Numbers 11

aymara-1997

1Mä urusti, israelitanakax Tatitutakiw arusipxäna, jupanakan jan walt'añanakan jikxatasipxatap layku. Tatitusti ukanak ist'asax walpun q'apisïna, ukat jupanakar mä nina apayanisax utjnuqäwin thiyanakap phichhantäna.

2Jaqinakax jach'at wararisaw Moisesar yanap mayipxäna, Moisesasti Tatituruw jupanakatak mayïna, ukat ninax jiwarxäna.

3Ukat uka chiqarux Taberá sas sutichapxäna, uka arusti “phichhantata” sañ muni. Uka chiqan Tatitun ninapan jupanakatak nakhatap layku.

4Israelitanak taypin yaqha markankir jaqinakaw utjatayna, jupanakasti manq'añatak llakisisipkäna. Israelitanakasti jupanak uñjasax jachapxarakïnwa, akham sasa: “¡Aychakis manq'añatak utjaspa!

5¡Egipto uraqin chawlla inak manq'atasasti kawkinkaraki! Ukatsti, pepinonaka, melonanaka, puerronaka, cebollanaka, ajonak khayan manq'ayätan.

6Jichhasti manq'atjamaw jiwarasktan, janirakiw kunas utjkiti, aka maná manq'akiw utjaski” sasa.

7Maná manq'asti cilantro quqan jathapar uñtatänwa; samipasti niyas q'illur uñtatarakïnwa, resina aceitjama,

8mallt'atasti aceitemp chaputa jak'ut lurat t'ant'jamänwa. Jaqinakax ukanak apthapiriw mistüna, ukatsti ukanak k'iyapxäna, ukatsti ch'axt'asisaw phayasipxäna, jan ukax, t'ant'anak lurasipxarakïna.

9Arumthapirusti, sullax utjnuqtapkän ukxaruw sullantäna, maná manq'ax sullampi chikaw purirakïna.

10Moisesax israelitanakampi wila masinakapampi chhujlla mantañanakapan jachasipkatap ist'äna. Tatitusti wali q'apisitapunïnwa. Moisesax mayjt'asirakïnwa,

11ukat Tatitur akham jiskt'äna: —Nayax juman luqtirimätwa. ¿Kunatarak ukham jan wal luristasti? ¿Kunarak juchäxi nayan aka markamp akataq ch'am tukuñaxatakisti?

12¿Nayasti jupanakan awkipätti, taykapätcha, nayra awkinakapar churañatak arsut uraqir puriyañkam ñuñur wawanakarjam amparaxar ichuskañatak nayar mayiñamatakisti?

13Jupanakax jacht'asisaw nayan ukar jutapxitu: ‘Aycha manq'añatak churapxita’ sasa. ¿Kawkitarak akataq jaqinakar manq'ayañatak aycha apsüsti?

14Janiw naya sapaki taqi aka jaqinakar irpirjamäkti; nayatakix wali ch'am tukuñawa.

15Jumatix nayar ukham luraskakitätaxa, jakañaxak apaqxita chiqpachan munaschista ukaxa. Ukataq jan walt'añan uñjasiñaxax tukusxaspawa —sasa.

16Tatitusti Moisesar sänwa: —Israelitanak taypit paqallq tunka jilïr chachanak tantacham, jupanakasti juman uñt'at marka sarayir jaqinakäñapawa, jupanakarusti Tatitump Jikisiñ Carpar irpanim, ukan jumamp chik suyapxpan.

17Nayax saraqanisin jumar parläma, ukatsti juman ajayumat apaqasaw uka jilïr jaqinakar churä, jumar aka marka apnaqañ yanapt'añapataki; jan juma sapak taqi kun luraskañamataki.

