Nehemiah 8

aymara-1997

1Ukhamasti markachirinakax taqpachaniw plazan mayaki tantacht'asipxäna, Uma punku satäki uka nayräxana, ukatxa yatichiri Esdrasaruw sapxäna: “Tatitux Israel markaru Moisés tuqi kamachip churkatayna uka qillqat aptanim” sasa.

2Esdras chachasti paqallqüri phaxsina, nayrïr uru saraqataruw kamachinakan qillqat aptanïna; kawkhantix chachanakasa, warminakas tantachatapkäna, ukhamaraki khitinakatix suma amuyt'irïpkän uka jaqinakan nayraqataparu.

3Ukatsti willjtat chika urukamaw taqi jupanakan nayraqatapan kamachinak ullaräna, Uma punku sat uñkatasi plaza nayräxana. Taqpach markachirinakaw kamachi qillqat arunak ullart'atarux sum ist'apxäna.

4Esdras yatichiristi lawat lurat tarima patxan sayt'atänwa; uka tarimasti uka amtäwimpi luratänwa. Esdrasan kupïxapanxa Matatías, Sema, Anías, Urías, Hilquías, Maaseías uka chachanakaw sayt'atäpxäna. Ch'iqäxapansti Pedaías, Misael, Malquías, Hasum, Hasbadana, Zacarías, Mesulam uka chachanakaraki.

5Ukatsti Esdrasax taqi jaqinakan uñjkañaw qillqat jist'aräna, jupax taqininsa uñjkañarakïnwa; jist'arkäna ukkhasti taqiniw sayt'asipxäna.

6Esdrasasti taqi ch'aman Tatit Diosaruw yupaychäna, ukatsti taqiniw amparanakap alayar luqtasin arsupxäna: “¡Ukhamäpan! ¡Ukhamäpan!” sasa. P'iqinakapsti uraqir puriyañkamaw alt'apxäna, ukatsti Tatituruw yupaychapxarakïna.

7Uka qhipatxa, Josué, Baní, Serebías, Jamín, Acub, Sabtai, Odías, Maaseías, Quelitá, Azarías, Jozabad, Hanán, Pelaías uka levitanakasti jaqinakarux kamachi arunakxat sum qhanañchapxäna. Jaqinakasti ukkhakamax pachpankapxänwa,

8jupanakax Tatitun kamachi arunakap jach'at ullarapxäna, ukatsti yaqha aruruw jaqukipapxäna, ukhamat sum amuyt'apxañapataki.

9Tatitun kamachi arunakap ist'asinxa jaqinakax taqiniw jachapxäna. Ukatsti, marka apnaqir Nehemiasasa, Esdras yatichir sacerdotesa, ukhamarak jaqinakar Tatitun kamachip qhanañchir levitanakasa, sapxänwa: “Jichhürux Tatit Diosasar luqtat uruwa, jan llakisipxamti, janirak jachapxamsa” sasa.

10Esdrasasti ukxarux sänwa: “Sarxapxam, manq'asinipxam sumïri manq'anaka, muxsa vino umasipxarakim, ukatsti khitinakantix manq'añapax jan utjki ukanakar churapxarakim; jichhürux Tatitusar luqtat uruwa. Jan llakisipxamti, Tatitusti kusisiñapampiw ch'amañchistani” sasa.

11Levitanakasti jaqinakarux amukt'ayapxarakïnwa, akham sasa: “Amukt'apxam, jan jachapxamti, aka urux Tatitur luqtat uruwa” sasa.

12Ukatsti markachirinakax taqiniw manq'iri, umiri sarxapxäna, ukhamaraki manq'anakapa mayninakampi jaljasiri, mä jach'a phunchhäwi lurapxarakïna, kuntix jupanakar yatichaskäna ukanakxat amuyt'apxatapata.

13Uka qhipürusti wila masinakan jilïr irpirinakapa, sacerdotenaka, levita chachanakax yatichiri Esdrasampiw tantacht'asipxäna, Tatitun kamachi arunakap sum yatxatañataki,

14ukatsti jupanakax uka kamachi qillqatan jikxatapxäna kuntix Tatitux Moisés tuqi lurañatak arskatayna uka qillqata, israelitanakax paqallqüri phaxsina, phunchhäwi urunakan chhujlla manqhin jakapxañapäki ukxata.

15Ukatsti yatiyasirakïnwa taqi markanakaru, Jerusalenampiru, jaqinakan qullurkam mistusin olivo layminaka, arrayán layminaka, palmera layminaka, jan ukax walja laphinakani yaqha quqanaksa thaqanipxañapataki, ukanakampi chhujllanaka lurañataki, kunjämatix kamachin qillqatäki ukhamarjam phuqhasa.

16Jaqinakasti mistuwayasin, layminakas marqt'ataw kutt'anipxäna, sapa maynis chhujllanakap lurasiñataki, mayninakax uta patxanakan lurapxäna, mayninakasti uta anqäxana, yaqhipanakasti Tatitun utap anqäxana, Uma Punku satäki uka plaza uñkatasina, Efrainan punkupa satäkis uka uñkatasin lurapxarakïna.

17Babilonia markat kutt'anirinakax chhujllanak lurasipxäna, ukatsti ukan jakapxarakïna. Jupanakasti wali kusisitäpxänwa, israelitanakax janiw Nun chachan Josué yuqapan urunakapatpacha khä urukamax, ukham lurapkataynati.

18Paqallq uruw uka phunchhäwi uruyapxäna; Esdrasasti sapüruw Tatitun kamachi arunakap ullaräna, nayrïr urut qalltasina qhipa urukama, kimsaqallqür urunsti Tatitur yupaychañatakiw tantachasipxäna, kunjämtix kamachin qillqatäkäna ukarjama.

← Chapter 7 Chapter 9 →