasa.

36Israelitanakasti uka jaqir campamentot anqäxar irpsusinxa, jiwayañkamaw qalamp k'upjapxäna, Tatitux Moisesar arskatayna ukhamarjama.

37Uka qhipatsti, Tatitux Moisesar sänwa:

38“Israelitanakar akham sarakim: Jumanakampi, wawanakamampix isinakar t'ikhachanakamp muytat isinakampiw uchasipxäta. Uka t'ikhachatanakasti morado ch'ankhat luratäñapawa.

39Uka t'ikhachatanak uñjasin jumanakax nayan churat taqpach kamachi arunakat amtasipxäta, ukat phuqhapxarakïta; janirakiw jumanakan pachpa amtäwinakamampi, munañanakamampi apayasipxätati, ukanak laykuw jumanakax nayar iyawsañ apanukupxtaxa.

40Ukhamat jumanakax taqi kamachinakaxat amtasipxäta, phuqhapxarakïta, ukatsti naya, Diosamar katuyatäpxätawa.

41Nayätwa jumanakan Tatit Diosamaxa, nayaw jumanakan Diosamäñatak Egipto uraqit irpsunipxsma. Nayätwa jumanakan Tatit Diosamaxa” sasa.

← Chapter 14 Chapter 16 →