18Ukatsti jaqinakarux arumanthitak q'umachasir khitham, ukat aycha manq'apxani. Nayax jupanakan jachatanakapampi, parlatanakapamp ist'xtwa: “¡Aychakis manq'añatak utjistaspa! ¡Egipton walikipuniw sarnaqaskäyätan!” sasa. Walikiwa, nayaw manq'apxañapatak aycha churä,

19janiw mä urukiti, pä urukicha, phisqa urukicha, tunka urukicha, pä tunka urukicha aycha manq'apkani,

20jan ukasti phaxspachaw aycha manq'apxani, axtasiñkama, nasanakapat mistuyañkama, jupanak taypin jikxataskasasa, naya, Tatitur jisk'achapxatapata, naya nayräxan jachapxatapata: ‘¿Kunatakirak Egiptot mistunpachätansti?’ sapxatap layku.

21Moisesasti sänwa: —Tatay, ¿kawkitarak phaxspach manq'ayañamatak ukataq aycha apsütasti? Niya suxta patak waranqa chachanakawa, warminakar jan jakhusa.

22Nanakax apasinipkta uka vacanakampi, ovejanakampi taqpach kharirapkirista ukasa, jan ukax, qutan utjir taqpach chawllanak churksna ukasa, janiw taqinitak utjkaspati —sasa.

23Ukampis Tatitux Moisesar sänwa: —¿Janis nayax ch'amanïkirista ukhamti amuyista? Jichhaw uñjäta, arsutaxax phuqhasiniti, janich phuqhaskani uka —sasa.

24Ukatsti Moisesax kuntix Tatitux jupar siskatayna ukanak markar yatiyir saräna, paqallq tunka israelitanakan jilïrinakaparuw tantachäna, jupanakarusti qullan utjäwi muytaruw uchäna.

25Ukapachasti Tatitux qinayanjam saraqanisinxa, Moisesampiw parläna; ukatsti Moisesan utjkän uka ajayut apaqäna, ukatsti uka paqallq tunka jilïr jaqinakaruw churäna, ajayux jupanakxar purkän ukkhasti, jupanakax Tatitut katuqat arunak yatiyañ qalltapxäna; ukasti mä kutikiw ukham lurasïna.

26Uka paqallq tunk ajllitanak taypin pä chachaw utjäna, maynix Eldad sutinïnwa, maynisti Medad sutinirakïnwa, jupanakasti janiw qullan carpar sarapkataynati, jan ukasti, campamenton qhiparapxatayna. Ukampisa, ajayux jupanakxar purirakïnwa, ukatsti jutir urunakat parlañ qalltapxarakïna.

27Ukapachaw mä waynax jalasin Moisesar yatiyäna, akham sasa: —¡Eldad, Medad chachanakax profetanakjamaw campamenton parlasipki! —sasa.

28Ukat Josué sat Nun chachan yuqapa, khititix Moisesar waynatpach yanapkän ukax säna: —¡Moisés, tatay, uka arunak jan parlayamti! —sasa.

29Moisesasti jupar sänwa: —¿Kunatarak jumasti naya sapan parlañaxak muntasti? ¡Nayax Tatitun taqpach markapar ajayup churañapa, ukatsti taqinis profetäpxañap munirista! —sasa.

30Uka qhipatsti, Moisesampi, Israelan jilïrinakapampix campamentoruw kuttxapxäna.

31Tatitux jach'a quta tuqit wali ch'aman thaya thayt'ayanïna. Uka thayasti walja khullunak apanïna, ukatsti israelitanakan campamento jak'aruw puriyäna. Khullunakasti waljapunïnwa, mä uru sararjamaruw phuqhantäna, niya mä metrokam amsta tuqirux phuqhantarakïna.

32Jaqinakasti uka uru, uka aruma, qhipärmanthi urumppachaw khullunak apthapïna. Juk'a apthapirix, tunka qutu khullunak apthapïna, uksti campamento thiyanakaruw wañachapxäna.

33Ukampis israelitanakax khullun aychap manq'antapkän ukapachaw Tatitux jupanakatak q'apisïna, jupanakar walpun mutuyäna, waljaniw jiwararakïna.

34Ukat uka chiqawjarux Quibrot-hataavá sas sutichapxäna, uka chiqan manq'añak munaskir jaqinakan amayap imantapxatap layku.

35Markasti Quibrot-hataavá chiqat sartasin, Haserot chiqar puriñkamaw sarasipkakïna, ukatsti ukan qhiparxapxäna.

← Chapter 10 Chapter 12 →